1 Tesalonicenses 4

1Era eni ga pjeyoga, tjawa ichara Tjšapga Jesúsdë tjšõkwo šë bomi kong kjrina obi. Dënashko ga pjãy pinorwa jëk sorë, Sbö ber wopjšú bomi tjok wšo, ga shäryëmi šöng eni. Gueniyo ga rokërwa bomi kong ga shäryëmi eni jek këgong këgong anmoyõ. 2Miydëmi pjšú ga tjšõkwo šororwa bomi kongshko ga tjawa ichaga Tjšapga Jesúsdë. 3Ðëye woyde Sbörë ši, e eni: Pjãy jëk šöng pjšo bek ba bokso îyado; shji orkwosmono ë tjok ðëm ga shji pë ba tjok ðëme; 4ðëbo owa shäryëy bi doyo om go ši go ðëme; pjãy opdë yõtso, pjšo bek dey; 5nopga Sbö miydë ðëm wšeniyo söya ba wotjšîk owa širë, ðëbo owa shäryë ba doyo go, gueniyo shji omshäryë baîya dik ðëme. 6Shji shdûya Sbörë jšõkoyo ðëbo ëre kjîshko. E šororwa bomi kong tjän. E kjîshko ga ðëbo shäryëy eni obšë kong ðëm, ëye jyãpgwëy, ðëbo owa shäryë wšo ðëm bakoe. 7Shji rokara Sbörë, shji ber šöng ðëbo bëy shäryë wšo, shji ber šöng ðëbo owa shäryë wšo ðëme. 8Eni ga ëye tjšõkwo ëre kjrë woydë ðëm ga ðëbo owa shärye shäng nopga kong ðëm, shärye shäng Sbö kong. Sbö Sëya twaga bomi kong ši, Sbö ši e. 9Pjãy pina Sbörë om go ëng woydë ara kar kar, epenga dö wšeni. Eni kuzong ga ðëbo tërwa bomi kong kjibokwo go e kjîshko ðëno ðëme. 10Shäryëmi šöng eni pjeyoga šöng Macedonia kjokyo uunkong ši tjok. Pjeyoga, rokërwa bomi kong ga shäryozî eni jek këgong këgong anmoyõ. 11Pjãy parkos wšêp bomi orkwo om go go, obšë barwëmi ðëm wšo. Pjãy mär obšë go ðëm, pjãy mär bomi pak om go ši go shara, šororwa bomi kong sorë ši eni. Shäryozî eni, pjãy bangkjre nopga obšërë wšo. 13Pjeyoga, no shinmotkono irgo ga ðëye wen ba tjok dö ši woydërwa ga miydëmi. Ëye wošonoshko ga pjãy ber šöng woydë, nopga ðëbo koshë šöng ðëm wšeniyo dik ðëme. 14Miydëy pjšú ga Jesús wošono, ga woshrara Sbörë iröng obi. E kjîshko ga miydëy ga ëye mär šöng Jesús go ga wošono ga woshre Sbörë Jesús tjok eni bakoe. 15E kjîshko ga šërwa bomi kong ga Tjšapga Jesús tjwe iröng obishko ga shji šöng së obi ši jem wošono tjeng ši bäm go ðëme. Tjšõkwo ëre šaga Tjšapga Jesúsdë. 16Eshko ga Tjšapga Jesús om go ši ter tjwe kjok dogo dwayo, ga öö še jšõkoyo, bi ichokšo. Eshko ga ba parkaga kjok dogo so kägäyo ši tjšê. Sbö wši, e pjšukyo kuy bakoe. Eshko ga ëye töno beno tjeng Cristo tjok, ga wošono tjeng ga woshre bäm go. 17E irgo ga shji beno šöng së ši, shji söya jem ba tjok pjäng sho roshko, ga shji ëng dowšêk Tjšapga ši tjok eshko. Eshko jek šëkong ga shji ber šöng ba tjok. 18Tjšõkwo ëre šõzî ëng kong, pjãy wokjang wšo.

will be added

X\