1 Juan 5

1Ëye, no pjšuyo iche šara Sbörë ši, e Jesús še ga e Sbö wapga jšõkoyo. Ëye Data Sbö woydë ara ga ba wapga woyde eni bakoe. 2¿Gueniyo ba wapga woydëy ara ši miydëy sorë? Shji Sbö woydë ara, ga ba tjšõkwo košëy. Miydëy e go ga ba wapga woydëy ara bakoe. 3Shji Sbö woydë jšõkoyo wšeni ga ba tjšõkwo košëy. Ga ba tjšõkwo, e kjang bi kong ðëme. 4Sbö wapga uunkong ši, ðëbo owa shärye nopga Sbö miydë ðëm wšeniyorë ši, e zana šok pjire. Shji mär Jesús go ga owa ši zãy. 5¿Ðëbo owa ši zangga ërë? Ëye, Jesús, e Sbö Wa jšõe še ga ðëbo owa ši zangga beno epgarë döe. 6Jesucristo öör shäng kjok ëre kjing go. E wara Juandë di go, ga wošonoshko ga srëng kwono. Miydëy e go ga e Sbö Wa. E waraba dö ðëm, e srëng kwono bakoe. Jesús, e ë še Sbö Sëyarë bi kong bako, ga tjšõkwo bek ši šayde döe. 7Eni ga Jesús, e Sbö Wa jšõe miydëy ðëbo kjringgwo mya go: Sbö Sëya go, di ši go, srëng ši go bakoe. 9Tjšõkwo še nopgarë bi kongshko ga tjšõkwo kjrëy, tjwšõ ara bi kong kjîshko. Gueniyo tjšõkwo še Sbörë ši tjwšõ ara e kjinmo. Ga ba Wa roy šaga ši, e Sbö om go. 10Ëye mär Sbö Wa go ga tjšõkwo šara Sbörë ši kjrara jšõkoyo. Ëye mär ba go ðëm ga Sbö jyõ äe šayde, ba Wa roy šara ši tjšõkwo kjrara ðëm kjîshko. 11Ðëye še Sbörë ši ëre: Shji kong ba Wa twara, shji ie ber šöng së îyado ba tjok wšo še eni. 12Eni ga ëye mär ba Wa go ga sök së jšõkoyo. Ëye mär ba go ðëm ga wošono shäng wšeni. 13Pjãy mär šöng Sbö Wa go, kjibokwo ëre tër bomi kong, pjãy iara Sbörë beno šöng së îyado ba tjok ši miydëmi pjšú wšo. 14Eni ga ðëbo woyde Sbörë wšeniyo rokëy ba kongshko ga miydëy ga shji kuya. Ga miydëy ga shji kuya wšeni ga ðëbo rokoroy ba kong ši shärye bi kong eni. E kjîshko ga rokëy ba kongshko ga ðëye bangkjrëy ðëme. 16Ëye ba kjšara îk shäng ðëbo owa shäryë ga woyde ga syõshtë Sbö kong ba kjšara ši kjîshko. Ðëbo owa šër shäng ši, shji ie ber shdungko îyado wšo ðëm wšeniyo šotë. Ðëbo owa, shji ie ber shdungko îyado wšo wšeniyo tjok. Ëye ðëbo owa eniyo shäryono ga shji syõshtë ba kjîshko ðëme. 17Ðëbo owa shäryoroy ðë pogo ga e owa. Gueniyo ðëbo owa, shji ie ber shdungko îyado wšo ðëm wšeniyo tjok. 18Ëye Sbö wa ga ðëbo owa shärye enido ame. E de Sbö Warë. E kjîshko ga ðëye shärye Ärë ba kong ga äe. 19Miydëy ga shji Sbö wapga. Miydëy ga nopga Sbö miydë ðëm wšeniyo ši ichaga Ärë. 20Miydëy ga Sbö Wa öör shäng kjok ëre kjing go, ga shji kong kjok miydë twara, Sbö bek ši miydëy pjšú wšo. Shji mär šöng Sbö bek ši go, ba Wa Jesucristo go bakoe. Sbö bek ši e. Bi iaga ber šöng së îyado ba tjok ši e bakoe. 21Pjãy bor wapga wšeni, shji sböpga jyãgšo poshrëk ðëme.

will be added

X\