IPESON 6

1Yes idwe, korimasi ikauriakakus kotoma Ejakait, naarai ibus ŋin. 2“Koyoŋite papakon ka totokon” ŋes aicorakinet nasodit naejai aisumunet, 3“tetere ijai ejok ido ibusi kakwap.” 4Yes da lukapapa, sirikitunyunyuranakis ikusidwe, konye kosaenenete kes kariemiriem ka aituutoor naka Ejakait. 5Yes ibulesin, korimasi ŋul lueraas ijakakus kwape ejaar akuan, kakurian ka amaran kaipioror naka itauonokus, kwape irimatar Kristo; 6mere bala kaijaanakin nakokuju kwape luitojokito ituŋa, konye kwape ibulesin luka Kristo iswamaenenete nuekot Edeke kotauon, 7ijaanakinete kaiyalama, bala ijaanakinete Ejakait, kwabo mere ituŋa, 8kojenete ebe nuejok nuiswamai ituŋanan, ŋes einakinio bobo kama ejai Ejakait, arai erai ebulesit, arai bo erai loijakakai. 9Yes da ijaka, kiswamanakinete kes kwape kwaŋin, kinyeis aitukurian, naarai ijenete ebe ejai Ejakaitikec ka lokus toma akuj, kwabo emamei atiakit ituŋa kamakeŋ. 10Nukawasia, kojaas kagogoŋ toma Ejakait, kotoma ailerit naka agogoŋuke. 11Konapata lujiis kere luka Edeke, tetere ipedorete abwoikin ibotei luka Satana. 12Naarai mam kiwuta kaokot ka akuan, dimarai ka ikayaitok, ka lukapolou, ka lueyaito akwap naka amuton kana, ka ajoresio nuka imoyon luka aronis, luejaas toma aiboisio nuka akuj. 13Kanuka ŋun kolemutu lujiis kere luka Edeke tetere ipedorete abwoikin kapaaran nakaronis, ido kidau aswam kere, aibwo. 14Aso kobwaata, koenito akusiŋabes kabeit, konapito yenikatorob yenika adolit, 15konapito da amuk nuka akapakina naka Akiro Nukajokak nuka ainapakin; 16aitelekarit kere, kolemutu ebuku loka aiyuun, loipedoriata aitudeŋ imalia kere luenokete luka lokaronon. 17Kijautu da akopira naka aitajario, ka ekileŋ loka Emoyo, ŋes akirot naka Edeke. 18Kilipenenete apakio kere kOmoyo, kailip kere ka aiŋaiŋa. Kanuka ŋun kokwenyenenete kainyikokin kotoma aiŋaiŋaanakin lukalaunak kere, 19ido kanukaŋ da, tetere kainakinio aoŋaar akaituk einer, aitejenikin katitiŋ aiyeiyea naka Akiro Nukajokak, 20nuaraar ekiyakia kotoma orikoi; tetere enera katitiŋ kotoma kaŋun, kwape kebusakinitor einer. 21Konye tetere ijenunete kwape ajaar eoŋ, ka nueswamai, ebuni Tukiko onac lominat, ekejaanakinan da lomunot kotoma Ejakait aitejenikin yes akiro kere. 22Ejuk ŋes mamakus kanuka ŋun, tetere ijenunete kwape kijaar, ŋes da italakari itauonokus. 23Kojai ainapakin mama ejaas iinacan, ka amin, nepepe kaiyuun, nuepote kama ejai Edeke Papa, ka Ejakait Yesu Kristo. 24Kojai asianut mama ejaas ŋul kere lueminasi Ejakaitiwok Yesu Kristo kamina namam iŋoŋar.

will be added

X\