2 Timoteo 1

1Kjibokwo ëre taga tja Pablorë. Tja kjrara Sbörë beno shäng ba tjšõkwo roy šaga Cristo Jesús ãska, shji töno beno tjeng Cristo Jesús tjok ga shji ie Sbörë ber šöng së îyado ba tjok ši roy šë oba kong wšo. 2Timoteo, kjibokwo ëre ichër jek bop kong. Pja bor wa wšeni. Rokër Data Sbö kong, bi Tjšapga Cristo Jesús kong ga ba wopjšú ši kjîshko ga pja kjimte šok ara, pja songe še îyado, pja ie šok ber shäng wšêp bakoe. 3Tja parkë Sbö kong jšõkoyo, bor tjšapgaga tek dënashko so omshäryono dik. Ðëbo pjšú miydër ši shäryër eni šër bor pjšúshko. Shkë dba ga tja syõshtë ba kong bop kjîshko. 4Pja sšatong boryo kwono ši, e woyoshrër îyado, ga pja în woydë jšõkoyo, tja ber wopjšú wšo. 5Woyoshrër ga pja mär Sbö go. Bop tjëtë Loida, bop mekë Eunice, e opyono šöng mär Sbö go bäm go, ga miydër ga pja mär ba go jšõkoyo bakoe. 6Dënashko ga tja orkwo iono bop dšu kjing go, pja ber shäng dboy Sbö kong wšo, ga kjok miydë twara bop kong eshko. Eni ga kjok miydë ši go ga pak twara bop kong ši shäryos îyado, pja kjok miydë jek këgong wšo, iök bakworoy pjë jong ri ri jek këgong wšo wšeni. 7Bi go Sbö Sëya twara beno kësbang bi tjok, ðëye bangkjrëy ðëm wšo. Twara bi kong, shji dbo ara wšo, shji ëng woydë ara kar kar wšo, shji wotjšîk pjšo bek wšo bakoe. 8E kjîshko ga pja tjšê oba kong bi Tjšapga Jesús kjîshkoshko ga šökyokjrëp ðëme. Tja shäng kjërshko ëre ba kjîshko ëmdë ga tja šökyokjrëp ðëm bakoe. Woyde ga shäryër sorë ga Sbö dbo ara go ga pja omshäryë eni bako, ðëbo wen bop kong owa gueniyo. 9Shji döra Sbörë, ga shji rokara jëk šöng pjšo bek ba bokso wšo. Shäryara eni, ðëbo shäryoroy ši kjîshko ðëm, shäryara eni, woydara eni kjîshko. Ba wopjšú ši kjîshko ga kjok shäryayde ðëm obishko ga wotjšîno Cristo Jesús ichë bi kong. 10Dbar eerishko ga ba wopjšú ši pina bi kong, bi döga Cristo Jesús goshko. Wošon ši pjira Jesúsdë. Shji ber šöng së îyado ba tjok sorë, e pina bi kong ba tjšõkwo pjšú ši go, ga beno wêšëe. 11Tja kjrara beno shäng tjšõkwo pjšú ëre roy šë Jesús ãska wšo, oba ping wšo bakoe. 12Eerishko ga tja shäng song, ðëbo ëre kjîshko. Gueniyo ga Jesús, e miydër shäng pjšú, tja mär shäng ba go bakoe. Ga miydër ga e dbo ara, ðëye iara beno tjeng bor wšoshko ši de äär jong ba dbaryoshko wšo. E kjîshko ga tja shäng song ëmdë ga šökyokjrër ðëme. 13Tjšõkwo ši šëp oba kong pjšo bek wšo ga šos ba kong, šoror bop kong sorë ši eni. Pja töno beno tjeng Cristo Jesús tjok. Pja jëk ba tjok kjîshko ga oba woydëp ara îyado. 14Tjšõkwo pjšú ši iara Sbörë beno tjeng bop wšoshko. Dëp yõtso. Pja go Sbö Sëya, ga pja kjimte tjšõkwo ši dë. 15Miydëp pjšú ga Jesús tjšõkwo kjragaga šöng Asia kjokyo ši, tja rayara to šok pjire. Tjrëko to jek Figelo, Hermógenes. 16Gueniyo Tjšapga Onesíforora, tja îya öör ara, tja kjimtara dbokjrë ara. Tja sök kjërshko ga tja šökyokjre ðëme. Shrono Roma kjokyoshko ga woshtono ðëm, tja wšêna guing. E kjîshko ga ba pjeyoga kjimtaga ber Tjšapga Jesúsdë îyado. 18Ga Tjšapga ši dbaryo tjweshko ga songe šaga ber erë om go eshko. Shji kjimtara Éfeso kjokyo kjöme, e miydëp tjän.

will be added

X\