1 Timoteo 2

1Bäm go ga rokër bop kong ga pja syõshtos Sbö kong nopga uunkong kjîshko. Rokos ba kong ga epga kjimte wšo. Ga ðëbo pjšú shäryara ši kjîshko ga pja tjšê ba kong ga “Tja wopjšú bop tjok” šëp ba kong eni. 2Pja syõshtë pjšupga kjîshko, no ichagaga kjîshko bako, shji ber šöng wšêp wšo, shji barwe šok ðëm wšo bakoe. Eni ga Sbö poshrëy ga pjšú, ðëye woyde Sbörë ši shäryëy ga pjšú bakoe. 3Shji syõshtë eni, e pjšúe. Shäryëy eni ga Sbö bi döga ber wopjšú bi tjok. 4Woyde ga nopga där uunkong. Woyde ga tjšõkwo bek ši miyde šok wêšë bakoe. Tjšõkwo bek ši, e eni: 5Sbö, e kjšaraso; bi iaga ber šöng wšêp Sbö tjok ši, e kjšaraso bakoe; domer Cristo Jesús ši e; 6e optwono wošono, ber nopga uunkong potjwšêkkšo wšo, epga där wšo. Tjšõkwo ëre dbaryo iara Sbörë beno ši öötong tjän. 7E kjîshko ga tja ichara ba roy shdök, tja iara beno shäng ba tjšõkwo roy šaga Jesús ãska. Tja shäng jyõrkë ðëme. Tja tjšê shäng beke. Tja ichara tjšõkwo bek ši roy šë nopga judío ðëm wšeniyo kong, shji mär Jesús go sorë ši šër ba kong bakoe. 8Woydër ga nopga šöng kjok kjwang jîkong syõshtë Sbö kong. Gueniyo ga orkwo poyong syõshtë wšoshko ga woydër ga wotjšîk bëy, iirkë ë kong ðëm, ëng dboryë kar kar iir go ðëm bakoe. 9Wašëga, e woydër ga shwong pjung pjšo bek, yõtso. Wotjšîk doyë, opyë shäng oba bokso wošësowa anmoyõ, îya domergarë wšo ga owa. Opyë ber wošësowa wšo še ga käkzong poshärye ara anmoyõ, dbur sho shõyšør pje ara, shwong tjwšõ ara wšeniyo pjûya ga owa. 10Opyë ber wošësowa wšo ga woydër ga ðëbo pjšú shäryayde dey. Wašëga Sbö poshrëga še ga woyde ga wotjšîk eni. 11Ëye shäng Sbö tjšõkwo roy šëshko ga woyde ga kuya wašëgarë šöng kjing, dborye šok ðëme. 12Nopga ëng töno šöng Sbö tjšõkwo roy šë ëng kongshko ga wašëga ichër domerga ping ðëme. Domerga ichaga ber wašërë ðëme. E kjîshko ga woydër ga kuya wašëgarë šöng kjing erä. 13Adán, e shäryara Sbörë bäm go. Eva, e shäryara ba irgo. 14Jyãpgwara Ärë ši, e Adán ðëme. Evara jyãpgwara, ga ðëbo owa shäryara. 15Gueniyo wašëga, e döya wšo jšõe. Gueniyo ga iara beno wapga weng wšo, wapga dë wšo. Woyde ga mär Sbö go, oba woydë pjšú, jëk šöng pjšo bek Sbö bokso, îkoba pjšú wšo. Shärye šok enira där.

will be added

X\