Hebreos 1

1Dënashko ga Sbö tjšêno ba tjšõkwo šagaga obšë obšë kong, še šok bi tjšapgaga kong wšo. Tjšêno eni kop ara, ga tjšêno obšë obšë bakoe. 2Gueniyo ga dbar pjir šë dbaryo eerishko ga ba Wa ichara tjšêno bi kong om go shara. Ba Wa ši go ga kjok shäryara Sbörë uunkong, ga ðono ga ðëbo tjeng kës ši ber baîya. 3Ba dbo kãšã, e so Sbö î kjoyo, e so e kjoyo kjîshko. Ðëbo kës tjeng ba wšoshko, ga iche ba tjšõkwo dbo ara ši go, srer ðëm wšo. E wošono, ðëbo owa shäryara nopgarë ši potjwšêkkšo. E irgo ga öötong beno sök Sbö orkwo këšëkong kjok dogo. 4Eni ga öötong sök tjwšõ ara, Sbö parkagaga kjok dogo so kjinmo, ga ba ko tjwšõ ara ba kjinmo bakoe. 5Miydëy eni, ðëbo šara Sbörë ba kong ši kjîshko. Tjšêno ga “Pja bor Wa; eeri ga tja öötong beno sök bop Data.” Šara eni ba Wa kong, gueniyo šara ba parkagaga kjok dogo so kong eni ðëme. Ga tjšêno obi ga “Tja ber sök ba Data; era ber sök bor Wa.” 6Ga ba Wa ši ichara kjok ëre kjing goshko ga tjšê ga “Bor parkagaga kjok dogo so, bor Wa, e poshrëzî uunkong.” 7Ga tjšêno ba parkagaga kjok dogo so kjîshko. Tjšêno ga “Ba parkagaga kjok dogo so, e shäryara beno so pjšuk kjoyo, so iök kjoyo bakoe.” 8Gueniyo tjšêno ba Wa kong ga “Pja Sbö, pja ber sök no pjšuyo îyado wšo, ga kjok ðgwep beke. 9Ðëbo pjšú shäryëbashko ga pja wopjšú eshko. Gueniyo ðëbo owa shäryëbashko ga pja woydë ara eshko. E kjîshko ga pja ioror beno sök wopjšú, bop pjeyoga šöng kës ši kjinmo. Tja bop Sbö jšõkoyo.” 10Ga tjšêno ba kong obi ga “Tjšapga, kjok ëre dämärshko ga kjok uunkong shäryaga pjarë, kjopkwo, kšung bakoe. 11Ðëbo kës ëre pjir, gueniyo pjara ber sök îyado. Shwong këguëshko ga dbuy, ðëno ame kjîshko. Pja opshäryë ðëbo kës ëre tjok eni wšeni. Gueniyo pjara kjšopswë ðëm, pja ber sök îyado.” 13Ga tjšêno ba kong obi ga “Pja tek wšar ber sök bor orkwo këšëkong, äär jong bop moskwoga zanor pjir guing, eshko ga iër ber tjeng bop wšoshko.” Šara eni ba Wa kong, gueniyo šara ba parkagaga kjok dogo so kong eni ðëme. 14Epga sëyaga to šöng parkë Sbö kong eröe. Ga epga iche nopga där wšo ši kjimtë.

will be added

X\