Hebreos 11

1Shji mär Sbö goshko ga ðëye îgöy ðëm ši, e koshëy, ga miydëy ga ðono ga shäryë eni jšõkoyo šëy. 2Bi tjšapgaga tek dënashko so mär ba go kjîshko ga Sbö beno wopjšú ba tjok. 3Shji mär Sbö go kjîshko ga miydëy ga kjok shäryara uunkong ba tjšõkwo go, ðëbo îy šöng ši shäryara ðëbo îgöy ðëm ši go. 4Dënashko ga Abel mär Sbö go kjîshko ga ðëbo sura ba kong pjšú, ðëbo sura Caíndë ši kjinmo. Mär ba go kjîshko ga beno pjšo bek ba bokso, ga Sbö beno wopjšú ba tjok, ðëbo sura ši tjok bakoe. Ga wošono ëmdë ga mär ba go kjîshko ga shji opping ba go ga pjšú obi. 5Dënashko ga Enoc mär Sbö go kjîshko ga to söra kjok ëre kjing go dwayo, wošono ðëme. Wšênaba ðëm, söra kjîshko. Söyde ðëm obishko ga ðëbo shäryara beno pjšú Sbö kong. 6Ëye mär Sbö go ðëm ga ðëbo shärye ber pjšú ba kong ga äe. Ëye äär Sbö shwoy wšo ga woyde ga woyotjšîya ga sök jšõe še guing, woyde ga woyotjšîya ga ëye omwšêk ga potjwšêya jšõe še guing bakoe. 7Dënashko ga Noé mär Sbö go kjîshko ga Sbö tjšêno ba kong ðëbo îyde ðëm obi ši kjîshkoshko ga tjšõkwo kjrara, Sbö bangkjrara, ga kjyong shäryara kësbang, ba pjeyoga dökkšo. Eni ga nopga šöng kjok ëre kjing go ši iara beno šöng shdûya Sbörë wšo, gueniyo Noéra iara beno pjšo bek ba bokso. 8Dënashko ga Abraham mär Sbö go kjîshko ga ichara to kjok shto obšë twe ber ba kong šishkoshko ga košara, ga to kjone miydara ðëm ëmdë ga opshino jeke. 9Ga mär Sbö go kjîshko ga öötong beno sök kjok twe ba kong šara šishko, no shto obšë so wšeni. Kjok buk kjrina kjok dogo, shäryaga Sbörë ber îyado wšo. Kjok ši koshara Abrahamdë, äär ber sök eshko wšo. E kjîshko ga sök kjok ëre kjing go obishko ga beno sök kjok shto obšë obšë u shäryak öng kwota go roshko. Ba wa Isaac, ba tjër Jacob, e omshäryono eni bako, tjšõkwo šara Sbörë Abraham kong jšõkoyo ši twara ba kong šok eni bako kjîshko. 11Ga Abraham mär Sbö go kjîshko ga tjšabšashko ga ba boy Sara kjrong ëmdë ga wa buk kjšara. Wa twe ba kong šara Sbörë ba kong jšõkoyoshko ga tjšõkwo kjrara domer širë, miydara ga ðëye še ši shärye eni îyado kjîshko. 12Eni ga šuyo ara, wošon to ëmdë ga ba tjëyo tek beno ba irgo ši shdöktong träk ðëm, dbala šok kjopkwo go wšeni, ša sho tjeng dšung kjako wšeni bakoe. 13Nopga uunkong ëre wošonoshko ga ðëbo twe Sbörë ba kong še jšõkoyo ši kjrara šok ðëme. Gueniyo mär Sbö go kjîshko ga îna šok pjola dwayo wšeni, ga beno šöng wopjšú e kjîshko. Šöng kjok ëre kjing go obishko ga tjšê oba kong ga epga om go ši shto obšë so wšeni, kjok ëre so ðëme še šöng eni. 14Miydëy e go ga to šöng kjok wšêk, ber baîya jšõkoyo wšo. 15Tek opshino kjokyo baîya ši woyotjšîyde šöng kjwe ga san jek iröng obi ga pjšúe. 16Gueniyo kjok buk kjrina kjok dogo pjšú anmoyõ wšeniyo ši wšêyde šöng. E kjîshko ga kjok shäryara Sbörë ba kong eni, ga “Pja borwa Sbö” še šok ba kongshko ga šökyokjre Sbörë ðëme. 17Abraham mär ba go jšõkoyore miyde Sbörë wšo ga ichara ba wa kjšaraso ši zrök, sho suk ba kong, ba tjšîkkšo. Bäm go ga Sbö tjšê ba kong jšõkoyo ga “Isaac tjëyo tek ber ba irgo ši ber bop tjëyo jšõkoyo eröe” še. Eni ëmdë ga mär Sbö go kjîshko ga wotjšîno ba zrök šara. 19Wotjšîk ga woshre Sbörë iröng obi ga pjšúe še, ga wšokjrara iröng obi, wošono, woshrara iröng obi wšeni. 20Dënashko ga Isaac mär Sbö go kjîshko ga tjšêno beno pjšú ba wapga Jacob, Esaú kong, ðëye wen ba kong ðono ši kjîshko. 21Dënashko ga Jacob mär Sbö go kjîshko ga wošon döröshko ga tjšêno beno pjšú José wapga kong. Eshko ga kojono shäng ba kjorkung go, ga Sbö poshrëra. 