2 Corintios 5

1Bi doyo ëre so ukwang kjoyo, e ber îyado wšo ðëm kjîshko. Shji wošonoshko ga ãska doyo twe Sbörë bi kong obšë kjok dogo. Era pjir ðëm, shäryaga norë ðëm bakoe. 2Shji šöng së obishko ga woydëy ga bi doyo tjagšën ši twe bi kong jekdo. 3Doyo tjagšën ši twe bi kongshko ga shji doyo tjok, shji ber šöng shwong dret wšeni ðëme. 4Shji šöng bi doyo ëre go obishko ga shji šöng song îyado. Gueniyo bi doyo pjir wšeniyo ëre rayëy woydë dö ðëm, ãska woydëy obšë, pjir ðëm wšeniyo. 5Shji poshäryara Sbörë, doyo tjagšën ber bi kong pjšú wšo. Ga ba Sëya twara bi kong. Miydëy e go ga ðono ga bi doyo tjagšën ši twe bi kong eni bakoe. 6Miydëy pjšú e go ga ðono ga shji äär ber šöng Tjšapga Jesús tjok kjok dogo, shji šöng bi doyo ëre go obishko ga shji äätë šöng ba tjok eshko ðëm obi gueniyo. 7Shji mär šöng ba go, ðëbo îgöy wêšë ši go ðëme. 8Shji šöng wopjšú ba koshë. Shji wošon, shji to ber šöng ba tjok îyado wšo dey. 9Gueniyo shji šöng së obire, de shji wošonde, shji drön ara, ðëbo woyde Tjšapga širë shäryëy wšo ši, e shäryë, e ber shäng wopjšú bi tjok wšo. 10Ðono ga shji uunkong roke Cristorë äär šöng ba zšong bäng, ga shji jëktong kjok ëre kjing go sorë ši ðgweya. Eshko ga shji kjšara kjšara potjwšêya, ðëbo shäryoroy pjšúre, de oware ši kjîshko. 11E kjîshko ga Tjšapga Jesús bangkjrërwa ara. Eni kuzong ga tjawa parkë ara, ba tjšõkwo kjrëba wšo. Tjawa sorë miyde Sbörë pjšúe. Woydërwa ga tjawa sorë miydëmi bakoe. 12Šërwa bomi kong eni jek obi, pjãy ber šöng wopjšú borwa tjok wšo ðëme. Šërwa bomi kong, tjawa šãywe nopga krë ä wšeniyo širë owashko ga dboryëmi ga pjšú wšo. Epga krë ara, ðëbo îgöy wêšë ši kjîshko, gueniyo wotjšîk šok owa ba pjšúshko. 13Pjãy wotjšîk ga tjawa skwê wšeni šëmi ga e Sbö kjîshko. Pjãy wotjšîk ga tjawa wotjšîk pjšúe šëmi ga e bomi kjîshko. 14Tjawa parkë eni kjšuwe, miydërwa ga shji woydara Cristorë ara kjîshko. Miydërwa ga e wošono nopga uunkong kjîshko. Eni ga nopga uunkong ši wošono ba tjok wšeni. 15E wošono nopga uunkong kjîshko, ëye šöng së ga ðëbo shärye Cristo kong wšo, ðëbo shärye ba kong om go wšo ðëme. E wošono ba kjîshko, ga woshrara Sbörë iröng obi. 16E kjîshko ga tjawa obšë woyotjšîk, nopga Sbö miydë ðëm wšeniyo omwoyotjšîk dik ðëme. Dënashko ga Cristo woyotjšînorwa baîya dik. Eerishko ga woyotjšînwa eni ame. 17E kjîshko ga ëye töno beno tjeng Cristo tjok ga kjšopswara Sbörë beno šöng tjagšën wšeni. Wotjšîk šöng dënashko sorë ši, e pjitonge. Beno šöng wotjšîk obšë shara. 18Ðëbo uunkong ëre shäryaga Sbörë. Shji iara beno šöng wšêp ba tjok Cristo kjîshko, ga tjawa ichara beno šöng ba roy shdök obšë kong, tjšõkwo kjre šok wšo, ber šöng wšêp ba tjok bako wšo. 19Cristo ichara Sbörë wošon, owa pjang nopga Sbö miydë ðëm wšeniyo go ši šòya ber dret wšo, epga ber šöng wšêp Sbö tjok wšo. Ga tjawa iara beno šöng tjšõkwo ëre roy shdöga 20Cristo ãska. Tjšõkwo šërwa ë kongshko ga šaga Sbörë om go wšeni. Eni ga rokërwa bomi kong Cristo ko go ga pjãy ber šöng wšêp Sbö tjok. 21Cristo ðëbo owa shäryono ðëme. Gueniyo ichara Sbörë wošon, owa shäryoroy ši potjwšêk e go wšo, shji ie ber pjšo bek ba bokso wšo.

will be added

X\