Colosenses 2

1Tja shäng parkë kjang bomi kjîshko, Laodicea sopga kjîshko, nopga obšë tja îyde šok ðëm wšeniyo kjîshko bakoe. Šër bomi kong eni, miydëmi wšo. 2Tja parkë eni, epga dbokjrë wšo, ëng woydë ara kar kar îyado wšo bakoe. Woydër ga tjšõkwo ši ðë šokšo miyde šok pjir, e jyõ še šok ðëm wšo, Cristo miyde pjšú wšo. Tjšõkwo jnena Sbörë tek dënashko dwayo ši e. 3Sbö kjok miydë ši tjwšõ ara. E miyde šok Cristo go eröe. 4Šër bomi kong eni, tjšõkwo wošëso wšeniyo šëba bomi kongshko ga pjãy jyãpgwëba e go ðëm wšo. 5Tja shäng bomi tjok eshko ðëm, gueniyo pjãy woyotjšîn îyado. Roy kuror ga pjãy uunkong wotjšîk no kjšaraso wšeni, pjãy mär šöng Cristo go jšõkoyo bakoe. Tja wopjšú e kjîshko. 6Cristo Jesús wšokjroromishko ga e ioromi beno shäng bomi Tjšapga. Eni kuzong ga woyde ga pjãy mär ber šöng ba go îyado. 7Pjãy mär ber šöng mämä ba go jšõkoyo, pjãy oppino sorë ga eni, ga pjãy mär ba go jek këgong këgong. Pjãy ber šöng wopjšú Sbö tjok îyado bakoe. 8Kjone kjone mär šöng tjšõkwo obšë obšë go. Tjšõkwo ši, nopga kjok ëre so sgara beno šöng mär ba go, gueniyo e jyõ, e šaga Cristorë ðëme. Pjãy sjëk tjšõkwo eniyo šagaga ši tjok, pjãy jyãpgwe šok ðëm wšo, pjãy iche ber šöng ba tjšõkwo baîya ši go ðëm wšo. 9Cristo go Sbö beno pjang kësbang ba tjok, îgöy wêšë wšo. 10Ga pjãy Cristo nopga kuzong ga ðëye woydëmi dö ši twara beno tjeng bomi kong pjir tjän. E sëya ðë dbo ara wšeniyo kägäyo, obšë ichagaga wšeniyo kägäyo bakoe. 11Pjãy töno beno tjeng Cristo tjok kuzong ga pjãy jyã tak šöng pjire. Nopga doyo jyã tëshko ga ba sho ši ze šok tas sira. Gueniyo pjãyda jyã tak eni ðëme. Pjãy jyã te Cristorë wšo ga bomi wotjšîk owa ši kjara pjire. 12Pjãy waraba jer di roshkoshko ga pjãy wošono to Cristo tjok wšeni. Cristo woshrara Sbörë iröng obi, ba dbo ara go. Ga pjãy mär Sbö dbo ara go kjîshko ga pjãy opshik tëm di roy dwayoshko ga pjãy woshrara iröng obi Cristo tjok wšeni bakoe. 13Bomi wotjšîk owa ši kjayde Cristorë ðëm obishko ga pjãy wošono šöng wšeni, bomi owa ši tjok. Gueniyo eshko ga pjãy iara Sbörë beno šöng Cristo tjok, së wšeni. Eshko ga owa pjang bi go ši šöna beno drete. 14Dënashko ga shji pogo tjwšõ ara, ðëbo owa shäryoroy ši kjîshko. Gueniyo e kjara Sbörë bi kong, šöra beno pjang kjšös go wšeni. 15Cristo wošono pjang kjšös goshko ga sëya ðë dbo ara wšeniyo, obšë ichagaga wšeniyo, ba dbo ši döra Sbörë pjire. Epga zana beno šöng song, oba uunkong bokshto. 16Eni ga ðëbo uako, iako ðëm šëba bomi kong ga jšõ šëmi ðëme. Pjãy ichëba dbar ðë shrëk Sbö kong ga jšõ šëmi ðëm, mok mite dbaryo, woshtozšong dbaryo ëmdë ga jšõ šëmi ðëm bakoe. 17Cristo tjwayde ðëm obishko ga ðëbo uunkong ëre tjwšõ ara, beno ëye tjwe še ši jyãgšo kjîshko. Gueniyo Cristo shrono öör tjän kuzong ga kjok ðgwekkšo uunkong ëre beno tjwšõ ame. 18Kjone kjone to šöng tjšê ga “Woyde ga shji opyë šöng wotöshko, Sbö parkagaga kjok dogo so poshrëk wšo. Ðëm ga shji ðëbo owa shäryono” še šöng eni. Gueniyo jšõ šëmi ðëme. Ba wotjšîk owa ši kjîshko ga krë šok ara, tjšê ga “Sbö tjšõkwo šono borwa kong” še, ga mär šöng e go. Miga jyõ erä. 19Epga mär šöng Cristo go ðëme. Bi doyo iche bi kägärë sorë ga shji Cristo tjšõkwo kjragaga iche Cristorë eni bakoe. Eni ga shji no kjšaraso wšeni. Shji mär šöng ba go, ga shji kong dbo twe Sbörë, ðëye woyde ši shäryëy wšo. 20Pjãy wošono Cristo tjok wšeni kjîshko ga pjãy beno šöng ichaga kjok ðgwekkšo kjok ëre so širë ame. ¿Eni ga pjãy jëk šöng kjok ðgwekkšo ši košë wšeni ega? 21Kjok ðgwekkšo tak šok ši tjšê ga “Ðëbo kjwe kjrëy bi wšoshko ðëme. Ðëbo kjwe uëy ðëme. Ðëbo kjwe porwëy ðëme.” 22Ðëbo tjeng kës ëre pjir drete. Ga kjok ðgwekkšo uunkong ëre šaga norë eröe. 23Shji jëk šöng bi wotjšîk owa ši go ðëm wšo ga shji iche kjok ðgwekkšo ërerë drön ara, shji iche ber šöng wotöshko wšeni, gueniyo shji wotöshko jšõkoyo ðëm, bi doyo, e shdûya ara bakoe. E kjîshko ga kuy ga kjok ðgwekkšo ëre šagaga kjok miydë ara. Miga shji kjimte kjok ðgwekkšorë bi wotjšîk owa ši rayë ðëme.

will be added

X\