Hechos 27

1Woyotjšîna tjšapgaga širë pjir ga tjawa iche jek jongya Italia kjokyo wšo šeshko ga Pablo, e twara šok ëngkjwagaga ara kägäyo kjšara kong, de wšo. Domer, e ko Julio. E ëngkjwaga parkë šöng pjšu kësbangyo sök Roma kjokyo ši daga wšeniyo. Ga kong nopga obšë shdung šöng eshko, e twara šok, de wšo bakoe. 2Eshko ga kjyong pjang kjšara kësbang jek äär Adramitio kjokyo dwayo brik pjang kjwšë jongya Asia kjyong tjyozšong shtoyo kjrinashko kjrinashko še, ga tjawa opyono e roshko, ga tjawa opshino toe. Aristarco jek shäng borwa tjok bebi, e Tesalónica so. Tesalónica kjokyo, e Macedonia kjokyo obi. 3Wêshko ga tjawa öötong šöng kjyong tjyozšong kjokyo ko Sidón. Eshko ga Pablo songe še Juliorë, ga rayara to ba pjeyoga wšeni šöng eshko ši îk, kjimte šok wšo. 4E irgo ga tjawa opshino to Sidón kjokyo dwayo. Eshko ga pjšuk tjwe jong dbo ara dšung buk kës ši shwo šëkong, ga tjawa bakwe jong iröng eröe. E kjîshko ga tjawa to jek dipzono dšung tjrëko ko Chipre, e pjšor dew šëkong pjšuk ara ðëmshko. 5E irgo ga tjawa dipzono jek dšung buk Cilicia kjokyo, Panfilia kjokyo, e bokshto, kjwo kašëkong, ga tjawa tjyono öötong šöng Mira kjokyo, e Licia kjokyo obi. 6Eshko ga kjyong wšêna ëngkjwaga kägäyo širë pjang kjšara obšë kësbang jek äär Alejandría kjokyo dwayo, brik pjang kjwšë jongya Italia kjokyo še. Eni ga tjawa opyono e roshko ba tjok, tjawa jek këgong shara wšo. 7Dbar kjwöböso ga pjšuk ara kjîshko ga tjawa jëktong kjyong ši go wor, ga pakyo ara, eni ga tjawa jek öötong šöng Gnido kjokyo gomyo. Ga tjawa jek bek šororwa, gueniyo tjawa bakwe pjšukdë ara obi kjîshko ga tjawa dipzono jek dšung tjrëko pjang kjrina obi ko Creta, e pjšor dew šëkong pjšuk ara ðëmshko, kjok ko Salmón ši bokshto. 8Ga tjawa jek šöng, gueniyo dšung sor go soyo arae. Eni ga tjawa jek äär šöng kjok buk kjrina kowëba Kjyong Tjyozšong Shtoyo Pjšúshko, Lasea kjokyo buk ba soshko. 9Eshko ga tjawa barwara pjšukdë ara kuzong ga dbar to jek kop ara tjän. Shji ië ðëm Sbö kong dbaryo shrëya judíogarë ši, e to jek tjän, ga miydororwa e go ga kjok owa shunyo shrë ara dbaryo ši döröe. Kjok eni ga dšung iirkë arae. E kjîshko ga shji jek dšung kjing go ga shji sjëke. Eni ga nopga jek šöng ši poshduna Pablorë, tjšê ga 10”Domerga, în ga shji jek šöng ëre kong ðëbo wen owa, shji kjyong kësbang ëre jer bi shjiryo, bi ðëbo tjeng kës wše tjok. Erö ðëme. Shji ëmdë ga jer bakoe. Shji ber šöng na dey” še. 11Gueniyo ga kjyong tjyozšong shtoyo eshko ši, kjok owa dbaryo ga shji šöng shto eshko ga pjšú ðëme. E kjîshko ga kjyong sogo ši, ba kjyong söga shäng ši, e tjšê šok ëngkjwaga kägäyo ši kong ga “Shji jek dey” še. Nopga ðamo šöng kës ši wotjšîk jong e kjoyo bakoe. Tjšê šok ga “Shji opshik jûshko dwayo dey. Tjšîy, shji jek Fenice kjokyo ga buere îy wšo. Eshko ga kjok owa dbaryo ga shji šöng shto eshko ga pjšúe” še. Fenice kjokyo, e kjyong tjyozšong kjokyo buk Creta kjokyo obi. Eshko ga dšo jer shwo šëkong ši îy ga wêšëe. Kuya Juliorë ga tjšõkwo baîya šok ši košara, Pablo î šira košara ðëme. 13Eshko ga pjšuk ši tjwe jong dšung buk kës shwo šëkong, gueniyo wore. E kjîshko ga wotjšîk šok ga “Shji to ga bue” še. Eni ga ba dröng sho kjyong shakkšo kësbang šona jer dšung roshko ši shira šok tëm kjyong ši roshko iröng obi, ga tjawa opshino jek šöng dšung tjrëko Creta ši kjako. 