1 Corintios 13

1Tja tjšê nopga tjšõkwo kjring kjwobi go ga pjšú, ga tja tjšê Sbö parkagaga kjok dogo so tjšõkwo go ga pjšú bako wšeni ëmdë ga obšë woydër ðëm ga tjšõkwo šër ši ber tjwšõ ðëm, sbi ðë toroy ši pjšukyo wšeni, pjankwo shporoy ëng go ši pjšukyo wšeni bakoe. 2Tja kong kjok miydë twara Sbö Sëyarë bor kong, Sbö tjšõkwo šër oba kong pjšú wšo, tjšõkwo tjeng kës pîyde Sbörë ðëm obi ši miydër shäng pjir, tja mär Cristo go jšõkoyo, ga dšup ðë ichër jek kjok shto obšë ga pjšú wšo wšeni ëmdë ga obšë woydër ðëm ga tja tjwšõ ðëme. 3Bor ðëbo tjeng kës ši tworor nopga song wšeniyo kong, ga bor doyo ëre opyono beno sukoba wšo wšeni ëmdë ga obšë woydër ðëm ga tja potjwšêkkšo drete. 4Shji obšë woydë ši eni. Ðëbo shärye obšërë bi kongshko ga kuy kjinge. Shji wopjšú obšë tjok. Shji wotjšîk owa obšë kong ba ðëbo kjîshko ðëme. Shji opposhrëk ðëme. Shji krë ðëme. 5Shji tjšê iir go ë kong ðëme. Shji wotjšîk bi kjîshko dö ðëme. Shji iirkë mašing ðëme. Ðëbo shäryara obšërë beno bi kong owashko ši woyotjšîy sök enido ðëme. 6Ðëbo shäryëba owa obšë kong ga shji ber wopjšú e kjîshko ðëme. Shji ber wopjšú, ðëbo shäryëba bek ši kjîshko döe. 7Obšë dir ara ëmdë ga shji ber šöng pjšú ba tjok, shji wotjšîk pjšú ba tjok, koshëy îyado ðëbo pjšú shäryë wšo, rayëy ðëm bakoe. 8Shji obšë woydë ši, e pjir ðëme. Eerishko ga kjone kjone Sbö tjšõkwo šaga, kjone kjone tjšê tjšõkwo miydë ðëm ši go, kjone kjone tjšõkwo pîyde nopga kong ðëm ši miydë pjšú bakoe. Gueniyo ðono ga ðëbo tjeng kës ëre pjir. 9Eerishko ga Sbö tjšõkwo miydëy uunkong ðëm obi. E kjîshko ga ba tjšõkwo šagaga omšë uunkong ga äe. 10Gueniyo ðono ga ba tjšõkwo tjeng kës ši pîya Sbörë uunkong kong. Eshko ga ëye obšë ping ba tjšõkwo go ame. 11Tja chirawashko ga tja tjšê kjwozirwa dik, tja wotjšîk kjwozirwa dik bakoe. Gueniyo tja öötong domershko ga ðëbo kjwozirwa î ši rayoror pjir, shäryër ame. 12Shji opîk opîkkšo goshko ga ðëbo îgöy wêšë ðëme. Eerishko ga Sbö tjšõkwo woyotjšîyshko ga miydëy wêšë ðëm eni bakoe. Gueniyo ðono ga miydëy wêšë, shji šan obšë tjok ëng bokshto wšeni. Eerishko ga ðëbo miydëy ara ðëme. Eshko ga miydëy uunkong, shji miyde Sbörë sorë ga eni. 13Eerishko ga ðëbo shäryëy wšo ši, e beno kjringgwo mya. Woyde ga shji mär Cristo go, e koshëy îyado, obšë woydëy bakoe. Gueniyo shji obšë woydë ši, tjwšõ arayo ši e.

will be added

X\