Hebreos 5

1Syõshtagaga Sbö kong Israel tjëyoga kjîshko këskësyo kjrara Sbörë kjšobi nopga ši tjrëko dwayo, parkë Sbö tjok, nopga ši kong wšo, öng zröya, sho suya, ðëbo owa shäryara nopgarë ši kjîshko wšo bakoe. 2Nopga ši kjok miydë ara ðëm, ga ošö ga ðëbo shärye šok owa, dbo ara ðëm kjîshko. Eshko ga songe še syõshtagaga širë ga pjšú, epga dbo ara ðëm eni bako kjîshko. 3E kjîshko ga öng zröya, sho suya, ðëbo owa shäryara nopgarë ši kjîshko dö ðëm, shärye eni, ðëbo owa shäryara epgarë om go ši kjîshko bakoe. 4Pak ëre tjwšõ ara. Gueniyo ëye opyë pak ëre shäryë om go ðëme. Woyde ga rokaga Sbörë, Aarón rokara sorë ga eni. 5Cristo opyono pak tjwšõ ara ëre shäryë om go ðëm bakoe. Sbö tjšêno ba kong ga “Pja bor Wa; eeri ga tja öötong beno sök bop Data.” 6Ga tjšêno ba kong obi ga “Pja ber shäng syõshtaga îyado wšo, Melquisedec dik.” 7Jesús shäng kjok ëre kjing go obishko ga miyde ga Sbö dbo ara, e döya eshko dwayo wšo, wošon ðëm wšo. E kjîshko ga kjšoshtono ba kong jšõkoyo, sšatong ara boryo go. Ga Sbö bangkjrara ara kuzong ga ðëye šara ši kura. 8Gueniyo e Sbö Wa ëmdë ga ðëbo weno ba kong owa ara kjîshko ga oppino Sbö košë jšõkoyo. 9Ga ðëye woydara Sbörë shärye wšo ši shäryara uunkong pjirshko ga öötong beno sök ba košagaga uunkong ši döga, epga ber šöng së îyado wšo, 10ga iara Sbörë beno shäng syõshtaga kësbangyo, Melquisedec dik. 11Ðëbo šërwa woydë bomi kong ara ëre kjîshko, gueniyo šërwa wšo ga kjang, pjãy kä kjang kjîshko. 12Pjãy mär šöng Jesús go dbar kop ara tjän. Pjãy oppino pjšú kjwe ga eerishko ga pjãy opyono beno šöng no pingga. Gueniyo Sbö tjšõkwo kjrëmi šöng ši ðë šokšo miydëmi šöng ðëm obi. Woydëmi ga pjãy pîya obšërë tjšõkwo wêšë go eröe. Kjwozirga šöng nä ië wšeniyo, e dši uë woydë ðëme. Pjãy so e kjoyo, tjšõkwo kjang ši kumi woydë ðëm kjîshko. 13Nopga so kjwozirga šöng nä ië kjoyo ši, e jëk šöng pjšo bek sorë ši miydayde šok ðëm obi. 14Gueniyo tjšõkwo kjang ši, e dši wšeni, ga nopga so këkboga kjoyo ši, e opping ara e go, ga ðëbo pjšúre, de owa, e miyde šöng pjšúe.

will be added

X\