Hechos 20

1Nopga shdöktong kës ši sšano pjir ga Jesús tjšõkwo kjragaga rokara Pablorë, poshdûya wšo. Poshduna pjir ga “Tja toe” še, ga to jek Macedonia kjokyo. 2Öötong shäng eshko ga jek shäng Jesús tjšõkwo kjragaga šöng ši dbo ië kjok kjrinashko kjrinashko. E irgo ga to jek öötong shäng Grecia kjokyo, 3ga beno sök eshko mogšo mya. E irgo ga opshik to jongya Siria kjokyo še. Brikdo, opyë kjyong kësbang roy šarashko ga roy kuya ga judíoga wotjšîk ba zrök še šëba. E kjîshko ga wotjšîk to iröng pjö šëkong Macedonia kjokyo go shara še. 4Ba yorkagaga jek šöng ba tjok ši ëre: Sópater, e Pirro wa, Pirro, e Berea so; Aristarco, Segundo, epga Tesalónica so; Gayo, e Derbe so; Tíquico, Trófimo, epga Asia so; Timoteo bakoe. 5Epga uunkong jek šöng borwa bäm go, ga tjawa koshe öötong šöng Troas kjokyo. Gueniyo tjawa beno šöng Pablo tjok. 6Tjawa beno šöng Filipos kjokyo äär jong pjšung shosho suk pjir shäryak ba uukkšo tjok ðëm dbaryo ši pjitong guing. E irgo ga tjawa opshino jek Filipos kjokyo dwayo äär jong dšung kjako, ga tjawa opyono kjyong kësbang roy, ga tjawa jeke. Öötong dbargwo shkëng (5) ga epga dosharorwa öötong šöng Troas kjokyo. Ga tjawa beno šöng eshko dbargwo kjäk (7). 7Öötong dbar sondëshko ga tjawa töno Jesús tjšõkwo kjragaga tjok, ië wšo. Ga Pablo tjšêno nopga šöng ši kong. Ga opshik eshko dwayo wêshko še kjîshko ga beno shäng tjšê wop ara äär jong kjok ronge. 8Ga tjawa töno šöng šishko ga yongyo shäryak jem jong ëng kopshko ðögong ðögong äär jong kjringgwo myashko, tjawa šöng ši ey. Eshko ga iök borkek šok shjiy arae. Ga dwšas shäng kjšara eshko ko Eutico, ga sirkeno sök u bäng bäng go. 9Eshko ga Pablo tjšê shäng kjër wopro ga Eutico sök ga poywõ ara. Wop ara ga pono, ga šono jer jong kjokshko dwayo äär jong töshko, ga wošonoe. 10Eni ga Pablo opšono jer ba îk, ga opburgö dwšas ši kjing go, ga popjšura. Eshko ga tjšê nopga šöng ši kong ga “Pjãy woydë ðëme. ¡Buk së!” še. 11E irgo ga Pablo jem kjomo iröng obi, ga pjšung shosho suk pjir shdöra, ga uara tjšõkwo kjragaga šöng ši tjok, ga beno shäng tjšõkwo šë ba kong obi äär jong kjok shränto. E irgo ga toe. 12E irgo ga dwšas šira söra šok jek ba ushko së. E kjîshko ga ba pjeyoga beno šöng wopjšú anmoyõ. 13E irgo ga Pablo beno shäng Troas kjokyo obi, ga tjawara opshino jek ba bäm go, tjwe jong Asón kjokyo kjyong kësbang go. Woyde Pablorë ga jek pjö šëkong, ga koshërwa šöng eshko. 14Eni ga Pablo tjwe shäng eshko, ga töno borwa tjok, ga opyono jek shäng kjyong kësbang roy borwa tjok. Eni ga tjawa jek äär šöng Mitilene kjokyo. 15Wêshko ga tjawa opshino eshko dwayo, ga tjawa jek šöng Quío kjokyo, e bokshto. Wêshko ga tjawa jek äär šöng Samos kjokyo. Woyde Pablorë ga tjawa sšan ber šöng Éfeso kjokyo ðëme še, äär Jerusalén kjokyo judío dbar shrëzšong dbaryo kowe šok Pentecostés ši bäm go wšo. E kjîshko ga wêshko ga tjawa öötong šöng Mileto kjokyo. 17Eshko ga no ichara Pablorë tjšapgaga Jesús tjšõkwo kjraga kägäyo šöng Éfeso kjokyo ši rokë. 18Eni ga öötong šöngshko ga Pablo tjšê ba kong ga “Dënashko ga tja tek shrono shäng Asia kjokyo ëreshko ga tja beno shäng bomi tjok dbar kop ara. Ðëye shäryoror eshko ši miydëmi pjir tjän. 19Eshkoshko ga judíoga kjong kjong opyono beno šöng bor wšoyo. E kjîshko ga ðëbo weno bor kong owa ara, ga tja beno shäng woydë ara bakoe. Gueniyo tja beno shäng parkë Tjšapga Jesús kong wotöy îyadoe. 