2 Corintios 11

1Tjšõkwo šër shäng bomi kong ši kuzî jek obi, kumi ga tja tjšê kä ðëm wšeni gueniyo. 2Pjãy ymoyotkër ara, pjãy ymoyotke Sbörë sorë ga eni. Kjogšo domer miydoydë ðëm obi wšeniyo twëba domer kjšara kong, orkwosmok ba tjok wšoshko ga kjogšo ši ber baîya eröe. Pjãy twër woydë Cristo kong eni bakoe. 3Dënashko ga Eva jyãpgwara dgur širë. Ga bangkjrër ga pjãy jyãpgwëba eni bako, pjãy mär ber šöng Cristo go jšõkoyo ame wšo šër. 4Ošö ga no äär bomi shwoy ga tjšõkwo še bomi kong owa wšeni. Jesús roy obšë še bomi kong, šororwa bomi kong sorë ši dik ðëme. Sëya obšë twe woydë bomi kong še. Tjšõkwo obšë še bomi kong bakoe. Eshko ga tjšõkwo ši kjrëmi woydë jekdo, gueniyo tjšõkwo kjrëmi ðëm dey. 5Epga wotjšîk ga Sbö tjšõkwo roy šaga Jesús ãska tjwšõ arayo ši epga om go še. Gueniyo šër bomi kong ga tjwšõ ara bor kjinmo ðëme. 6Miydër ga tja oppino tjšê pjšú wšo ðëme. Gueniyo tja kjok miydë ara. E înomi ðëbo shäryororwa obšë obšë ši go. 7Sbö tjšõkwo roy pjšú šoror bomi kong, gueniyo tjwšõ shiror ðëme. ¿Tja opyono beno tjwšõ ara ðëm, pjãy iër ber šöng tjwšõ ara wšo eni ši, e ðëbo owa shäryotë šëmire? 8Tja parkë shäng bomi tjokshko ga tja potjwšêga Sbö tjšõkwo kjragaga šöng kjok shto obšë širë. 9Tja shäng bomi tjokshko ga tja ðëye dretshko ga ëye barworor ðëm, bi pjeyoga Macedonia so öör bor shwoy, ga ðëye woydoror ši twara šok bor kong. Eni ga ðëye rokoror bomi kong ðëm, ga rokër bomi kong ðëm îyado. 10Cristo tjšõkwo bek ši miydër pjšúe. Miydëmi šöng pjšú ga e jšõe. Ga tja krë tjšõkwo shiror ðëm ši kjîshko Acaya kjokyo kjok kjwang jîkong, tja sšongga ërë ðëme. E jšõ eni bakoe. 11Tja tjšê eni, pjãy woydër ðëm kjîshko šëmi ðëme. Miyde Sbörë ga pjãy woydër ara. 12No kjone kjone tjšê ga pak shärye šöng ši tjwšõ ara, pak shäryërwa šöng ši dik še. E kjîshko ga ðëye shäryër shäng ši shäryër shäng îyado eni, epga krë eni ga ä wšo. 13Epga opkjšopswë ber šöng so Sbö tjšõkwo roy šaga Jesús ãska kjoyo, miga jyõ erä. To šöng jyõrkë erä. Îkoba ga parkë šöng Cristo kong wšeni, miga jyõrkokdo šöng. 14Gueniyo ga pjãy opshgawë ba kjîshko ðëme. Ä om go ši opkjšopswë ber shäng so Sbö parkaga kjok dogo so kãšã ðetðet kjoyo eni bakoe. 15Eni ga ba parkagaga opkjšopswë ber šöng so Sbö parkagaga pjšo bek wšeniyo kjoyo eni bakoe. Shji opshgawë e kjîshko ðëme. Ðono ga epga shdûya Sbörë, ðëbo shäryara kës ši kjîshko. 16Ðëbo šër bomi kong obi, gueniyo tja kä ðëme šëmi ðëme. Gueniyo woyotjšîmi eni wšeni ga tja iozî ber shäng tjšê kä ðëm wšeni, tja krë sira obi wšo. 17Miydër ga tja krë eni ga tja tjšê shäng kä ðëm wšeni, tja tjšê shäng Tjšapga Jesús dik ðëme. 18Nopga ara krë eni, nopga Sbö miydë ðëm wšeniyo dik. Eni kuzong ga tja krë eni bakoe. 