Hechos 28

1Eshko ga tjawa kayo döktong pjono šöng pjöshko uunkong irgo ga miydororwa ga dšung tjrëko ši ko Malta. 2Kjok eshko ši noyo tjok, ga tjawa dara yõtso tjë jîkong. Eshko ga shunyo shrë pjang ara, smo ara bakoe. Eni kuzong ga iök boktöna šok, ga tjawa rokara uunkong ba zšong bäng, iökkok eshko wšo. 3Eshko ga Pablo šöng dogro töno kjšöbö, ga dbuya shäng iök ši roshko. Eshko ga iök ši kjšik ara kjîshko ga dgur brik buk eshko kjšara, ga Pablo uara ba orkwoshko, ga dgur ši beno pjang šing ba orkwo go. 4Îya kjok eshko sopgarë ga tjšê šok ëng kong ga “Domer kjwe owa, no zrök ä wšeniyo dikjoyoe. Döktong tek dšung kjing kjok owashko dwayo ëmdë ga bi sbö shäng kjšara kowëy Kjok Ðgwega Bek ši, domer kjwe woyde ber shäng së ðëme” še. 5Gueniyo ga dgur ši sringza Pablorë buk iök pjë jong ri ri ši roshko, ga ðëye shäryono Pablo kong ðëme. 6Eshko ga šöng tjë jîkong ši wotjšîno ga “Kjwe orkwo dguë jekdo, ðëm ga jek buk rish wošon jekdoro” šara. Gueniyo koshe šöng kjër ga dguë sira ðëme. Îya šok ga ðëye shäryë ba kong ðëm ga wotjšîk šok obšë, tjšê šok ga “Bi sböpga kjšarayo ši kjwe” še. 7Dšung tjrëko eshko so ichaga ko Publio. Ga tjawa tjyono šöng šishko ga kjok ber buk soshko kjrina baîya. Eni ga tjawa wšokjrara, dara yõtso ba ushko dbargwo mya. 8Eshko ga Publio data buk swšo ara ba bukkšo kjing go, kjšik ara, roshkwë ara bakoe. Eni ga Pablo jek öötong shäng ba îk. Eshko ga syõshtono Sbö kong ba kjîshko. E irgo ga orkwo iono ba kjing go, ga poptara beno pjšúe. 9Roy kuya swšopga tjeng dšung tjrëko obšërë ga shrono šöng Pablo shwoy uunkong, ga poptara pjire. 10Eni ga kjok eshko sopga beno šöng woowa ðëm borwa kong. E kjîshko ga tjawa kong ðëbo twara arae. Ga tjawa brikshko ga ðëbo woydororwa borwa kjimtokšo irbo wšo ši, e twara šok borwa kong pjire. 11Eshko ga kjyong kësbang pjang kjšara tek Alejandría kjokyo dwayo, pjang kjok owa jek pjir ši koshë. Kjyong ši pogšo go ba sböpga do pjök ši jyãgšo tak šok. Ba sböpga ši kowe šok Cástor, Pólux. Eshko ga tjawa šöng dšung tjrëko ši öötong mogšo myashko ga tjawa opyono kjyong ši roshko, ga tjawa opshino to dšung tjrëko ši dwayo. 12Ga tjawa jek öötong šöng kjyong tjyozšong kjokyo ko Siracusa, ga tjawa beno šöng eshko dbargwo mya. 13E irgo ga tjawa jek šöng dšung sor go jek äär šöng Regio kjokyo. Wêshko ga pjšuk tjwe jong borwa irgo, ga tjawa opshino toe. E wêyo obi ga tjawa jek öötong šöng Puteoli kjokyo. 14Eni ga tjawa opshino kjyong roshko dwayo. Eshko ga pjeyoga Jesús tjšõkwo kjraga wšênorwa šöng kjšöbö, ga tjawa mana ber šöng ba tjok sondë kjwara wšo še, ga tjawa beno šönge. E irgo ga tjawa opshino to jek Roma kjokyo pjö šëkong. 15Eshko ga tjawa roy kura pjeyoga Jesús tjšõkwo kjraga šöng Roma kjokyo širë tjän. Eni kuzong ga kjone kjone opshino jer šöng borwa koshë irbo. Kjong kjong jer šöng borwa koshë ðëbo soynezšong shtoyo ko Apio, kjong kjong jer šöng kjok kjrina obi, oba pozšong uyo šok mya šishko. Ga jer šöng borwa koshaga ši îya Pablorë ga beno shäng wopjšú, dbokjrono jek obi, ga tjšê Sbö kong ga “Tjawa kjimtorop kësbange. Tja wopjšú bop tjok” še. " Ga epga jek iröng borwa tjok. 16Tjawa öötong šöng Roma kjokyo ga kjok ðgwegaga šöng