1 Corintios 7

1Ðëbo kjakrokoromi bor kong kjibokwo go ši, e dboryër bomi kong shara. Pjšú wšo ga shji orkwosmok ðëm dey. 2Gueniyo nopga ara pë no orkwosmono ba tjok ðëm ši tjok kuzong ga zok ga pjãy domerga pë bomi boy onmo ši tjok, pjãy wašëga pë bomi šanma onmo ši tjok eni bakoe. 3Domerga orkwosmok šöng pjir, pjãy pë bomi boy tjok wšo. Wašëga orkwosmok šöng pjir, pjãy pë bomi šanma tjok wšo. Pjãy orkwosmok šöng pjir kjîshko ga “Tja pë bop tjok ðëme” šëmi ëng kong ðëme. 4Wašë orkwosmok shäng pjir ga ba doyo, e baîya dö ðëm, e ba šanma î bakoe. Domer orkwosmok shäng pjir ga ba doyo, e baîya dö ðëm, e ba boy î bakoe. 5”Tja pë bop tjok ðëme” šëmi ëng kong ðëme. Gueniyo pjãy wotjšîk bëy ëng kong ga “Shji pë ëng tjok ðëm dbar kjwöbö, shji ber šöng syõshtë Sbö kong îyado wšo” šëmi ëng kong ga pjšúe. Gueniyo dbar ara ðëme. E irgo ga pjãy pë ëng tjok jek obi, pjãy tjšîya Ärë, ðëbo owa shäryë wšo ga ä wšo. 6Ðëbo ëre shäryëmi woydë ga shäryëmi ga pjšú, gueniyo “Shäryozî eni” šotë ðëme. 7Bor kong ga pjãy uunkong orkwosmok ðëm ga pjšú, gueniyo shji iara Sbörë ðëbo shäryë obšë obšëe. Kjong kjong iara beno šöng orkwosmok ðëm wšo, kjong kjong iara beno šöng orkwosmok wšo bakoe. 8Pjãy šöng orkwosmoydë ðëm obi, pjãy syãpga, pjãy ber šöng tjoksa botoya dik ga pjšúe. 9Gueniyo pjãy wotjšîk ëbo wšêk îyado, pë ba tjok wšo wšeni ga pjãy orkwosmok ga pjšú, pjãy wotjšîk ðëbo owa shäryë îyado ðëm wšo. 10Pjãy orkwosmok šöng pjir, tjšõkwo šara Tjšapga Jesúsdë bomi kjîshko. Wašëga orkwosmok šöng pjir, bomi šanma rayëmi ðëme. 11Rayoromi wšeni ga pjãy ber šöng tjoksa, ðëm ga pjãy tön iröng bomi šanma rayoromi ši tjok obi. Domerga orkwosmok šöng pjir, bomi boy rayëmi ðëm bakoe. 12Ðëbo obšë šër bomi kong, gueniyo ëre šaga tjarë om go bomi kong, e šaga Tjšapga Jesúsdë ðëme. Domerga orkwosmok šöng wašë Jesús tjšõkwo kjraga ðëm wšeniyo tjok, pjãy raye woydë bomi boydë ðëm ga e rayëmi ðëm bakoe. 13Ga wašëga orkwosmok šöng domer Jesús tjšõkwo kjraga ðëm wšeniyo tjok, pjãy raye woydë bomi šanmarë ðëm ga e rayëmi ðëm bakoe. 14Shäryëmi eni ga ba boy kjîshko ga domer Jesús tjšõkwo kjraga ðëm wšeniyo ši de Sbörë, ba nopga de sorë ga eni, ga ba šanma kjîshko ga wašë Jesús tjšõkwo kjraga ðëm wšeniyo ši de Sbörë eni bakoe. Eni ga bomi wapga de Sbörë bakoe. Gueniyo shäryëmi eni ðëm ga epga de ðëme. 15Pjãy orkwosmok šöng Jesús tjšõkwo kjraga ðëm tjok, pjãy raye woydë ga wêyê. Pjãy rayara eni ga pjãy pogo ðëye dret Sbö bokso. Shji rokara Sbörë, shji ber šöng wopjšú ëng tjok wšo. 16Gueniyo pjãy ber šöng orkwosmok ba tjok ga pjšú ga shäryozî eni. Bomi kjîshko ga bomi kjšara ši där kjwe. 17Shji kjšara kjšara šöng sorë ši šaga Sbörë. Pjãy rokara Sbörëshko ga pjãy šöng sorë ga pjãy ber šöng eni. Šër eni Jesús tjšõkwo kjragaga uunkong kong. 18Domerga, pjãy rokarashko ga pjãy šöng doyo jyã tak pjir ga wêyê. Eshko ga pjãy šöng doyo jyã tak ðëm ga pjãy doyo jyã të ðëme. 19Shji doyo jyã tak pjirde, de ðëmde, e tjwšõ ðëme. Shji Sbö tjšõkwo košë ši, tjwšõ tjok ši e. 20Pjãy rokarashko ga pjãy šöng sorë ga pjãy ber šöng eni. 21Eshko ga pjãy parkagaga tjwšêk šöng pjir wšeniyo ga pjãy woydë ðëme. Gueniyo pjãy döya woydë bomi sogorë ga pjãy to dey. 22Pjãy rokarashko ga pjãy parkagaga tjwšêk šöng pjir wšeniyo ga Sbö bokso ga pjãy beno Tjšapga Jesús kjšarayo shara, pjãy sogo dret wšeni. Pjãy rokarashko ga pjãy sogo dret ga pjãy iara Sbörë beno Cristo î, eni ga eerishko ga pjãy sogo tjok wšeni. 