1 Corintios 4

1Eni ga tjawa Cristo parkaga šozîa. Tjšõkwo jnek tjeng pjir ši šara Sbörë borwa kong, ga tjawa iara beno šöng ba šë oba kong. 2Eni ga ëye kong pak twara ga woyde ga shärye yõtso, jšõkoyo, woyde pak twaga širë sorë ši eni. 3Tja ðgwega pjãydë, ðëm ga tja ðgwega nopgarë wšeni ga e bor kong ga ðëno ðëme. Tja opðgwek om go ðëm bakoe. 4Ðëbo pjšú miydër ši shäryër eni šër bor pjšúshko. Gueniyo bor kong ga ðëno ðëm bakoe. Bor ðgwega ši, e Tjšapga Jesús eröe. 5E kjîshko ga no obšë ðgwemi ðëm, äär jong no ðgwezšong dbaryoshko jã. Tjšapga ši tjwe iröng obi dbaryo ši koshozî dey. Eshko dbaryo ga ðëbo jnek tjeng kjok ro sî roy wšeni ši shiya äär ber wêšëshko, no wotjšîk ba pjšúshko ðë ši, e shiya ber eni bakoe. Eshko ga kjšara kjšara poshrëya Sbörë om go, ba pak shäryara sorë ši kjîshko. 6Pjeyoga, “Ðëbo shäryëy ðëbo tak šok ši kjinmo ðëme” šëba eni îyado. Ðëbo ëre šër bor kjîshko, Apolos kjîshko, ber pjšú bomi kong wšo, pjãy opping tjšõkwo ëre shäryë pjšú wšo. Eni ga bomi pingga, bomi kägäyo, e pjšú, obšë kjinmo woyotjšîmi ame. Shji krë eni ðëme. 7¿Pjãy tjwšõ ara, obšë kjinmo šaga ërë? ¿Pjãy krë ðëbo tjeng bomi tjok ši kjîshko ega? Ðëbo kjroromi kës ši, e twaga Sbörë om go bomi kong. 8Pjãy wotjšîk ga ðëbo uunkong tjeng bomi tjok tjän šëmi, ðëye obšë woydëmi ðëme. Pjãy wotjšîk ga pjãy šöng pjšupga wšeni tjän, gueniyo shji eni ðëme. Woydër ga pjãy pjšupga wšeni jšõkoyo, tjawa ber eni bomi tjok bako wšo. 9Bor kong ga tjawa Sbö tjšõkwo roy šagaga Jesús ãska ëre kong shto wšêna Sbörë tjwšõ ðëm wšeni. Tjawa iara beno šöng zrökoba wšo, ga nopga uunkong tön šöng ðëye wen borwa tjok ši îya šok wšo, Sbö parkagaga kjok dogo so tön šöng borwa îk wšo eni bakoe. 10Cristo tjšõkwo roy šërwa oba kong kjîshko ga tjawa kä ðëm wšeni, tjawa dbo ðëm bakoe šëba. Gueniyo pjãyda wotjšîk ga pjãy töno beno tjeng Cristo tjok kuzong ga pjãy kjok miydë ara, dbo ara šëmi eni. Pjãy tjwšõ ara šëba, gueniyo tjawara îywaba shjiktëng. 11Eerishko ga tjawa šöng song, tjawa pjši kuk ara, tjawa wodogro, tjawa shwong ðëm, tjawa shdungoba ara, tjawa u dret bakoe. 12Tjawa sjeno parkorbo borwa orkwo om go go. Tjawa šëba owashko ga kar dboryërwa pjšú; tjawa shdungobashko ga kurwa kjinge; 13tjawa šãywëba owashko ga kar dboryërwa yõtso. Eerishko ga tjawa oba kong ga tjwšõ ðëm, shkimkwo sho wšeni, ðëbo owa dbukko wšeni šëba. 14Tjšõkwo ëre tër bomi kong, pjãy šökkjrë e go wšo ðëme. E bomi poshdunggšo, pjãy bor wapga woydër ara wšeni kjîshko. 15Pjãy töno beno tjeng Cristo Jesús tjok tjšõkwo roy pjšú ši šoror bomi kong bäm go kjîshko. E kjîshko ga pjãy Cristo tjšõkwo pinggaga dogšo sak dbäw dbäw pjšogšo sak kjwara (10,000) ëmdë ga pjãy dataga ara ðëm, bomi data kjšaraso wšeni ši, e tja. 16E kjîshko ga rokër bomi kong ga pjãy opshäryos botoya dik. 17Timoteo, e ichër jek bomi shwoy, pjãy jëk sorë še bomi kong wšo. E bor wa wšeni, e woydër ara, e parkë shäng Tjšapga Jesús kong pjšú îyado. Tja jëk shäng Cristo Jesús tjok sorë ga woyoshre bomi kong. Tjšõkwo šër shäng Jesús tjšõkwo kjragaga kong kjone pogo ši, e še bomi kong bakoe. 18Pjãy kjone kjone krë ara, pjãy în äär ame šëmi kjîshko. 19Gueniyo ga woyde Tjšapgarë wšeni ga tja jek äär bomi îk wop äe. Eshko ga nopga krë ara ši sorë în wêšë, dbo twara Sbörë ba kong jšõre, de tjšê sopga erä, e miydër pjire. 20Ëye parkë ba pjšuyo Sbö ši kong ga woyde ga tjšê erä ðëm, dbo twe ba kong ðëye še ši shärye eni wšo bakoe. 21¿Ðëye woydëmi? ¿Woydëmi ga tja jek bomi shdunggare, de tja jek äär shäng wopjšú bomi tjok, pjãy poshrër wšo?

will be added

X\