eshko ši, Pablo iara šok beno shäng no shdûzšong uyo roshko ðëme. Kong u wšêna kjwara, iara beno sök eshko tjoksa, daga beno shäng ba tjok kjšara erä. 17Öötong dbargwo mya ga judíoga šöng Roma kjokyo tjwšõ këskës wšeniyo ši mana Pablorë tek ba shwoy. Ga töno shrono šöng ba shwoy ga Pablo tjšê ba kong ga " “Pjeyoga, ðëye shäryoror owa bi pjeyoga judíoga kong ðëm, bi tjšapgaga tek dënashko so sdëkwo wšoyo ðëm bakoe. Gueniyo ga tja sharaba shäng Jerusalén kjokyo, ga tja twaraba beno tjeng Roma sopga wšoshko, tja shdûya šok wšo. 18Eshko ga tja kong ðëbo kjakrokara šok ara, ga ðëye wšêna bor tjok, tja ber zrökko wšo ðëme. E kjîshko ga tja raye šok woydë. 19Gueniyo ga woydara judíoga širë eni ðëm, ga tjšêno šok ara bor wšoyo. E kjîshko ga tja ðëye shäryër wšo ame, ga rokoror Roma so ši kong ga tja ðgweya pjšu kësbangyo sök Roma kjokyo širë om go šoror eni, ga tja ichara šok tek na e kjîshko. “Eni gueniyo ga tja tek shäng bor pjeyoga rotaga tjšapgaga ši kong ðëme. 20E kjîshko ga pjãy manor, pjãy în wšo, shji šan ëng tjok wšo bakoe. Woydoror ga pjãy ommiydë pjšú ga no pjšuyo iche še Sbörë koshëy shji Israel tjëyoga uunkongdë šöng ši, koshër shäng ši e. Tja pjrik shäng na dröng sho pjang ëre go, tja parkë ba kong kjîshko” še. 21Kuya šok ga tjšê ba kong ga “Tjawa kong kjibokwo ichayde šok tek Judea kjokyo dwayo bop kjîshko ðëme. Pjeyoga judíogara shrono tek ey dwayo ëmdë ga ðëye šayde owa bop kjîshko borwa kong ðëm bakoe. 22Gueniyo miydërwa ga kjone pogo ga oba tjšê ara nopga tjšõkwo kjragaga šöng bopoya dik ši wšoyo. E kjîshko ga pja wotjšîk ðë miydërwa woydë” še. 23Eni ga dbar iara šok beno jong kjwara, tön ëng tjok obi wšo še. Dbaryo öötong ga nopga töno ara Pablo sök šishko. Kjok shröngteng äär jong kjok sëng go ga Sbö ber no pjšuyo sorë ši roy šara ba kong ara. Ga ðëye šara Moisés, Sbö tjšõkwo šagagarë tek dënashko ši, e pjšoðgwera ba kong, no pjšuyo iche šara Sbörë ši, e Jesús jšõe še šok wšo. 24Kuya šok ga kjong kjong Pablo tjšõkwo kjrono, gueniyo ðamora omtjšõkwo kjrë woydë ðëme. 25Eni ga woyotjšîya beno šöng kjrinaso ðëm kuzong ga opshik toe še šöng. Eshko ga Pablo tjšêno ba kong, pjir wšo. Tjšê ga “Dënashko ga tjšõkwo šara Sbö Sëyarë ba tjšõkwo šaga tek dënashko so Isaías kong, še bomi tjšapgaga šöng ši kong wšo. Ga tjšõkwo šara pjšo beke. Tjšêno beno eni: 26”“Pja nom tjšê bor nopga ëre kong ga ‘Kumi šöng kjër ga ðë šokšo miydëmi šöng ðëme. Îmi šöng kjër ga ðë îgömi ðëme’ šëp ba kong eni. 27Nopga ëre, ðëye kuya woydë ðëme. Kwomgwo bäng bängzak šok tuke. Bokkwo ðino šok tuk bakoe. Shäryara eni, ðëbo îya šok ba bokkwo go ðëm wšo, ðëbo kuya šok ba kwomgwo go ðëm wšo, opping šok sira ðëm wšo, optwë bor kong ðëm wšo, epga dör ðëm wšo bakoe.” 28”E kjîshko ga woydër ga miydëmi pjšú ga no döya Sbörë ši roy beno nopga judío ðëm wšeniyo kong bako tjän, ga epga omkjrë” še. 30Eshko ga Pablo beno shäng eshko ba daga shäng ši tjok šu pjšogšo pjök ba u jong potjwšêya î ši roshko. Nopga tjwe kjšobi ba îk ga wšokjre enidoe. 31Ga Sbö ber no pjšuyo sorë ši roy šara oba kong ara, ga šara Tjšapga Jesucristo kjîshko ara bakoe. Tjšêshko ga ðëye bangkjre ðëm, ga barwaga ërë ðëm bakoe.

will be added

X\