14Gueniyo wop tjok ga pjšuk tjwe jong kjrina obi, dšung tjrëko ši shwo šëkong shara, dbo ara anmoyõ, pjšuk ši kowëba Nororiental, 15ga tjawa bakwara arae. Eni ga kjyong kësbang ši bojonwa ber buk pjšuk ši shwo šëkong šërwa ga äe. E kjîshko ga kjyong ši rayorowa söya pjšuk širë om go äär kjone ga eshko. 16Ga tjawa söra to jek dšung tjrëko buk chirawa ko Cauda pjšor dew šëkong. Eshko ga pjšuk dbo ara ðëme. E kjîshko ga kjyongwa chirawa sörwa pjang kjšara ši irgo kjro go, e poyonwa jem kjšara ši roshko šërwa. Ga tjawa kong pak twara ara, gueniyo ga poyonorwae. 17E irgo ga kjyong kësbang ši doyo pjrira domerga širë šok tuk, war ðëm wšo še. Eshko ga tjšê šok ëng kong ga “Shji söya pjšuk kjwerë jek äär jong bo buk kjweshko ko Sirte šishko. Kjweshko ga kjone kjoneshko ga ro chira, ga shji kjyong pjë, war bi shjiryo” še eni, ga bangkjrara šok arae. E kjîshko ga shwong kjoyo shtëgro ara pje šok pjang kjomo pjšuk shakkšo kjyong jëk wšo ši, e šona šok ter töshko, söya pjšukdë jek eshko ðëm wšo, ga kjyong ši rayara šok söga pjšukdë om go shara. 18Wêshko ga dšung kjing go ši pjšuk ara obi, tjawa bakwe dbo ara îyadoe. Eni ga kjyong sögaga kjarga šöng ba ðëbo söya tjeng soynekkšo kës ši dbuk šok jer dšung roy. 19Wêshko ga ba orkwo om go ši goshko ga shwong kjoyo shtëgro ara ši dbura šok jer dšung roy, kjyung sho ðë, kjor ðë kjyong shakkšo ðë ši tjok bakoe. 20Dbar kop ara ga kjok owa owa, pjšuk tira ðëm dšung kjing go, dšung iirkë arae. E wopro ga dšo wen ðëm, dbala ëmdë ðëm bakoe. Eshko ga tjawa to jek šöng kjone miydërwa sira ðëm, ga tjawa där, e koshërwa ame, e woyojerorwa pjire. 21Eshko ga tjawa šöng ioydë ðëm dbar kop ara tjän. Eni kuzong ga Pablo kojono shäng nopga šöng ši tjrëko, ga tjšê ga “Domerga, shji šöng Creta kjokyo obishko ga tja košoromi kjwe ga shji to šöng song jûni ðëm, ga bomi ðëbo jeno bomi shjiryo ðëm bakoe. 22Gueniyo eni tjok ga rokër bomi kong ga pjãy dbokjrozong. Ëye šöng jûshko ga wošon kjšara ðëme. Gueniyo kjyong kësbang ërera jer bi shjiryo. 23Sbö, e bor sogo, ga tja parkë shäng ba kong îyado. Šuna shkëyo ga ba parkaga kjok dogo so ichara weno shäng bor kong kjšara, 24ga tjšê bor kong ga “Pablo, ðëye bangkjrëp ðëme. Pja jongya pjšu kësbangyo sök Roma kjokyo ši bokshto, pja ðgweya wšo. Bop kjîshko ga nopga šöng kjyong kësbang roshko kjšobi kjwe wošon ðëm, döya Sbörë uunkong” še. 25E kjîshko ga pjãy dbokjrozong. Sbö, e koshër ga shji kjimte jšõkoyo, šara ba parkaga širë bor kong sorë ši eni. 26Gueniyo ga shji söya pjšukdë äär dšung tjrëko pjang kjrina, ga kjyong ëre pjë dšar ber buk eshko” še. 27Eshko ga öötong dbar sak kjwara kjingsho pkëng (14) ga tjawa bakwe pjšukdë jek šöng dšung ko Adriático ši kjing go obi. E shkëyo kjok rong dik ga kjyong sögaga ši tjšê ëng kong ga “Shji ääto pjöshko dikjoyoe” še. 28Ga dšung ši ro kjöm, e tjšîna šok ba tjšîkkšo go, ga beno ro wop orkwo jyãgšo pjšogšo sak kjwong (80). Wop tjok obi ga tjšîna šok jek obi, ga beno ro wop orkwo jyãgšo pjšogšo sak tjer (60). 