1 TIMOTEO 6

1Kere lueraas ibulesin kwap kajookot, koomitos ijakakec araut luibusakinito ayoŋio kere, kinyek ekiror loka Edeke ka aisisianakin da ainyanakinio. 2Ido luejaas ijaka luiyuunito, sirikemwaŋata kes, naarai eraas iinacan, konye gwai kiyatakis aijaanakin kes, naarai luedumunete ajokis naka aswamukec eraas luiyuunito, luminan da. Kisisianakin ŋun, kicor da. 3Arai isisianakini ituŋanan nuegelara komam enupit akiro nuejarete nuka Ejakaitiwok Yesu Kristo, ka aisisianakin da naetupit ayoŋit Edeke, 4edakunun, komam ejeni akirot, konye edek ipegeta, ka ijiisio luka akiro, mama eponiata ekokote, aŋolopa, ainyanakin, aomoom nueroko, 5iceleta luka ituŋa luamunaar acoakec, lualemar abeit, lueomito ebe ayoŋit Edeke ŋes adumun ameda. 6Konye ayoŋit Edeke nepepe kalakara ŋes ameda naepol. 7Naarai mam kiyaunit ibore toma akwap, ido mam kipedori ayaŋaar ibore; 8konye kijaa ka inyamat ka inapen, kalakaros kaŋul. 9Konye luekotos abar ebirokinos acodunio ka atacit, ka eimiel loepol loemamei acoa ka loimadiŋi da, aitulum ituŋa toma aolior ka amudiar. 10Naarai amin apesan ŋes aliasit naka aronisio kere; ejaas ituŋa luiŋaŋatos ŋun, kesodete kitapaaros anyoun kotoma aiyuun, kicumakinos cut kican luipu. 11Konye jo, wu etuŋanan loka Edeke, koker ŋun, kotupenenei adolit, ayoŋit Edeke, aiyuun, amin, atitiŋikin, ka aiyapepera da. 12Koji ejie lokajokan loka aiyuun; kitiŋ aijar naka ikar kere, nakinyarakinitai, nailimorit alimoret naejok kakonyen nuka ikajenak luipu. 13Kecori jo kakonyen nuka Edeke loeinakini kere aijar, ka Kristo Yesu loetejenuni alimoret naejok mama ejai Pontio Pilato, 14kidarenenei aicorakinet komamei akemer, komamei da aitoronet, kiton atakanun naka Ejakaitiwok Yesu Kristo; 15naitodikini kapakioke Elopet apedor ediopet bon loituritoi, Ekabaka loka ikabakan, Ejakait da loka ijaka, 16lobon ejai amamus atwanare, loiboie toma aica namam edolokinio, lomam idiotuŋanan eanyunit, emamei da yenepedori aanyun. Kojai aibuses ka apedor naka ikar kere mamakeŋ, Amen. 17Kicorenenei lukabarak luka ikar kalu kinyeis aitopoloor, karaida amunokin abar namam erai naduc, konye komunokinos Edeke, lokiinakini oni iboro kere kabarara tetere kisiyalamanakin kaŋun, 18Kiswamata nuejok, kobarata kotoma aswamisio nuejok, koraas ikakorak, ikamorak da, 19kidiasete bonik apetetait naejok kanuka apaarasia nuepote, tetere itiŋete aijar naerai aijar obe. 20Wu jo Timoteo, kidar nakititinitai. Kinacite akiro nutai numam eraas nuka edini, ka airebokin akiro nuenyaritai aijen kotoma aiŋal, 21ejaas icetuŋa lualimosi ŋun, kosodete apaar kotoma aiyuun. Kojai asianut kayes.

will be added

X\