1 Pedro 2

1E kjîshko ga ðëbo owa shäryëmi šöng obšë kong ši, e rayozî uunkong. Obšë jyãpgwëy ame. Shji ðëbo pjšú shäryë, shji îkoba wšo dö ame, ðëbo pjšú ši shäryozî, woyotjšîmi bomi pjšúshko eni kjîshko shara. Shji wotjšîk owa obšë kong ba ðëbo kjîshko ame. Obšë šãywëy owa ame bakoe. 2Chida wen buk kjwšë ga nä ië woydë sorë ga Sbö tjšõkwo wšêzî eni bakoe. Eni ga pjãy döya Sbörë sorë ši miydëmi jek këgong këgong. 3Miydoromi pjšú ga Tjšapga wopjšú bomi tjok ši, e pjšú anmoyõ. 4Shji u shäryë akkwo go ga akkwoyo iëy töshko bäm go, ber ba shakkšo wšo. E irgo ga akkwo iëy ba kjing go jem jong ëng kjing go. Sbö shäng u shäryë wšeni. Pjãy jëk šöng Jesucristo tjok. Era so ak iak beno buk bäm go u shakkšo kjangyo wšeni ši kjoyo, gueniyo e sök së. E woydara nopga ararë ðëm, gueniyo kjrara Sbörë beno ba kong tjwšõ ara anmoyõ. Ga pjãy mär šöng Jesucristo go kjîshko ga pjãy iara Sbörë beno šöng syõshtagaga tjeng dboy ba kong wšeni, pjãy ber šöng syõshtë ba kong wšo. Pjãy so akkwo iak jem jong ëng kjing go ši kjoyo, gueniyo pjãy šöng së bakoe. 6Sbö tjšõkwo tak pjang eni: “Akkwo iër buk kjwara Sión kjokyo ši îzîa. E tjwšõ ara anmoyõ. Kjroror, ioror beno buk u shakkšo bäm go ši e. Ëye mär ba go ga ðëye koshe ši wšêya jšõkoyo.” 7Pjãy mär šöng ak šër shäng ši go. Bomi kong ga tjwšõ ara anmoyõ. Gueniyo ðëbo tak pjang Sbö tjšõkwo go, ëye mär ba go ðëm ši kjîshko. Tjšêno beno eni: “Akkwo woydara u shäryagagarë ðëm ši, e iak beno buk bäm go, u shakkšo kjangyo wšeni.” 8Ga tjšê obi ga “Ak ši, e no ðrinyokšo, no sabyokšo bakoe.” Epga sabyë, tjšõkwo roy pjšú ši koše šok ðëm kjîshko, šara Sbörë dënashko ba kjîshko sorë ši eni. 9Dënashko ga pjãy jëk šöng kjok ro sî roy wšeni, gueniyo pjãy kjrara Sbörë beno ba nopga baîya, syõshtagaga tjeng dboy ba kong wšeni, ðëbo pjšú shäryara ši roy šëmi wšo. Pjãy jëk beno šöng kjok shjiy roy wšeni shara. 10”Dënashko ga pjãy tjëyo kjrinaso ðëm, gueniyo eerishko ga pjãy Sbö î shara. Dënashko ga pjãy songe šara ðëm, pjãy kjimtara ðëm, gueniyo eerishko ga pjãy songe še, pjãy kjimte bakoe.” 11Pjeyoga, pjãy šöng shto obšë so wšeni kjok ëre kjing go. E kjîshko ga rokër bomi kong ga pjãy wotjšîk tjwe owa ga shäryëmi ðëme. Wotjšîk owa ši, e bomi wšoyo. 12Pjãy jëk šöng pjšo bek nopga Sbö miydë ðëm wšeniyo bokso. Eni ga pjãy rote šok ara ëmdë ga ðëbo pjšú shäryëmi šöng ši îya šok, ga Sbö tjweshko ga e poshrëya šok ara bomi kjîshko. 13Tjšapga kjîshko ga kjok ðgwegaga kjok ëre kjing go šöng kës ši košozîa. Bomi pjšuyo košozîa. 14No ichagaga bomi kjokshko ši košozî bakoe. Epga parkë šöng nopga ðëbo owa shäryë ši shdungga, nopga ðëbo pjšú shäryë ši poshrëga bakoe. 15Woyde Sbörë ga pjãy ðëbo pjšú shäryë, Sbö tjšõkwo ši ðëno ðëme še nopga wotjšîk ðëm wšeniyorë ame wšo. 16Dënashko ga pjãy parkagaga tjwšêk šöng pjir wšeniyo dik. Gueniyo pjãy döra Sbörë kjok ðgwekkšo tara Moisésdë ši dbo dorko dwayo. Eni ga pjãy jëk šöng nopga ichaga ërë ðëm wšeni, gueniyo pjãy ðëbo owa shäryë e kjîshko ðëme. Pjãy jëk šöng nopga ichaga Sbörë wšeni dey. 17Nopga uunkong bangkjrozî beke. Bomi pjeyoga Jesús tjšõkwo kjraga woydozî ara. Sbö bangkjrozîa. Bomi pjšuyo bangkjrozî bakoe. 18Parkagaga tjwšêk šöng pjir wšeniyo, bomi sogoga košozî, bangkjrozî bakoe. Wotjšîk bomi tjok pjšúre, de oware, e košozî, bangkjrozî bakoe. 19Shji shdungoba ðë kjîy ðëm, ga kuy kjing Sbö kjîshko ga Sbö ber wopjšú bi tjok eshko. 20Pjãy shdungoba ðëbo owa shäryoromi kjîshko, ga kumi kjing ga e ðëno ðëme. Gueniyo pjãy shdungoba ðëbo pjšú shäryoromi kjîshko, ga kumi kjing ga Sbö ber wopjšú bomi tjok eshko. 21Pjãy rokara Sbörë e kong wšo. Cristo, e shdunaba bomi kjîshko, ga woyde ga pjãy omshäryë baîya dik eni bakoe. 22E ðëbo owa shäryono ðëm, e jyõrkono ë kong ðëm bakoe. 23Äyoshtëba owashko ga dboryara ðëme. Shdungobashko ga kroyoywara ðëm bakoe. Opyono beno tjeng Sbö wšoshko, era kjok ðgwek beke. 24Cristo om go ši doyo šöraba pjang kjšös goshko ga owa shäryoroy ši, e beno pjang ba go. Shäryara eni, shji ber šöng ðëbo owa shäryë ame wšo. Woydara ga shji ber šöng së tjagšën wšeni, shji jëk šöng ðëbo pjšú shäryë wšo shara. Shpok bäng beno šok ba go ši kjîshko ga shji poptara beno šöng swšo ame. 25Dënashko ga pjãy uunkong jeno šöng, öng ushko so jeno sök dik. Gueniyo eerishko ga pjãy to tek iröng bomi daga, bomi wšikaga ši shwo šëkong.

will be added

X\