29Eshko ga bangkjre šok ara, pjë ak go še, ga dröng sho kjyong shakkšo këskës šona jer dšung roshko kjwo pkëng (4) kjyong si šëkong, kjyong ši jëk ame wšo. Eni ga beno šöng eshko syõshtë, epga kjok shrän šöng së obi wšo še. 30Eni ga kjyong sögaga ši tök woydë kjyong ši roshko dwayo še, ga opyorgö šöng kjyong chirawa ši šong jer dšung kjing kjyong kësbang ši ne šëkong. Shäryara eni, dröng sho kjyong shakkšo šõya wšo šara, miga tök wšo še. 31Gueniyo eshko ga Pablo tjšêno ëngkjwagaga šöng ši kong, ba kägäyo ši kong bakoe. Tjšê ba kong ga “Kjwepga kjwe ber šöng kjyong kësbang ëre roshko ðëm ga pjãy där ðëme” še. 32Eni ga kjyong chirawa šõya kjyong sögagarë šöng ši, e kjyungyo zara ëngkjwagaga širë tas tas, jer šono dšung kjing go, ga jenoe. 33E irgo ga kjok shränto ga Pablo tjšê nopga šöng eshko uunkong kong ga “Öötong dbargwo sak kjwara kjingsho pkëng (14) tjän ga pjãy šöng woydë, ga pjãy ioydë ðëm bakoe. E kjîshko ga rokër bomi kong ga pjãy ios sira. Pjãy šöng së wšo ga woyde ga pjãy ië. Eni ga pjãy wošon kjšara ðëm, bomi käkzong ëmdë ga jer pjšara ðëm bakoe” še. 35Šara eni pjir ga pjšung shosho suk pjir kjrara tjeng kjwara ba wšoshko, ga syõshtono Sbö kong, tjšê ga “Dši ëre tworop borwa kong. Tjawa ber wopjšú bop tjok e kjîshko” še nopga tjeng kës ši bokshto. Eni ga tora bëy ga uarae. 36Îya uunkong širë ga wokjankono, ga iono šok bakoe. 37Tjawa šöng kjyong ši roshko uunkong ga dogšo sak dbäw pjšogšo pjök kjingsho sak kjäk kjingsho tjer (276). 38Ga iono šok woydara bayo kjöm ga eni. E irgo ga pjšung shosho söya tjeng kjyong roshko kës ši dbura jer dšung roy dret, kjyong ši wënyë wšo še. 39Kjok shräno pjir ga tjawa šöng kjokyo kjone miyde kjyong sögaga širë ðëme. Gueniyo îya šok ga bo jem buk eshko kjrina, ša sho tjok. Eni ga wotjšîk šok ga “Kjyong ëre tjyëy këgo sit ga buere îy” še. 40Ga ba dröng sho kjyong shakkšo këskës šona jer tjeng dšung roshko ši, e kjyungyo zakza šok tas tas beno tjeng dšung roshko eshko. Ga ba kjšongkwang šok si šëkong ba ðgwekkšo ši kjyungyo döra bakoe. E irgo ga shwong kjoyo pjšuk shakkšo ši, e poyona šok kara ba kjyong ši ne šëkong, bakwe pjšukdë jek këgong pjöshko wšo šara. 41Gueniyo to jek jong ša sho töno tjeng dšung roshko ši bët ga kjyong ši ðiktong beno buk ša sho ši roshko. Eshko ga ne šëkong ši ðiktong beno jong wir ame, ga si šëkong ši, e shpoya dšung pjšubšunyorë ara, ga dšoktong kjwangyo dboy dboye. 42Eni ga ëngkjwagaga ši tjšê ëng kong ga “Nopga dëy, söy tjeng kjwe zröy dret dey, ðëm ga ichëy jek wë î ga tök šok drete” še. 43Gueniyo woyde ba kägäyo širë ga Pablo zröya ðëme še, ga tjšê ëngkjwagaga ši kong ga “Wêyê, zröy ðëme. Ëye wë pjšú ga optë jer dšung roy bäm go, jek wë î äär pjë jong pjöshko. 44Ðamo šöng obšë jek kjorkwang kjing go, ðëm ga kjyong dšoktong kjwangyo go bakoe” še. Eni ga tjawa kayo döktong pjir, öötong pjöshko beno šöng së uunkong.

will be added

X\