2 Pedro 2

1Dënashko ga Israel tjëyoga tjrëko, no kjone kjone to šöng tjšê ga “Tja Sbö tjšõkwo šaga” še, gueniyo ichaga Sbörë ðëme. Eerishko ga no kjone kjone omshäryë eni bakoe. Oba pîya šöng šûtshko, ba wotjšîk owa ši go jšõ wšeni, miga jyõ. Epga tjwšêna, döra Tjšapga Jesúsdë pjir ëmdë ga opyono beno šöng ba moskwo. Shärye šok eni, nopga mär Jesús go ame wšo. E kjîshko ga wop ä ga shdûya Sbörë. 2Nopga ara ðëbo owa shäryako ðëm wšeniyo shäryë baîya dik. E kjîshko ga tjšõkwo bek ši šãywëba owa. 3Epga wotjšîk šöng dbur töng ba kong eröe. E kjîshko ga pjãy jyãpgwe šok tjšõkwo shiya ba woshko ši go. Gueniyo epga shdûya sorë ši šara Sbörë tek dënashko pjir tjän. Ga ðono ga shdûya jšõkoyo. 4Sbö parkagaga kjok dogo so ðëbo owa shäryono kjîshko ga shduna Sbörë, dbura jer iök pjë jong ri ri sjer ðëm shtoyo ši roshko, pjrira dröng sho go, beno šöng kjok ro sî roy, ba ðgwezšong dbaryo tjwe ši koshë. 5Dënashko ga nopga ðëbo owa shäryono kjîshko ga shduna, pira di go drete. Gueniyo Noé, era Sbö tjšõkwo bek ši šaga. E kjîshko ga döra beno ba pjeyoga dogšo kjäk (7) ši tjok. 6Sodoma sopga, Gomorra sopga, e ðëbo owa shäryono kjîshko ga shduna, ba kjok ši sura iök go, pjono beno pjšung sho erä. 7Gueniyo Lot, era pjšo bek. E kjîshko ga döra. Sök nopga Sbö košë ðëm wšeniyo ši tjrëko obishko ga ðëbo shärye šok owa ši îna, kura sök dbar kjwobi go, ga wosonkono sök ara e kjîshko. 9Miydëy e go ga ðëbo wen nopga pjšo bek ši kong owashko ga döya Sbörë ga pjšúe. Gueniyo nopga owa ši shdûya šöng îyado, äär jong ba ðgwezšong dbaryo šishko. 10Ëye jëk šöng ba wotjšîk owa ši go, ga Sbö koše ðëm ga shdûya eni bakoe. Nopga eniyo ðëbo owa shäryëshko ga ðëye bangkjre šok ðëme. Epga krë ara bakoe. Ba kong ga kjok dogo sopga šãywe owa ši, e ðëye ðëme. 11Sbö parkagaga kjok dogo so tjwšõ ara, dbo ara, no kjinmo. Eni ëmdë ga kjok dogo sopga obšë ši šãywe Sbö bokshto eni ðëme. 12Nopga eniyo omšãywë owashko ga ðëye šãywe šöng ši, e ðë miyde šöng ðëme. Epga so öng ðë kjoyo, ðëbo shärye ga woyotjšîya ðëme. Wotjšîk tjwe ðë ga shäryayde eröe. Ga ðono ga pjir öng dik bakoe. 13Ðëbo shäryara obšë kong owa ši kjîshko ga kar shdûya Sbörë eni bakoe. Šöng wopjšú wšo ga woyde ga wotjšîk tjwe ðë ši shäryë. Îkoba wêšë ëmdë ga ðëbo owa shärye šok dbashko, ga šökyokjre ðëme. Ga woyde šok ga pjãy omshäryë eni ba tjok bakoe. Epga bomi kong ga ðëbo owa wšeni, ië šok bomi tjok ši ber šökyo ara bakoe. 14Wašë ë pogo îya ga wotjšîk pë ba tjok erä. Sjen ðëbo owa shäryë ðëme. Nopga mär Sbö go jšõkoyo ðëm ga jyãpgwe ara. Wotjšîk dbur töng ba kong erö bakoe. Epga shdungko jšõkoyo. 15Dënashko ga domer shäng kjšara ko Balán, e Bosor wa. Balán, e wotjšîno dbur shak ðëbo owa ši go erä. Pjšara ga to shäng ðëbo owa shäryë wšoshko ga wšona Sbörë, öng so kwomgša kjoyo dre töshko tjšê ðëm wšeniyo, e ichara kjšara tjšê ba kong no dik, ðëbo owa ši shärye ame wšo. Eerishko ga nopga owa šër shäng ši, irbo pjšo bek ši rayara, beno jëk šöng Balán irbo owa ši go shara. 17Epga so di bäng dano pjir kjoyo, so pjäng sho bakwe pjšukdë ðaw pogo kjoyo bakoe. Ga ðono ga pjir ber šöng kjok ro sî anmoyõ ši roshko. 18Epga tjšêshko ga ðëye še ši tjwšõ ara še, gueniyo tjwšõ ðëm, ðëno ðëme. Ga nopga wotjšîk ðëbo owa shäryë ame še kjwšë wšeni ši jyãpgwe, jëk ber šöng ba wotjšîk owa ši go wšo. 19”Pjãy döktonge. Ðëye shäryëmi woydë ši shäryëmi ga pjšúe” še šok ba kong. Gueniyo epga om go tjeng ðëbo owa shärye šöng ši dbo dorko. Shji ichaga ðërë ga shji ber šöng parkagaga tjwšêk šöng pjir wšeniyo ba kong. 20Ëye bi döga Tjšapga Jesucristo miydë ðëm ga e songe. Gueniyo miydarashko ga e döktonge. Eshko ga beno šöng ðëbo owa shäryë ame. Gueniyo opyë ðëbo owa shäryë obi wšeni ga ber tjeng ðëbo owa shärye šöng ši dbo dorko iröng obi. Eshko ga ber šöng song anmoyõ. 21Irbo pjšo bek twara Sbörë ba kong, jëk ba go wšo ši miydara, rayara kuzong ga e beno song jšõe. Miydara ðëm kjwe dey. 22Epga beno šöng ðëbo tak pjang Sbö tjšõkwo go wšeni. Tjšêno beno eni: “Shjiti yarwono sök ga döni ga tek tjwe ba uë iröng obi. Köchi wak sök drëpdrë ga opdik buk tjã tjã di shäng roy jek obi.”

will be added

X\