Hechos 19

1Apolos sök Corinto kjokyo wopro ga Pablo jek shäng Galacia kjokyo, Frigia kjokyo bakoe. Eni ga öötong shäng Éfeso kjokyo. Eshko ga Jesús tjšõkwo kjragaga wšêna tjeng kjšöbö, 2ga tjšê ba kong ga “¿Sbö tjšõkwo kjroromishko ga pjãy go Sbö Sëya, e shronore?” “Ðëme. Sbö Sëya, e ë šaydëba borwa kong ðëm obi” še šok ba kong. 3Kuya ga tjšê ba kong ga “¿Eni ga pjãy warabashko ga e ðë šokšo?” “E Juan tjšõkwo kjrororwa ši šokšo” še šok ba kong. 4Kuya ga tjšê ba kong ga “Juan no wono jšõe. Ëye, ðëbo owa shärye šöng ši, e owa jšõe šara, ga rayara ga wara jer di roshko. Gueniyo ga no tjwe ba irgo ši šanyotkara Juandë oba kong, ga woyde ga shji mär ba go dey. Tjšêno shäng ši, e Jesús šayde” še. 5Kuya šok ga epga wara jer di roshko Tjšapga Jesús ko go. 6Domerga wara ši dogšo sak kjwara kjingsho pjök (12). E irgo ga orkwo iono ba dšu kjing go, ga epga go Sbö Sëya shrono beno kësbang ba tjok. Eni ga beno šöng tjšê kjok shto obšë obšë so tjšõkwo, ga Sbö tjšõkwo roy šara šok oba kong. 8Ga mogšo mya ga Pablo jek îyado judíoga syõ uyo jong eshko ši roshko. Eshko ga Sbö ber no pjšuyo sorë ši roy še shäng ara, tjšõkwo še shäng ši, e jšõe šëba wšo. Tjšêshko ga ðëye bangkjre ðëme. 9Gueniyo ga kjong kjong omtjšõkwo kjrono ðëm, ðëye kuya šok woydë ðëm kjîshko. Ga Irbo Tjagšën ši šãywe šok owa oba bokshto. Eni ga Pablo opkjono jek ey dwayo, ga Jesús tjšõkwo kjragaga ši söra jek oppîzšong uyo jong kjwara roshko, u ši sogo ko Tirano. Eshko dbar kjwobi go ga Sbö tjšõkwo šanyotkara ba tjok ara. 10Ga shäryara eni öötong šu pjšogšo pjök. Eni ga Tjšapga Jesús tjšõkwo shdöktong nopga šöng Asia kjokyo uunkong kong, judíoga kong, nopga judío ðëm wšeniyo kong bakoe. 11Eshkoshko ga Pablo kong dbo twara Sbörë kësbang, ðëbo îydëba ðëm wšeniyo shärye kësbang wšo. 12Eni ga jangsher, shwong ðë, e pjono ba go dö ëmdë ga sökoba, twëba swšopga kong ga poptë, twëba nopga goshko Ä sëyaga ši kong ga sëya ši to ba go dwayo bakoe. 13Judíoga kjong kjong to šöng kjok kjrinashko kjrinashko Ä sëyaga tjeng oba goshko ši ichë ä wšeniyo. Eshko ga Tjšapga Jesús koiarga šok pjang sëya ši iche wšo bakoe šara. Ga tjšê ga “Pablo to shäng Jesús roy šë, ga šër bop kong Jesús ko goshko ga Ä sëya, pja opkjos no kjwe goshko dwayo” še jong eni. 14Eshko ga domerga šöng dogšo kjäk (7), Esceva wapga. Esceva, e judío, syõshtaga kägäyo bakoe. Ba wapga dogšo kjäk (7) ši to šöng Ä sëyaga ichë Jesús ko goshko bakoe. 15Pjšara ga shäryara šok enishko ga Ä sëya ši tjšê ba kong šok ga “Tja Jesús miydë, Pablo miydër bakoe. ¿Gueniyo ga pjãy ëro?” še. 16Jekdo eshko ga domer goshko Ä sëya pjang ši jek zrow pjä ba goshko šok erä. Ba dbo ara go ga tjeng dogšo kjäk (7) ši shpora ara, shwong ðë dwšëra dret, sho ðë dwšëra srëng ara, ga zana tjë jîkong. Eni ga to töktong šok u ši roshko dwayo, kjšop dret, ba ðëmdoe. 17Kuya Éfeso sopga uunkong, judíoga, nopga judío ðëm wšeniyo širë ga beno šöng sëya ðëm, bangkjre arae. Eni ga Tjšapga Jesús ko ši iara šok tjwšõ ara. 18Eshko ga Jesús tjšõkwo kjragaga ara tjwe šöng ðëbo owa shäryara šok tek dënashko ši šë oba uunkong bokshto. 19Ga epga ara parkono šöng ybipga wšeniyo ši, ba oppinggšo kjibokwo shoyo söya tjwe šöng, ga sura iökshko dret oba bokshto. Ga ba kjibokwo sura šok kës ši tjwšõ iak dbur sho pjšubšún kjwo sak dbäw dbäw pjšogšo sak shkëng (50,000). 20Eni ga Tjšapga Jesús tjšõkwo shdöktong ðaw pogo, ga tjšõkwo kjrëba jek këgong këgong. 