Hebreos 2

1Woyde ga Sbö tjšõkwo kuroy ši woyotjšîy yõtso, shji opkwë sira sira ey dwayo ðëm wšo. 2Dënashko ga Sbö tjšõkwo söra ba parkagaga kjok dogo sorë bi tjšapgaga kong, ga ðëye šara ba kong ši, e košako. Ëye omkošono ðëm ga shduna Sbörë beke. 3Shji där sorë tjšõkwoyo šira, e kësbang, wošësoe. ¿Eni ga e kjrëy ðëm ga shji shdûya eni ðëm sorëro? Tjšõkwo ëre šaga Tjšapga Jesúsdë bäm go. E irgo ga ba tjšõkwo kugaga omšono bi kong eni bakoe. Miydëy e go ga e beke. 4Ga ðëbo îydëba ðëm wšeniyo shäryara Sbörë bi kong obšë obšë, ga ba Sëya ichara kjok miydë twë bi kong, woydara Sbörë sorë ši eni. Shäryara eni, miydëy e go wšo ga tjšõkwo ši beke. 5Ðono ga dbar tjwe kjwara obšë ši šörwarë bomi kong. Eshko ga ba parkagaga kjok dogo so ie Sbörë kjok ðgwek ðëme. 6Ðëbo tak pjang Sbö tjšõkwo go, dbar šërwa šöng ši kjîshko. Tjšê ga “No tjwšõ ara ðëme. ¿Eni ga woyotjšîp ara ega? ¿Tjwšõ ara šëp ega? 7Bäm go ga iorop beno tjwšõ bop parkagaga kjok dogo so dorko. E irgo ga iorop beno kësbang, tjwšõ ara, 8iorop beno shäng ðëbo tjeng kës ši ichaga bakoe.” Miydëy e go ga ðono ga ðëbo tjeng kës ši iche no širë. Gueniyo eerishko ga ðëbo iche ðëm wšeniyo tjok obi. 9Ðëye weno Jesús tjok ši miydëy pjšúe. Bäm go ga iara Sbörë beno tjwšõ ba parkagaga kjok dogo so dorko. Ga Sbö wopjšú ši kjîshko ga ichara wošon bi kjîshko. Ga wošono kjîshko ga iara beno kësbang, tjwšõ ara. 10Ba go ga ðëbo tjeng kës ši shäryara Sbörë, ga beno tjeng ba kong uunkong. Ðëbo owa ichara wen ba kong ara. E poshäryara ber nopga ara döga wšo eni. Sbö omshäryono eni, woydara eni kjîshko, ga shäryara beke. 11Jesús, nopga iara beno tjeng dboy Sbö kong ši, e Data kjšaraso. E kjîshko ga epga šökyokjre Jesúsdë ðëm, kowe ba pjeyoga. 12Tjšêno Sbö kong ga “Bop roy šër bor pjeyoga kong. Pja poshrër ara, epga tön šöng šishko.” 13Ga tjšêno obi ga “Tja mär Sbö go.” Ga tjšêno obi ga “Tja shäng bor wapga twara Sbörë bor kong ši tjok.” 14Iara beno ba wapga ši, e nopga, ga nopga ichaga wošon ši, e Ä, ga uunkong tjeng Ä wšoshko e kjîshko. E kjîshko ga Jesús öötong beno shäng no, ga wošonoe. Shäryara eni, Ä zãya wšo, 15nopga döya Ä wšoshko dwayo wšo bako, ber šöng ba wošon ši bangkjrë ame wšo. 16Jšõkoyo ga e shrono shäng Sbö parkagaga kjok dogo so ši kjimtaga wšo ðëm, shrono shäng Abraham tjëyoga kjimtaga. 17E kjîshko ga iara Sbörë beno shäng ba pjeyoga dik, ðëbo wen ba kong šok kës ši wen ba kong eni wšo, epga sorë miyde pjir wšo. Eni ga songe še ga pjšú, ga parkë syõshtaga kësbangyo wšeni ba kjîshko ga pjšú bako, e äär ber ðëbo owa shäryara ši potjwšêkkšo wšo. 18Ga öör shäng song, tjšîna Ärë ara, ðëbo owa shäryë wšo šara kuzong ga nopga tjšîya Ärë enishko ga epga kjimte ga pjšúe.

will be added

X\