1 TIMOTEO 3

1Namunot akirot na ebe: Arai eŋaŋat etuŋanan araun ekaanyanaran, imiela aswam naejok. 2Aso ibusakinit ekaanyanaran araun loemamei aitoronet, ekiliokit loka aberu adiopet, loitikokina, loecoit, loiyapaara, loisukunyikini ipejok, loejeni aisisianakin, 3lomam emer, lomam ibuŋai; dimarai lokaiyapepera, lomam eŋolopana, lomam emin apesan; 4loeyait ejok lukokaleke, loitononokikini ikedwe kaiyapaara kere; 5naarai arai mam etuŋanan ejeni ayait lukokaleke, ikwaikini ai imukei ekanisa loka Edeke? 6Mere ekeyuunan lokitetet, kinyek adakunun, ka aibirokin otube loka Satan. 7Konye ibusakinit lukokiŋa aitejen nukajokak kamakeŋ, kinyek aibirokin amorosit, kotoma atacit da naka Satan. 8Ikejaanakinak kwape kwaŋin kiyapaara, mere luideideok, mere luemasete ajon nuipu, mere luiŋobelete apesan, 9luejai aiyeiyea naka aiyuun kotoma aomisio nuelaete. 10Konye kisiautu ber ŋul da aitemio, kosodete konyet aijaanakin, arai eraas luemamei aitoronet. 11Aŋor da kwape kwaŋin kiyapaara, mere akasabak, nuitikokina, numunon kakiro kere. 12Koraut ikejaanakinak ikiliok luka adiopeberu, lueyaito ejok ikecedwe ka lukokaliakec. 13Naarai luejaanakis ejok, edumakina adoket naejok, ka atitiŋ naepol kotoma aiyuun naejai toma Kristo Yesu. 14Kewadikakini jo nu amuno abunore mamakon atipet, 15konye arai etumori, tetere ijenuni kwape ibusakinitor ituŋa ajaut kotoma otogo loka Edeke, loerai ekanisa loka Edeke lokajaran, epir ka eigaŋet loka abeit. 16Ido komamei abuonokin, epol noi aiyeiyea naka ayoŋit Edeke: Abu kitodiar kotoma akuan, Kitojokai kotoma Omoyo, Apotu imalaikan koanyut ŋes, Aponi kolimonokinai kotoma atekerin, Aponi kiyuunai kotoma akwapin, Kodakarai kuju toma aibuses.

will be added

X\