21E irgo ga ðëbo shäryono kës ši irgo ga Pablo wotjšîk jek Macedonia kjokyo, Acaya kjokyo go jongya Jerusalén kjokyo wšo še. Ga wotjšîk kjrina obi ga “Šöng Jerusalén kjokyo ši pjšoror pjir ga tja jongya Roma kjokyo bakoe” še. 22Eni ga ba kjimtagaga ichara do pjök jongya Macedonia kjokyo ba bäm go, epga Timoteo, Erasto. E wopro ga e beno sök eshko Asia kjokyo dbar kjwöböso obi. 23Éfeso so sböpga kjšara ko Artemisa, ba syõ uyo jong eshko. Eshko ga domer sök kjšara ko Demetrio, ba pak baîya, e ðëbo jyãgšo shäryaga dbur sho pjšubšún go. Domer, e Artemisa syõ uyo ši jyãgšo shäryaga. E go ga dbur shak ara, ba parkagaga parkë šöng ba tjok ši tjok. Eshko dbaryo ga ðëbo jyãgšo shäryagaga uunkong ši töna, ga tjšê ba kong ga “Pjeyoga, miydëmi pjšú ga shji mär bi pak ëre go. Eerishko ga Asia kjokyo kjok kjwang jîkong ga bi sbö kësbang Artemisa ši poshrëy šöng îyado. Gueniyo îmi šöng, kumi šöng ga Pablo to shäng tjšê oba kong ga sböpga jyãgšo shäryaga norë ši, e ðëno ðëme še. Eni ga nopga kjšopswë ara ba shwo šëkong, ga shärye eni ši jûshko dö ðëm, Asia kjokyo uunkong seke. 27Ðëbo ëre owa bi kong, bi pak ëre iëba ber tjwšõ ðëm ga jer bi shjiryo. Erö ðëme. Eshko ga Artemisa syõ uyo jong jûshko ši, e ber tjwšõ ðëm bakoe. Eni ga bi sbö om go ši woydëba ame, ba tjwšõ kësbang ši iëba ber ðëno ame” še. 28Kuya šok ga iirkono ara, öö še šok arae. Tjšê šok dbo go ga “¡Éfeso so sbö Artemisa ši, e tjwšõ kësbange!” še. 29ga Éfeso sopga woksera šöng tjë jîkong. Eshko ga Pablo yorkagaga wšêna šöng do pjök ko Gayo, Aristarco, epga Macedonia so. Ga shara šok, dopshira, söra öötong šöng no tönzšong uyo jong eshko šishko. 30Eni ga roy kuya Pablorë ga jek opzrëk woydë eshko, šan nopga šöng ši tjok wšo šara, gueniyo ichara Jesús tjšõkwo kjragagarë ðëme. 31Eshko ga tjšapgaga tjwšõ këskës Asia sopga kong wšeniyo šöng eshko kjšöbö, epga Pablo pjeyoga wšeni, ga tjšõkwo ichara ba kong, to jek opzrëk eshko ðëm wšo. 32E wopro ga nopga öötong šöng no tönzšong uyo ši, e woksera šöng träk ðëme. Šöng eshko ara töno šöng ðë kjîy miyde šöng ðëme. Ga öö še šok ara, kjšara tjšê obšë, kjšara tjšê obšë bakoe. 33Ga judío shäng kjšara eshko ko Alejandro. Domer, e ichara judíoga šöng širë nopga šöng kës ši bokshto, ga ðëye še wšo ši šara šok ba kong. Eni ga Alejandro orkwo poyono, pjãy kjinkozong šokšo wšeni. 34Gueniyo ga miydara šok ga e judío ga kuya woydë ðëme. Ga öö še šok tjë jîkong, tjšê ga “¡Éfeso so sbö Artemisa ši, e tjwšõ kësbange!” še jong eni wop ara, ga Alejandro to tjšêno nopga ši kong ðëme. 35E irgo ga nopga šöng kës ši kjinkara no shäng kjšara tjšapgaga këskës dboryaga wšeniyorë, ga tjšê ba kong ga “Pjeyoga Éfeso so. Shji iak beno šöng bi sbö kësbang Artemisa ši syõ uyo daga, shji beno šöng ba jyãgšo ter šono kjok dogo dwayo ši daga bakoe. Nopga kjok kjwang jîkong so ommiydë pjšú ga eni. 36E jyõ šaga ërë ðëme. Eni ga pjãy šöng tjëkso guing. Ðëbo shäryëmi ga woyotjšîmi ðëm guing ðëme. 37Ga domerga söromi kjwe ðëye owa shäryara syõ uyo kjîy ðëm, ðëye šara bi sbö kjîshko ðëm bakoe. ¿Eni ga tek söromi jûshko ega? 38”Eni ga Demetrio, ba parkagaga, ëye rote woydë wšeni ga tjšapgaga no ðgwega šöng kjweshko, îzîa. Woyde ga ba ðgwezšong dbaryo ga koshe šöng ðgweya wšo. Eshko ga shji ëng rotë ga pjšúe. 39Ga pjãy ðëbo rokë woydë obi ga šëmi shji töno šöng uunkong dbaryo bek šishko ga ðgwey bomi kong eshko jã. 40Ðëbo shäryono jûshko ši, e tjwe bi kong owa kjwe. Shji oba iono ëngkjwë ara še bi ichagagarë kjwe. ¿“¿Oba shdöktong šöng kjweni ega?” šara šok bi kong ga ðë šoydë ba kong eshko?” še. 41Šara eni pjir ga nopga ši ichara to pjire.

will be added

X\