20Tja Sbö tjšõkwo šono oba uunkong bokshto, ga pjãy pinor öör bomi ushko bakoe. Eshko ga tjšõkwo ðë ber pjšú bomi kong wšo ši, e šoror bomi kong pjir, ðëye bangkjrër ðëm wšeni. 21Eshko ga tja tjšêno shäng tjšõkwo kjwaraso judíoga kong, nopga judío ðëm wšeniyo kong bakoe. Tja tjšê ga “Ðëbo owa shäryëmi šöng ši, e owa jšõe šozî, ga rayozî, ga pjãy optwos Sbö kong dey, ga pjãy mär ber šöng bi Tjšapga Jesús go” šër shäng eni îyado. 22”Ga eerishko ga tja jongya Jerusalén kjokyo, tja iche Sbö Sëyarë jek eshko kjîshko. Gueniyo ðëye wen bor kong eshko ši miydër shäng ðëme. 23Miydër shäng ši, e kjrinaso. Tja to shäng kjok shto obšë obšë šishko ga Sbö Sëya tjšê bor kong ga “Ðono ga pja iëba ber shäng no shdûzšong uyo roshko, ga ðëbo wen obšë obšë bop kong bakoe” še bor kong eni. 24Gueniyo bor kong ga tja wošonde, de ðëm, e ðëye ðëme. Woydër ši, e kjrinaso. Pak twara Tjšapga Jesúsdë bor kong shäryër wšo še ši, tja wošonoshko ga e shäryoror pjire. Ga pak ši, e shji kjimte woydë Sbörë sorë ši roy pjšú shdör oba kong. 25”Ga pjãy kong Sbö ber no pjšuyo sorë ši roy šoror bomi kong ara. Gueniyo šër bomi kong ga tja îmi ame. 26Ðëye woyde Sbörë ši, e šoror bomi kong dret, ðëye bangkjrër ðëm wšeni. E kjîshko ga šër bomi kong ga pjãy miydaga ber tjarë ame. 28Sbö tjšõkwo kjragaga tjwšêna ba Wa srëng ši go pjir, ga pjãy iara ba Sëyarë beno šöng ba dë. E kjîshko ga pjãy wšêp ðëme. Pjãy opdos yõtso. Jesús tjšõkwo kjragaga dëmi, öng wšêp ushko so de ba dagarë wšeni. 29”Miydër pjšú ga tja opshino kjok jûshko dwayoshko ga domerga owa tjwe opzrëk bomi tjrëko ara, ga Jesús tjšõkwo kjragaga šöng ši barwe ara, shjiti kjšoy so iir ä wšeniyo tjwe öng ðë uë wšeni. 30Ga kjone kjone šöng bomi tjrëko ëmdë ga opyë šöng jyõrkë, ga Sbö tjšõkwo še šok bomi kong bëy ðëm, Jesús tjšõkwo kjragaga jyãpgwe jek ba shwo šëkong wšo še. 31E kjîshko ga pjãy sjëke. Woyoshrozî ga šu pjšogšo mya ga pjãy poshdunor boryo go shkë dba, pjãy kjšarashko kjšarashko. 32”Era eni, pjeyoga, eerishko ga pjãy iër ber tjeng Sbö wšoshko, pjãy de wšo, ga shji kjimte Sbörë sorë tjšõkwoyo ši, e ber pjang bomi daga bakoe. Pjãy jëk tjšõkwo ši go ga pjãy opping ba miydë pjšú jek këgong këgong. Eni ga ðëbo pjšú twe ba nopga baîya kong wšo ši, e twe bomi kong bakoe. 33”Ga ðëye oma î, e koînor ðëm, dbur ðëm, shwong ðëm bakoe. 34Eni ðëme. Miydëmi pjšú ga tja parkono bor orkwo om go goshko, ðëbo woydër bor kong, bor yorkagaga kong ši tjwšên wšo. 35Ga pjãy pinor eni, woyde ga shji parkë eni, obšë šöng ðëbo woydë ši kjimtëy ga pjšú wšo. Tjšõkwo šara Tjšapga Jesúsdë ši, e woyoshrozîa. Tjšêno ga “Ðëbo kjroroy ga shji wopjšúe. Gueniyo ga ðëbo tworoy obšë kong ga shji wopjšú e kjinmo” šara eni” še. 36Šara eni pjir ga kjök torgö sök Jesús tjšõkwo kjraga kägäyoga šöng ši tjok, ga syõshtono Sbö kong. 37Eni ga epga sšatong šok uunkong, ga Pablo popjšura uunkong širë, ga šõ shira šok bakoe. 38Eshko ga Pablo tjšêno ba kong ga “Tja toe. Tja îmi ame” šara ba kong kjîshko ga epga woydono šok arae. E irgo ga tyara šok öör jek šöng kjyong kësbang buk šishko, to wšo.

will be added

X\