19Pjãy kjok miydë ara šëmi, gueniyo ðëye še nopga kä ðëm wšeniyorë ši kumi kjing erä. 20Pjãy ichëba parkë, bomi ðëbo dökoba, pjãy jyãpgwëba, oba opyë šöng bomi bäm go, pjãy wšongoba, pjãy bokso shpokoba bakoe. Ðëbo shäryë enishko ga kumi šöng kjing erä. 21Tjawara opshäryono bomi tjok kjang eni ðëme. ¿Pjãy shdunorwa eni ðëm kuzong ga pjãy wotjšîk ga tjawa šökkjrë wšo šëmire? Obšë krë ðë kjîshko ga tja krë e kjîshko bako, tja tjšê kä ðëm wšeni gueniyo. 22Epga hebreoga še, ga tja bakoe. Epga Israel tjëyoga še, ga tja bakoe. Epga Abraham tjëyoga še, ga tja bakoe. 23Epga Cristo parkaga še, ga tja ba parkaga jšõkoyo. (Tja tjšê eni ga tja skwê wšeni.) Tja parkono ara, ba kjinmo šok. Tja iaraba shäng kjërshko pjšogšo ara, ba kjinmo šok. Tja shporaba no shpokkšo go dbo ara, ba kjinmo šok. Tja zrökoba woydë šëba ara. 24Tja shpora judíogarë no shpokkšo go pjšogšo shkëng (5) dbaryo obšë obšëe. Pjšara pjšara ga tja shpora öötong pjšogšo sak mya kjingsho shkaw (39). 25Tja shporaba kjor go pjšogšo mya, dbaryo obšë obšëe. Pjšara ga tja šöraba ak go, tja zrökoba wšo šëba. Tja jek sök kjyong kësbang roshko ga tja piktong pjšogšo mya, dbaryo obšë obšëe. Tja beno buk dšung roshko shkër kjwara, dbar kjwara, tja shteno seke. 26Tja jëktong ara kjok shto obšë obšë. Tja jëktong shäng shto owashko ara. Tja di këskës zono ara. Tja jëktong shäng šûgwang šöngshko. Tja zröya woydë bor nopgarë. Tja zröya woydë nopga judío ðëm wšeniyorë bakoe. Tja tjšõkwo šono nopga arashko ga tja zrökoba woydë. Tja tjšõkwo šono nopga ara ðëmshko ga tja zrökoba woydë bakoe. Tja sök dšung kjing goshko ga tja wošono seke. No kjone kjone Sbö tjšõkwo kjraga še, miga jyõ. Epga ëmdë ga tja zröya šok woydë. 27Tja dröno shäng ara pak kjang shäryë. Tja pono ðëm shkër kjwöböso. Tja pjši kuno ara, tja wodogro kuno ara, tja iono ðëm dbar kop ara bakoe. Ošö ga tja smo kuno, tja shwong dret kjîshko. 28Tja song, ðëbo tjeng kës ëre kjîshko, gueniyo erö ðëme. Tja woydë ara, Sbö tjšõkwo kjragaga šöng kjok shto obšë obšë ši kjîshko îyado. 29Roy kuror ga nopga dbo ðëm ga tja woydë ara ba kjîshko. Roy kuror ga nopga ichëba ðëbo owa shäryë ga tja iirkë ara eshko. 30Woyde ga tja krë sira obi, gueniyo tja krë ðëbo kjîshko, tja dbo ara ðëm miydëmi wšo. 31Tjšapga Jesús Sbö, ba Data ši poshrëkko îyado wšo. Era ommiydë ga tja jyõrkë ðëme. 32Pjšara ga tja shäng Damasco kjokyo. Eshko ga kjok eshko so ichaga ši parkë sök Pjšu Aretas kong. Ga kjok eshko so ichaga ši nopga ichono kjok ši u bäng bäng no opshikkšo dë, tja shaya šok wšo. 33Gueniyo tja šonaba jer shing roshko, kjok ši kjëryo pogšo go pjšor kašëkong. Tja döktong ba wšoshko dwayo eni.

will be added

X\