22Dënashko ga José mär Sbö go kjîshko ga wošon döröshko ga Israel tjëyoga ichara beno ba doyo sök ba tjok, epga opshik jek Egipto kjokyo dwayo dbaryo šishko. 23Dënashko ga Moisés data, mekë, e mär Sbö go kjîshko ga chida ši jnena öötong mogšo mya. Îna šok ga wošësowa, ga tjšõkwo šara pjšurë ši bangkjrara šok ðëme. 24Moisés mär Sbö go kjîshko ga öötong këguë ga kuna pjšu wa wašë širë ëmdë ga woydara ga kowëba ba wa ðëme. 25Woydara ga ber shäng wopjšú dbar kjwöbö, ðëbo owa shäryara kjîshko ðëme. Eni ga opyono beno shäng shdungoba Sbö nopga tjok shara. 26Beno shäng potjwšêya Sbörë ši koshë. E kjîshko ga ba kong ga shdungoba Cristo kjîshko ši tjwšõ ara, ðëbo tjwšõ ara tjeng Egipto kjokyo kës ši kjinmo. 27Mär Sbö go kjîshko ga to Egipto kjokyo dwayo, pjšu iirkë ba kong ši bangkjrara ðëme. Eshko ga miyde ga Sbö îgöy ðëm ši jëk shäng ba tjok. E kjîshko ga sano iröng ðëme. 28Mär Sbö go kjîshko ga Israel tjëyoga döktong tek Egipto kjokyo dwayo dbaryo shrëkkšo ši shäryara, ga nopga ichara öng wšêp ushko so zrök, ga srëng sguing u bäng bäng worbo shakkšo ši go, Israel wapga domerga bäm îyo ši zröya no pjiga širë ðëm wšo. 29Dënashko ga Israel tjëyoga mär Sbö go kjîshko ga dipzono tek Dšung Srëzrën kjwo na šëkong, jëk šöng kjok dogro kjing go wšeni. Gueniyo Egipto sopga omshäryë eni wšo šarashko ga shteno šok drete. 30Ga Israel tjëyoga mär Sbö go kjîshko ga dbar kjwobi go ga Jericó kjokyo kopjrina šok pjribri shtök öötong dbargwo kjäk (7). E irgo ga kjok ši kjëryo shäryak ak go ši dšoktong, sho ter šöno töshko. 31Eshko ga wašë shäng kjšara ko Rajab, to shäng opsoynek domerga obšë obšë kong wšeniyo. Mär Sbö go kjîshko ga kjok îgaga öötong ba shwoy ši wšokjrara. E kjîshko ga nopga Sbö košono ðëm ši zrörabashko ga era zröraba ðëme. 32¿Ðëye šër obi ga pjšú? Dbar tjok obi kjwe ga Gedeón, Barac, Sansón, Jefté, David, Samuel, Sbö tjšõkwo šagaga, e šanyotkër bomi kong bakoe. 33Mär Sbö go kjîshko ga ðëbo shäryara ba kong obšë obšëe. Kjone kjone ëngkjwono pjšupga dbo ara wšeniyo tjok, ga zanae. Kjone kjone nopga ichono pjšo bek. Kjone kjone, ðëbo twe Sbörë ba kong šara jšõkoyo ši kjrara. Kjone kjone dbong kjamo ðino. 34Kjone kjone, iök pjë jong träk ðëm ga sjëra. Kjone kjone zrökoba dröng go šëbashko ga döktonge. Kjone kjone dbo ðëm ga öötong beno dbo ara. Kjone kjone ëngkjwëshko ga dbokjrono ara. Kjone kjone, ëngkjwagaga shto obšë so zana songe. 35Wašëga kjone kjone, ba pjeyoga wošono ši woshrono iröng obi. Kjone kjone shdunaba ara, ga zröraba, gueniyo opdök woydë ðëm, ðono ga woshre Sbörë iröng obi ši ber pjšú anmoyõ ba kong wšo. 36Kjone kjone šãywaraba owa, shporaba no shpokkšo go bakoe. Kjone kjone pjriraba dröng sho go, iaraba beno šöng kjërshko. 37Kjone kjone zröraba ak go. Kjone kjone zaraba tas do worbëshko. Kjone kjone zröraba dröng go. Kjone kjone to šöng ðaw pogo, doyono öng kwota go, dbur ðëm, shdunaba ara, wosong îyado. 38Nopga eniyo tjwšõ ara, nopga Sbö miydë ðëm wšeniyo ši kjinmo anmoyõ. To šöng kjok dogro no ðëmshko, dšup go bakoe. Beno šöng guëng jong ööng roshko, kšung ööng roshko bakoe. 39Nopga uunkong ëre mär Sbö go kjîshko ga Sbö beno wopjšú ba tjok, gueniyo ðëbo twe Sbörë ba kong šara jšõkoyo ši kjrara ðëme. 40Shäryono eni, woydara Sbörë ga ðëbo ber bi kong pjšú anmoyõ kjîshko. Epga ie woydë ber pjšo bek ba bokso, gueniyo ie woydë ber eni bi tjok bakoe.

will be added

X\