2 Tesalonicenses 2

1Pjeyoga, Tjšapga Jesucristo tjwe iröng obi, shji tòya ber šöng ba tjok wšo. Gueniyo kjone kjone tjšê ga “Tjšapga ši shrono iröng tjän” še. Šaga Sbö Sëyarë še bomi kong, šaga tjawarë še bomi kong, kjibokwo ichaga tjawarë še bomi kong bakoe. Gueniyo jšõ šëmi ðëm, pjãy opshgawë e go ðëm bakoe. 3Pjãy jyãpgwëba ðë kjîy ðëme. Bäm go ga nopga opyë ber Sbö wšoyo. E irgo ga Jesús tjwe iröng obi dbaryo ši äätë ðëm obishko ga ðëbo owa sogo ši wen tjwe eshko. Weno shäng jer wšo ši e. 4E opyë ber Sbö wšoyo, ðëbo poshrëkoba Sbö wšeni ši moskwo bakoe. Woyde ga e poshrëydëba döe. Eshko ga opzrëk jek äär ber sök Sbö u jong Jerusalén kjokyo ši roshko, ga tjšê oba kong ga “Sbö ši tja” še. 5Tja shäng bomi tjok obishko ga ðëbo ëre šoror bomi kong. ¿E woyo bomi kong ðëmdo? 6Dbar iara Sbörë, ðëbo owa sogo ši wen wšo. Gueniyo shaga shäng kjšara, ba dbar ši äätë ðëm obi wopro ga tjwe ðëm wšo. Ba shaga ši ë miydëmi tjän. 7Sbö moskwoga šöng parkë ara tjän, gueniyo ga ðëbo owa sogo ši wen tjwe ðëm, ba shaga ši kjara Sbörë guing. 8Eni ga ðëbo owa sogo ši wen eshko jã. Gueniyo Tjšapga Jesús tjwe iröng obishko ga ba kjamo pjšukyo go dö ga e pjiya ber drete. Îkoba e goshko ga ba dbo ši kësbang anmoyõ. 9Ðëbo owa sogo ši tjweshko ga kong dbo twaga Ärë. Ðëbo îydëba ðëm wšeniyo shärye obšë obšë. Ga oba jyãpgwe e go. 10Owa shärye ðë pogo, nopga pjir tjeng ši jyãpgwe e go wšo. Nopga ši pjir, tjšõkwo bek ši woydara ðëm kjîshko. Tjšõkwo ši kjrara kjwe ga döktong e go. Gueniyo tjšõkwo bek ši kjrara ðëme. Ðëbo owa shäryara šöng wopjšúe. E kjîshko ga raye Sbörë ga jyãpgwe ðëbo owa širë, tjšõkwo bek ðëm ši kjre šok wšo, epga ber shdungko wšo. 13Pjeyoga, pjãy woyde Sbörë ara. Pjãy kjrara tek dämärshko, pjãy döya wšo. Ga Jesús tjšõkwo roy pjšú šororwa bomi kong. E go ga pjãy rokara Sbörë, ga tjšõkwo bek ši kjroromi, ga pjãy iara Sbö Sëyarë jëk šöng pjšo bek Sbö bokso. Pjãy döra eni, bi Tjšapga Jesucristo tjwšõ ara ši ber bomi kong bako wšo. E kjîshko ga bëy wšo ga tjawa wopjšú Sbö tjok îyado. 15Eni ga pjeyoga, pjãy šöng wokjang îyado. Tjšõkwo šororwa bomi kong ši, tjšõkwo tororwa, ichororwa jek bomi kong ši, e woyojemi ðëme. 16Bi Tjšapga Jesucristo, bi Data Sbö, shji woyde šok ara. Ba wopjšú ši kjîshko ga shji ie šok dbokjrë îyado, shji wosonkë ðëm wšo, shji ie ber šöng ba koshë wopjšú wšo bakoe. 17Eni ga woydërwa ga pjãy ie šok dbokjrë, pjãy wosonkë ðëm wšo, ba tjšõkwo roy pjšú šëmi îyado wšo, ðëbo pjšú ši shäryëmi îyado wšo bakoe.

will be added

X\