2 Timoteo 4

1Ðono ga Cristo Jesús tjwe ber bi pjšuyo, nopga šöng së ši, no wošono šöng ši, e ðgwega. Eni ga tjšõkwo šër bop kong jšõkoyo ba bokso, Sbö bokso bako, shäryëp wšo. 2Sbö tjšõkwo to šëba. Woydëbare, de ðëmde, šos ba kong îyado, pja sšan ðëme. Ëye wotjšîk owa ga poshdûs, jëk bëy wšo, dbokjrë e go wšo. Tjšõkwo ši šos yõtso îyado, pja sjen ba šë ðëme. 3Dbar tjwe kjwara ga tjšõkwo bek ši kuya woydë ërë ame. Eshko ga no pinggaga wen šöng ara, ga tjšõkwo kuya woydë nopgarë ši, e še šok ba kong eni. Eni ga nopga äär ara ba tjšõkwo ši kuk. 4Tjšõkwo bek ši kuya šok ame. Ðëbo tjwšõ ðëm ši kuyde shara. 5Gueniyo pja wotjšîk bëy îyado. Ðëbo wen tjwe bop kong owa arashko ga kus kjing eröe. Pja to shäng tjšõkwo roy pjšú ši šë, nopga tjšõkwo kjroydë ðëm obi šöng ši kong eröe. Bop pak ši shäryos uunkong yõtso. 6Bor pak shäryoror ara ši, e ba pjitoe. Tja wošon dbaryo ši döröe. 7Bor dbo kës ši go ga pak twara Sbörë bor kong ši shäryoror jšõkoyo. Shäryoror pjir, öötong ba dbo go. Tjšõkwo pjšú ši doror yõtso. 8Tja shäng Tjšapga Jesús, no ðgwega pjšo bek ši koshë shäng woowa ðëme. Miydër ga tjweshko ga parkaga pjšo bek potjwšênggšo ši twe bor kong, nopga uunkong šöng ba koshë wopjšú ši kong bakoe. 9Pja tek sorë yašë, gueniyo pja tek bor îk wop äe. 10Demas, ðëbo tjeng kjok ëre kjing go ši woyde ara kjîshko ga tja töywara to Tesalónica kjokyo. Crescente to Galacia kjokyo. Tito to Dalmacia kjokyo. 11Beno shäng bor tjok ši Lucas eröe. Marcos, tja kjimte bor pak shäryë ga pjšúe. Wšêp ga tek söp bop tjok. 12Tíquico ichoror jek Éfeso kjokyo. 13Bor shwong kop šëkong ši ioror beno buk Troas kjokyo, Carpo ushko. Pja tekshko ga tek söp bor kong. Bor kjibokwo tek söp bor kong bakoe. Shäryak tjeng öng kwota go ši woydër ara. 14Domer shäng kjšara ko Alejandro. E ðëbo shäryaga dröng shosho go. Ðëbo shäryara bor kong owa ara. Gueniyo potjwšêga ber Tjšapga Jesúsdë. 15E opyono beno shäng tjšõkwo šëy šöng ši wšoyo. E kjîshko ga pja sjëk ba tjok bakoe. 16Tja söraba, öötong shäng tjšapgaga shwoy jûshko bäm goshko ga tja kjimtara ërë ðëme. Jesús tjšõkwo kjragaga šöng eshko ši, tja töywara uunkong. Gueniyo woydër ga ðëye owa shärye Tjšapga Jesúsdë ba kong ðëme. 17Eshko ga tja kjimtara Tjšapga širë om go. Ba tjšõkwo kës ši kuya nopga judío ðëm wšeniyo širë wšo ga tja kjimtara ba šë ba kong. Ga tja döra ey dwayo, tja zröraba ðëme. 18Eni ga ðëbo owa tjwe bor kongshko ga tja kjimte, tja döya, tja söya äär sök kjok dogo, pjšu sök îyado šishko. E iëy ber kësbang, tjwšõ ara îyado wšo. Ber eni. 19”¿Yonde?” šëp Prisca, Aquila kong, Onesíforo pjeyoga kong bakoe. 20Erasto beno shäng Corinto kjokyo. Trófimo swšo ara, ga ioror beno buk Mileto kjokyo. 21Pja tek sorë yašë, gueniyo pja tek bor îk kjok owa dbaryo äätë ðëm obishko. Eubulo, Pudente, Lino, Claudia, Jesús tjšõkwo kjragaga šöng uunkong ši, “¿Pja yonde?” še šok bop kong. 22Rokër Tjšapga Jesús kong ga ber shäng bop tjok îyado, ga ba wopjšú ši kjîshko ga pja kjimte ara.

will be added

X\