Santiago 1

1Kjibokwo ëre taga tja Santiagorë. Tja Sbö parkaga, Tjšapga Jesucristo parkaga bakoe. Israel tjëyoga kjringgwo sak kjwara kjingsho pjök (12) Jesús tjšõkwo kjragaga shdöktong šöng kjok kjwang jîkong, kjibokwo ëre ichër jek bomi kong. Miga šër bomi kong. 2Pjeyoga, ðëbo wen bomi kong owa obšë obšë Tjšapga Jesús kjîshkoshko ga pjãy wopjšú ara anmoyõ. 3Miydëmi pjšú ga pjãy tjšîkoba, pjãy mär šöng Tjšapga ši go jšõkoyo miydëba e go wšo. Shäryë enishko ga pjãy opping ðëbo owa kuk kjange. 4Pjãy oppino ðëbo owa kuk kjang pjir ga pjãy äär ber šöng mär Sbö go, woyde sorë ši eni. Eshko ga ðëye woydëmi ame. 5Pjãy kjok miydë woydë wšeni ga rokozî Sbö kong, ga twe bomi kong. Shji kjimte woydë jšõkoyo, ga kjok miydë rokëy ba kongshko ga shji wšõya ðëme. 6Gueniyo ðëbo rokëmi ba kongshko ga woyotjšîzî jšõkoyo ga pjãy kjimte, pjãy kjimte ðëme šëmi ðëme. Ëye ðëbo rokë Tjšapga kong, ga wotjšîk ga kjimte ðëme še wšeni ga e iõya bakwe pjšukdë ðaw pogo dšung kjing go wšeni. 7Ëye wotjšîk eni ga kjimte Tjšapgarë ðëme. 8Nopga eniyo wotjšîk obšë obšë îyado, ðëye woyde ši miyde šöng ðëme. 9Sbö nopga ðëbo ara ðëm wšeniyo, woyde ga šöng wopjšú, Sbö kong ga tjwšõ ara kjîshko. 10Sbö nopga šöng dbur ara wšeniyo, woyde ga šöng wotöshko, ðono ga šöng ame kjîshko, kjšo sho šonggwo wšeni. 11Dšo wen tëm kjširkë dbo arashko ga kjšo sho zröngtëng, šonggwo šon dret, ber wošësowa ame. Eni wšeni ga nopga dbur ara wšeniyo šöng parkë dbur shak wopro ga wošon, ga ber ðëye ame. 12Ëye, ðëbo owa wen ba kong kuya kjang ga era ber wopjšú, ðëbo owa ši kura jek pjir ga ie Sbörë ber sök së îyado ba tjok kjîshko. Sbö tjšêno jšõkoyo ga ëye omwoydë ga ie ber sök eni šara. 13Shji wotjšîk tjwe ðëbo owa shäryë šëyshko ga shji tjšîngga Sbörë šëy ðëme. Sbö wotjšîk ðëbo owa shäryë ðëm, ga ëye tjšîya eni ðëm bakoe. 14Shji tjšîya, ðëbo owa shäryë šëyshko ga shji tjšîngga bi wotjšîk owa širë. 15Eni ga shji wotjšîk owa kuzong ga ðëbo owa ši shäryëy. E irgo ga ðëbo owa shäryëy jek këgong këgong. Pjirshko ga shji wošon, ðëbo owa ši kjîshko. 16Pjeyoga, pjãy jyãpgwëba šëba ga jšõ šëmi ðëme. 17Ðëbo pjšú ši, ðëbo pjšo bek ši, e twaga Data Sbörë bi kong uunkong. Iök šok kjopkwo go kës ši shäryaga erë. Iök ši kãšã kjšopswë ber obšë obšë îyado. Gueniyo Sböra kjšopswë ðëme. 18Shji iara beno šöng së jšõkoyo, ba tjšõkwo bek ši go. Ðëbo tjeng kës shäryara ši tjrëko ga kjrara bäm go ši shji, shji ber ba nopga baîya wšo. E irgo ga obšë kjrayde shara. 19Pjeyoga, tja kuzîa. Ëye tjšê bomi kong ga kuzî yõtso. Pjãy tjšêshko ga woyotjšîzî yõtso guing. Shji iirkëshko ga ðëye woyde Sbörë ši shäryëy šöng ðëme. E kjîshko ga shji iirkë mašing ðëme. 21E kjîshko ga ðëbo owa tjeng kës ši rayozîa. Ðëbo pjšú ðëm shäryëba ara ši shäryëy ame. Tjšõkwo šara Sbörë bomi kong, pjãy döya wšo ši, e kjrozî wotöy dey. 22Gueniyo tjšõkwo ši kumi dö ðëm, košozî bako, pjãy opjyãpgwë ðëm wšo. 23Domer shäng kjšara, opîk kjok îkkšo go. Gueniyo ga opîno pjir ga to ey dwayo, ga bokkwo sorë woyo ba kong ame. Ëye, tjšõkwo ši kuya ga koše ðëm ga e so domer e kjoyoe. 25Tjšõkwo bek ši, shji döya. Ga ëye opping ba go, ðëye kuya ši koše, ga woyotjšîya îyado ga era kjimte Sbörë e kjîshko. 26Ëye Sbö bangkjrë, Sbö tjšõkwo sök še, gueniyo tjšê owa wšeniyo ga opjyãpgwë shäng om go. Sbö poshrëya še ši tjwšõ ðëme. 27Shji Sbö bangkjrë woydë jšõkoyo ga shji woyde bi Data Sbörë jëk šöng pjšo beke. Woyde ga ðupsëngga, syãpga šöng song wšeniyo ši kjimtëy, ga shji opdë yõtso, ðëbo owa shärye nopga Sbö miydë ðëm wšeniyorë ši shäryëy ðëm wšo.

will be added

X\