1 Corintios 5

1Pjãy kjšara roy kuror ga ba mewa kjrono sök ba boy. Ðëbo shäryara eni ši, e owa anmoyõ. Nopga Sbö miydë ðëm wšeniyo ëmdë ga äär ðëbo owa shäryë eni ðëme. 2Eni ëmdë ga pjãy šöng bomi krë tjok. Zok ga pjãy kjwe šöng woydëe. Woyde ga domer ši ichoromi kjwe to bomi tjrëko dwayo. 3Tja shäng bomi tjok ðëm ëmdë ga pjãy woyotjšîn enido. E kjîshko ga ðëbo šër shäng bomi kong ëre, tja shäng bomi tjok om go wšeni. Šër bomi kong ga domer ðëbo owa shäryono eni ši, e shdûzîa. 4Pjãy tön Tjšapga Jesús ko goshko ga tja shäng bomi tjok wšeni, ga Tjšapga Jesús dbo ši tjeng bomi tjok bakoe. 5Eshko ga domer ši iozî ber tjeng Ä wšoshko, ba doyo shdûya pjir wšo. Eni ga Tjšapga Jesús tjwe iröng obishko ga ba sëya där kjwe. 6Pjãy krë, e owa. “Pjšung shosho uukkšo chira dö ëmdë ga pjšung shosho bayo kjöm pogo ga uuya pjire” šëba eni. E miydëmi šöng pjir tjän. 7Pjšung shosho uukkšo këguë ši dbuya judíogarë, pjšung shosho shäryak ba uukkšo tjok ðëm wšeniyo shärye wšo. Eni wšeni ga domer owa ši ichozî to bomi tjrëko dwayo, nopga to šöng ðëbo owa shäryë baîya dik ðëm wšo, pjãy iara Sbörë ber šöng owa eni ðëm kjîshko. Eni ga pjãy ber šöng pjšung shosho tjagšën, shäryak ba uukkšo tjok ðëm wšeni. Cristo zröraba bi kjîshko tjän, öng wšêp ushko so ðgwokšë zröya judíogarë Israel tjëyoga döktong tek Egipto kjokyo dwayo dbaryo shrëkkšo kong wšeni. 8Ba dbar ši shrëyashko ga pjšung shosho uukkšo tjok ši dbuya šok, ãska shärye ba uukkšo tjok ðëm wšo. Eni wšeni ga bi dözšong dbaryo ši shrëy wšo ga woyde ga ðëbo owa shäryoroy dënashko ši shäryëy ame, shji ber šöng wotjšîk bëy jšõkoyo wšo. 9Shji orkwosmono ë tjok ðëm ga shji pë ba tjok ðëme. Pjãy opkjos nopga ðëbo owa shäryë eni ši shwoy dwayo. Toror bomi kong kjibokwo ichoror jek bomi kong bäm go ši go. 10Gueniyo toror enishko ga nopga Sbö miydë ðëm wšeniyo šotë ðëme. Shäryëmi eni wšo kjwe ga pjãy opshik kjok ëre kjing go dwayo kjšuwe, epga uunkong ðëbo owa shäryë eni kjîshko. Epga wotjšîk dbur töng ba kong erö, obšë jyãpgwe, ðëbo šûyotke wšo, sböpga jyãgšo poshrëya šok bakoe. 11Tjšõkwo toror bomi kong ši, e pjšoðgwer woydë kjibokwo ëre go. Bomi pjeyo Jesús tjšõkwo kjraga jëk shäng owa eni ga pjãy opkjë ba shwoy dwayo. Kjone kjone pë no orkwosmono ba tjok ðëm ši tjok, wotjšîk dbur töng ba kong erö, sböpga jyãgšo poshrëya, obšë šãywe owa, nešõtkë ä, obšë jyãpgwe, ba ðëbo šûyotke wšo. Bomi pjeyo Jesús tjšõkwo kjraga jëk shäng owa eni ga pjãy ië ba tjok ëmdë ðëme. 12Nopga bi pjeyoga ðëm wšeniyo ðgwey ðëme. Ba ðgwega ši, e Sbö. Gueniyo nopga jëk šöng bomi tjok eshko ši ðgwezîa. Sbö tjšõkwo tak pjang eni: “Domer owa shäng bomi tjrëko ši ichozî toe.”

will be added

X\