Hechos 24

1Öötong dbargwo shkëng (5) ga syõshtaga kësbangyo ko Ananías ši öötong shäng kjok eshko, judío tjšapgaga kjok ðgwega wšeniyo kjong kjong tjok. Ga domer jek söra šok shäng kjšara obi ba tjok ko Tértulo. E Pablo rotaga, ba ðamo šöng ši kjîshko wšo še. Eni ga epga jek öötong šöng no ichaga ši shwoy, Pablo rotë wšo. 2Ga Pablo rokara tjšapga širë, ga söya šok tjwe shäng ba bokshto. Eshko ga Tértulo omrotë, tjšê Félix kong ga “Tjšapga no ichaga, pja tjwšõ kësbange. Eeri ga öötong šu pjšogšo ara tjän ga tjawa šöng wšêp, wopjšú bop kjîshko, ga bop kjok miydë ši kjîshko ga ðëbo shäryorop ara kjok ëreshko beno pjšú, owa ðëme. 3E kjîshko ga tjawa šöng wopjšú bop tjok. Enido kjone pogo ga pja roy šãywe borwa pjeyogarë pjšúe. 4Gueniyo pja dbar jerwa ara ðëm wšo ga rokërwa bop kong ga tjawa tjšê ši kus sira. 5”Domer kjwe miydororwa ga kjwe owa. To shäng kjok kjwang jîkong judíoga barwë ara, shdöya wšo še. Nopga šöng kjok ëreshko kowëba nazarenoga, domer kjwe ba kägäyo. 6Borwa Sbö u ši ëmdë ga ie ber jong dboy Sbö kong ame wšo šara, ga sharorwa eshko e kjîshko. Eni ga kjakrokos pjarë om go ba kong. Miydëp e go ga tjšõkwo šërwa šöng ba kjîshko kës ši, e jšõe” še. 9Eshko ga judíoga šöng ši tjšê ga “Eni jšõe” še šok eni. 10Eni ga tjšapga ši orkwo pingö Pablo bët, pja tjšêzong šokšo wšeni, ga Pablo tjšê ga “Miydër pjšú ga pja parkë sök jûshko no ðgwega šu pjšogšo ara tjän. E kjîshko ga tja opwšikë bop bokshto wšêpe. 11Eni ga tja tjšê ši jšõre miydëp woydë ga kjakrokëp ë pogo kong om go ga pjšúe. Eeri ga öötong dbargwo sak kjwara kjingsho pjök (12) ga tja öötong shäng Jerusalén kjokyo, Sbö poshrëk wšo. 12Eshko ga tja wšêna šok shäng tjšõkwo kjšopswë kar kar ëbo tjok ðëme. Ëye shdöror ðaw pogo ðëme. Sbö u zšong bäng ga ðëye shäryoror ðëm, judíoga syõ uyo roshko ðëm, shto obšë ðëm bakoe. 13Tja rote šok ši ðëbo wšêna jšõkoyo bor shdungko wšo drete. 14”Gueniyo šër jšõkoyo ga nopga jëk šöng Irbo Tjagšën ši go sorë ga tja omshäryë shäng eni. E kjîshko ga bor rotagaga šöng kjwe tjšê ga tja jëk shäng Sbö tjok bëy ðëme še, gueniyo borwa tjšapgaga tek dënashko so Sbö ši, e poshrër, kjok ðgwekkšo tara Moisésdë ši, e jšõe šër uunkong baîya dik, ga kjibokwo tara Sbö tjšõkwo šagagarë ši, e jšõe šër bakoe. 15Ga tja sök Sbö koshë ga shinmoga, e woshre iröng obi uunkong, pjšo bekde, de pjšo bek ðëmde, gueniyo woshre iröng obi. Kjwepga kjwe šöng omkoshë sorë ga tja omkoshë shäng eni bakoe. 16E kjîshko ga tja drön ara, tja ber pjšo bek Sbö bokso wšo, tja ber pjšo bek nopga bokso wšo bakoe. 17”Šu to jek pjšöböso ga tja öör jëktong shäng kjok shto obšë obšë ga tja jek öötong shäng iröng obi bor kjokshko, dbur twër oba song wšeniyo kong wšo, Sbö sënggšo sör, twër ba kong ba ushko wšo bakoe šoror. 18Ga tja wšêna kjwepgarë eshkoshko ga ðëye shäryërwa šara Moisésdë, tjawa äär Sbö poshrëk ba ushko ga pjšú wšo ši, e shäryër pjir shäng kjwšëe. Eshko ga nopga jëk šöng bor tjok ara ðëm, ga ëye ëng shdök šöng ðëm bakoe. 19Eshko ga judíoga Asia so šöng kjšöbö, ga ðëye šër bop kong ši, e îna šok pjire. Zok ga epga tjwayde šöng jûshko om go, opping na bop bokshto, tja rote wšo. Kuya ga ðëbo shäryoror sit jšõkoyo, tja rote wšo wšeni ga še šok om go ga pjšúe. 20Eni ðëm ga shrono šöng kjwe, tja shäng ba bokshto no ðgwezšong shtoyoshko ga ðëye wšêna bor tjok, tja shdungko wšeni ga še šok bop kong ga pjšúe. 21Gueniyo ga tja še šok ši kjrinaso ga pjšúe. Tja shäng ba bokshtoshko ga tja tjšê ba kong dbo go ga “Tja wotjšîk ga shji wošono ga dbar tjwe ga shji woshre Sbörë iröng obi šër. Ga tja iak shäng bomi bokshto ðgwemi wšo, tja wotjšîk eni kjîshko” šër ba kong eni eröe” še. 22Irbo Tjagšën še ši miyde Félixdë sök pjšúe. Eshko ga tjšê ga “Ðgwer eniwa tjok ðëme. Iër ber Tjšapga Lisias tjwe guing, ga ðgwer eshko jã” še. 23E irgo ga tjšê ëngkjwaga kägäyo shäng ši kong ga “Pablo kjwe ios ber shäng jûshko dak dak šë, gueniyo rayos shäng iguing. Ga ëbo tjwe ba îk ga som ðëm, sèya, kjimte woydë ga wêyê” še. 24Öötong dbar kjwöbö ga Félix äär shäng Pablo shwoy, ba boy Drusila tjok. Wašë, e judío. Eshko ga Pablo rokara Félixdë jek ba shwoy. Ga Pablo šano ba tjok, shji mär Cristo Jesús go sorë kjîshko. 25Eshko ga Pablo tjšê ba kong ga “Shji woyde Sbörë ga shji jëk šöng pjšo bek, ðëbo shäryëy woydë owashko ga shji drön ëë, shäryëy ðëm wšo. Ga ðono ga shji ðgweya Sbörë” še. Šara eni ši kuya Félixdë ga beno shäng sëya ðëm, woydë arae. Eni ga tjšê ga “Ber eni guing. Pja nomo. Tja dbar tjok ga pja rokotë obi” še. 26E irgo ga Félix shäng Pablo koshë, kong dbur twe, raye wšo še. E kjîshko ga roke enido, šan ba tjok wšo. 27Shärye beno shäng eni öötong šu pjšogšo pjök. E irgo ga Félix opshino ba shto dwayo, ga ãska beno sök Porcio Festo. Ga Félix ber pjšú judíoga tjok wšo še ga Pablo iara beno shäng no shdûzšong uyo roshko

will be added

X\