1 Timoteo 1

1Kjibokwo ëre taga tja Pablorë. Sbö, e bi döga. Koshëy šöng ši, e Cristo Jesús. Tja kjrara, ichara šok ber ba tjšõkwo roy šaga Cristo Jesús ãska. 2Timoteo, kjibokwo ëre ichër jek bop kong. Pja mär Cristo Jesús go, pinor bop kong sorë ši eni. E kjîshko ga pja bor wa wšeni. Rokër Data Sbö kong, bi Tjšapga Cristo Jesús kong ga ba wopjšú ši kjîshko ga pja kjimte šok ara, pja songe še îyado, pja ie šok ber shäng wšêp bakoe. 3Éfeso kjokyo ga kjong kjong šöng oba ping tjšõkwo bek ðëm ši go. Tja jek öör Macedonia kjokyoshko ga pja rokoror ber sök Éfeso kjokyo wšo. Pja ichoror tjšê nopga šöng eshko ši kong ga “Tjšõkwo bek ðëm ši šëy ame. Ðëbo weno tjšapgaga tek dënashko so kong ši šëy ame. E jyõ bakoe. Ga pjãy kjšara kjšara tjëyo kjone dey ši, šëy ga pjir ðëme. E kjîshko ga e šanyotkëy ame. E šanyotkoromi ga oba ëngšë kar kar erä. Woyde Sbörë ga shji mär ba go shara, shji ber šöng ba pak ši shäryë wšo.” 5Pja ichoror eni, shji Jesús tjšõkwo kjragaga ëng woydë ara kar kar wšo. Shji ëng woydë wšo ga woyde ga ðëye owa woyotjšîy ðëm, ðëbo pjšú miydëy ši shäryëy eni, shji mär Jesús go jšõkoyo bakoe. 6Kjong kjong omshäryë šöng ame. Ðëbo tjwšõ ðëm ši šanyotke beno šöng eröe. 7Opyë woydë ber šöng no pingga kjok ðgwekkšo tara Moisésdë ši go. Še šöng jšõ wšeni, gueniyo jšõkoyo ga ðëye še šöng ši, e ðë šokšo miyde šöng ðëme. 8Miydëy pjšú ga kjok ðgwekkšo ši, e pjšúe. Gueniyo ðëno wšo, woyde ga miydëy pjšú guing. 9Kjok ðgwekkšo ši, e twara Sbörë beno oba jëk šöng pjšo bëy ši ðgwekkšo ðëm, e twara beno oba jëk šöng ðëbo owa shäryë ši ðgwekkšo. E beno ëye kjok ðgwekkšo košë ðëm ši ðgwekkšo, ëye ðëbo owa shäryako ðëm ši miydë pjšú gueniyo shärye enido ši ðgwekkšo, ëye, ba kong ga Sbö tjwšõ ðëm ši ðgwekkšo, ëye owa shäryë enido ši ðgwekkšo, ëye Sbö košë ðëm ši ðgwekkšo, ëye Sbö bangkjrë ðëm ši ðgwekkšo, ëye ba data, ba mekë zrök ši ðgwekkšo, ëye no obšë zrök ši ðgwekkšo, 10ëye pë no orkwosmono ba tjok ðëm tjok ši ðgwekkšo, domer pë domer obšë tjok ši ðgwekkšo, ëye no shak ga soyneya obšë kong ä ši ðgwekkšo, ëye jyõrkë ä ši ðgwekkšo, ëye tjšê jšõkoyo gueniyo obšë jyõyotke shdungoba wšo ä ši ðgwekkšo bakoe. Shärye enishko ga tjšõkwo bek ši shäryayde šöng ðëme. 11Tja kjrara, ichara Sbörë ba tjšõkwo roy pjšú šë oba kong. Sbö, e wopjšúe. 12Dënashko ga Sbö šãywër shäng owa, ba tjšõkwo kjragaga irpjan shäng, ðëbo owa shäryër ba kong wšo. Gueniyo eshko ga tja songe šara Sbörë, ðëye shäryër shäng ši owa miydoror shäng ðëm kjîshko, ba tjšõkwo kjrotë ðëm obi kjîshko bakoe. Eni ëmdë ga tja îna bi pjšuyo Cristo Jesúsdë ga parkaga pjšú wšeniyo, ga tja iara beno shäng ba parkaga shara, tja kong dbo twara shäryër wšo. E kjîshko ga tja wopjšú ba tjok. 14Tjšapga wopjšú ši kjîshko ga tja kjimtara ara anmoyõ. Tja töna beno tjeng Cristo Jesús tjok kjîshko ga tja iara beno shäng mär ba go, ga tja iara obšë woydë ara baîya dik. 15”Cristo Jesús öör kjok ëre kjing go nopga owa ši döga” šëba eni îyadoe. E eni jšõe. Tjšõkwo ëre kjrako. Tjara ðëbo owa shäryono ara, oba uunkong kjinmo. 16Tja owa anmoyõ kjîshko ga tja songe šara Sbörë, ga tja kjimtara, îya nopga mär šöng ba go širë wšo. E go ga miyde šok ga Jesucristo, e iirkë bi kong mašing ðëm, ga ëye omtjšõkwo kjrë ga kjimte, ga ie ber šöng së îyado ba tjok bakoe. 17E kjîshko ga Sbö, e poshrëy, iëy ber kësbang, tjwšõ ara îyado. Bi pjšuyo sök îyado, wošon ðëm, îgöy ðëm, Sbö kjšaraso ši e. Ber eni. 18Timoteo, pja bor wa wšeni. Dënashko ga pja parkë Sbö kong sorë šara Sbörë bi pjeyoga kjone kjone kong, ga epga omšono bi kong. Tjšõkwo šër bop kong shäryëp wšo ši ëre, e šër bop kong, pak šara šok tek dënashko ši shäryëp pjšú anmoyõ wšo. 19Eni ga pja mär shäng Jesús go jšõkoyo, ga ðëbo pjšú miydëp ši shäryëp eni. Kjone kjone omshäryono eni ðëme. E kjîshko ga epga jëk Sbö tjok ame. 20Himeneo omshäryono eni, Alejandro bakoe. E kjîshko ga ioror beno tjeng Ä wšoshko. E goshko ga opping bi Sbö, e šãywe owa ame wšo.

will be added

X\