23Pjãy tjwšêna Sbörë tjwšõ ara. E kjîshko ga pjãy opyë ber ichaga no obšërë ame, pjãy ichaga ber Sbörë döe. 24Pjeyoga, pjãy rokarashko ga pjãy šöng sorë ga pjãy ber šöng eni. 25Pjãy šöng orkwosmoydë ðëm obi kong, tjšõkwo šara Tjšapga Jesúsdë bomi kjîshko ðëme. Gueniyo tja kjimte Tjšapga širë kjîshko ga tjšõkwo šër bomi kong ëre, e beke. 26Bor kong ga shji šöng eerishko dbar owa kjîshko ga pjãy šöng sorë ga pjãy ber šöng eni dey. 27Pjãy orkwosmok šöng pjir ga pjãy ëng rayë ðëme. Pjãy šöng orkwosmok ðëm ga pjãy boy wšêk ðëme. 28Gueniyo pjãy orkwosmono wšeni ga ðëbo owa shäryoromi ðëme. Kjogšoga orkwosmono wšeni ga ðëbo owa shäryara ðëm bakoe. Gueniyo ëye orkwosmono ga kong ðëbo owa wen ara kjok ëre kjing go. Šër bomi kong eni, pjãy ðono ga song ðëm wšo. 29Pjeyoga, šër bomi kong eni, shji ber šöng kjok ëre kjing go wšo dbar kjwöbö obi erä kjîshko. E kjîshko ga pjãy orkwosmok šöng pjir ga pjãy jëk šöng nopga orkwosmok ðëm wšeniyo dik shara; 30pjãy sšar ëë ðëbo kjîshko ga pjãy wotjšîk ara ba kjîshko ame; pjãy šöng wopjšú ðëbo kjîshko ga pjãy wotjšîk ara ba kjîshko ame; pjãy ðëbo tjwšêno ga e ber bomi kong îyado wšo šëmi ðëm bakoe. 31Eni ga shji šöng kjok ëre kjing go obishko ga ðëbo tjeng kjok ëre kjing go ši, e woyotjšîy ara ðëm, kjok pjir šë kjîshko. 32Pjãy kjimtër woydë, pjãy woydë ame wšo. Domer shäng tjoksa ga wotjšîk Tjšapga Jesús pak shäryë, ber pjšú ba tjok wšo. 33Gueniyo domer orkwosmok shäng pjir ga wotjšîk ðëbo tjeng kjok ëre kjing go shäryë, ber pjšú ba boy tjok wšo. 34Eni ga wotjšîk kjring pjök. Wašë shäng tjoksa ga wotjšîk Tjšapga Jesús pak shäryë, ba doyo, ba wotjšîk, e ber ba kong wšo. Gueniyo wašë orkwosmok shäng pjir ga wotjšîk ðëbo tjeng kjok ëre kjing go shäryë, ber pjšú ba šanma tjok wšo. 35Šër bomi kong eni, ber pjšú bomi kong wšo, pjãy orkwosmok ga äe šotë ðëme. Woydër ga pjãy jëk ber šöng pjšo bek, pjãy ber šöng wotjšîk Tjšapga Jesús pak shäryë döe. 36Domerga tjšõkwo twono kjogšo kong orkwosmok wšo, pjãy orkwosmok woydë ba tjok, kjogšo ši šuyo öötong orkwosmok wšo guing kjîshko ga pjãy orkwosmok ba tjok ga pjšúe. Ðëbo owa shäryomirë ðëme. 37Gueniyo pjãy wotjšîk orkwosmok ðëme šëmi, woydëmi eni kjîshko, pjãy ichaga ërë ðëm kjîshko, ga pjãy wotjšîk ðëbo owa shäryë ðëm ga pjãy orkwosmok ðëm ga pjšúe. Ðëbo pjšú shäryomirë. 38Eni ga pjãy orkwosmok kjogšo tjok ga e pjšúe. Gueniyo pjãy orkwosmok ba tjok ðëm ga e pjšú anmoyõ. 39Wašëga orkwosmok šöng pjir, bomi šanma sök së obishko ga rayëmi ðëme. Gueniyo wošono ga pjãy orkwosmok domer obšë tjok ga pjšú, gueniyo woyde ga Tjšapga Jesús tjšõkwo kjraga wšeniyo. 40Gueniyo pjãy orkwosmok ame ga pjãy ber šöng wopjšú anmoyõ. Tja go Sbö Sëya. Tja wotjšîk eni e kjîshko.

will be added

X\