1 TIMOTEO 5

1Sirikitoron ekimat, konye kicorenenei kwape papakon; ikatumunak kwape iinacan, 2amakio kwape nukatoto, akatumunak da kwape ainacan, kotoma asegara kere. 3Koyoŋit apuserun nueraas apuserun cut. 4Konye apuserut arai ejaas kidwe arai itatai, kisiaunete aisisia ayoŋit Edeke kokaliakec, ka atacakin ikauriakakec; naarai ecamunitai ŋin kakonyen nuka Edeke. 5Konye ŋin naerai apuserut cut, kinyeinai bon, emunokina Edeke, kosalak aiŋaiŋa ka ailipenen akuare ka apaaran. 6Konye ŋin naeminakinito aboliasio, etwanit karaida kejari. 7Kicorak kes ŋun da, tetere eraas nuemamei aitoronet. 8Konye ituŋanan kere arai mam idari lukeŋ, aitelekarit lukokaleke ilopet, aŋer ŋesi aiyuun, erono da adepar yenimam iyuunit. 9Siriwadikao apuserut namam edolit ikar akaisakanykape, nakerai aberu naka ekiliokit ediopet; 10itejenunitai kanuka aswamisio nuejok; arai esait idwe, arai abu kisukuny ipejok, kilot akeje nuka lukalaunak, iŋarakinit luiticanio, arai da edunyit atupit ŋiniswam kere naejok, 11Konye koŋer aiwadik apuserun nukatumunak; naarai naiyatakiniata aipaliikin Kristo, ekotosi adukokin; 12egwaunete akiro naarai enyeis aiyuunikec nasodit. 13Bobo da isisiaunete araut nuebwalaka, kirimete otogoi; kwabo mere nuebwalaka bon, konye ibeeleaka ka nuiramaaka da, inerasi numam ibusakinito. 14Aso akoto apuserun nukatumunak adukokin, kouriata idwe, koyaito ikalia, komam einakinete lokasurup apak naemoromoroo. 15Naarai ejaas kwana ace nuapaasi atupar Satan. 16Arai ejaas aberu naiyuunit apuserun, kiŋarak ŋin kes, kinyeinai alaŋirikin ekanisa, tetere iŋarakini nueraas apuserun cut. 17Kimarakinai imakio lueyaito ejok araut luibusakinito ayoŋio irwan aarei, ido aitelekarit luitaaritos kotoma akirot ka aisisianakin da; 18naarai ebala naiwadikatai ebe, “Sirikien aituk naka emoŋ loipudapudai aicom akima.” Ebe da, “Ekeswaman ibusakinit ekeropit.” 19Sirikicam yeniwosai ekimat, dimarai kama ka ikajenak iarei arai iuni. 20Luediakanarete kitoron kakonyen nuka ituŋa kere, tetere luce da eyoŋete. 21Kecorakinit kakonyen nuka Edeke ka Kristo Yesu, ka imalaikan luseuna koricit ŋun komam isunyit aitub, sirikiswama akirot kere kotiakite ituŋa. 22Sirisunyit aidokokin ituŋanan kere akanin, karaida aimor adiakanareta nuka ituŋa ice; kidarakina kosegara. 23Sirimasenenei bobo akipi bon, konye komat ediobino kanuka akoikikon, naarai idekanakin da irwan ipu. 24Ideleleete adiakanareta nuka icetuŋa, kiŋarenikinete kiton atubokinio; konye nuka ice ideleleunete kokau, 25Kwape kwaŋin da ideleleete aswamisio nuejok; karaida ŋun numam ideleleete, mam epedorete aibwaio.

will be added

X\