1 Timoteo 4

1Sbö Sëya tjšê bi kong wêšë ga “Dbar tjwe kjwara ga kjone kjone, tjšõkwo pimi šöng ši, e söya šok ame. Eshko ga jyãpgwe Ä sëyagarë, ga sëya ši tjšõkwo kjrayde shara” še. 2Tjšõkwo owa ši, e šaga nopga jyõ ä wšeniyorë. Ðëbo owa shärye šokshko ga bangyo ba kong ame. 3Epga tjšê ga “Shji orkwosmok ga owa” še eni, “Dši, e uako uunkong ðëme” še eni bakoe. Eshko ga jyõrkonoe. Dši ðë pogo, e iara Sbörë beno uëy wšo. Ga shji tjšõkwo bek ši kjraga, dši ðë uëyshko ga woyde Sbörë ga shji syõshtë ba kong, tjšê ba kong ga “Tjawa kong dši tworop ëre. Tjawa ber wopjšú bop tjok e kjîshko” šëy eni. 4Ðëbo uunkong shäryara Sbörë ši, e pjšú, Sbö tjšõkwo tak beno pjang eni kjîshko, dši ši syõyoshtoroy kjîshko bakoe. Eni kuzong ga “E uako ðëme” šëy ðëme. Woyde Sbörë ga uëy, shji wopjšú ba tjok dši ši kjîshko. 6Bi pjeyoga Jesús tjšõkwo kjraga ši, e pîs tjšõkwo ëre go. Eni ga pja ber Cristo Jesús parkaga pjšú wšeniyo, ga pja opping jek këgong këgong tjšõkwo bek söp shäng ši goshko. 7Ðëbo weno tjšapgaga tek dënashko so kong, shji kjimte Sbö košë ðëm wšeniyo, tjwšõ ðëm wšeniyo, e šãywëba bop kongshko ga tjšõkwo kup ðëme. Pja drön ëë, pja opsguë jëk shäng pjšo bek Sbö bokso wšo dey. 8Shji drön ëë, bi doyo iëy ber kjšo kjang wšo, e ber bi kong pjšú jšõkoyo. Eni gueniyo ga shji jëk shäng pjšo bek Sbö bokso, e tjwšõ e kjinmo anmoyõ. Shäryëy eni ga shji kjimte kjok ëre kjing goshko, ga shji to ber šöng Sbö tjokshko ga shji kjimte eshko bakoe. 9Šëba eni ši, e eni jšõe. Tjšõkwo ëre kjrako. 10E kjîshko ga shji parkë drön ara. Sbö sök îyado, no döga ši e, ga ëye mär ba go ga döya uunkong. E kjîshko ga shji šöng ba koshë. 11Pja to shäng oba ping tjšõkwo ëre go, ga ichos ba shäryë. 12”Pja mite jã. Tjšõkwo šëp borwa kong ðëm e kjîshko” šëba bop kongshko ga košëp ðëme. Pja tjšõkwo šëp pjšú, pja jëk pjšo bek, obšë woydos pjšú, pja mär Sbö go, ðëbo owa shäryëp ðëm bakoe. Shäryos eni, îya Jesús tjšõkwo kjragaga šöng širë wšo, epga omshäryë bopoya dik wšo. 13Tja äätë ðëm obi wopro ga pja ber shäng Sbö tjšõkwo buk ši šë oba kong, oba pim tjšõkwo ši go, dbokjrë wšo, ga poshdum bakoe. 14Dënashko ga pja parkë Sbö kong sorë ši šara Sbörë bi pjeyoga kjone kjone kong, ga epga omšono borwa kong. E irgo ga tjšapgaga Jesús tjšõkwo kjraga kägäyo orkwo iono šok bop dšu kjing go, pja ber shäng dboy Sbö kong wšo, ga pja kong kjok miydë twara Sbörë, pak ši shäryëp ba kong wšo. Eni ga kjok miydë twara bop kong ši go ga pak twara bop kong ši shäryos îyado. 15Tjšõkwo ëre woyotjšîp ara, shäryëp yõtso, pja jëk shäng ba shäryë jek këgong këgong îkoba uunkong wšo. 16Pja jëk pjšo bek, oba pim tjšõkwo bek ši go eröe. Pja opdos yõtso, e shäryëp wšo, ga rayëp ðëme. Enira pja där, oba bop kuga ši, e där bakoe.

will be added

X\