1 TIMOTEO 2

1Aso nasodit kakere, ecori ebe kiswamaenenete aiŋaiŋa, ka ailip, ka aipur, ka aimal da, kanuka ituŋa kere, 2kanuka ikabakan ka ŋul kere luejaas apolou, tetere kijaun kaijar naitenera, naiyamakina, toma ayoŋit Edeke, ka aiyaparit kere. 3Ejok ŋun, ido ecamunitai kakonyen nuka Edeke Eketajaraniwok, 4loekot ituŋa kere aitajario, adolokin da ajenun abeit. 5Naarai ejai Edeke ediopet, ejai da ekadiekan ediopet loka Edeke ka ituŋa, ŋes etuŋanan Kristo Yesu, 6loabu koluŋakin araun alakunet kanuka kere, aitejenunet naejaun kapakioke. 7Kebwaikinitai eoŋ araun ekalimonokinan, ekiyakia da kanuka ŋun, (enera abeit, mam eŋalai) ekesisianakinan loka Imo kotoma aiyuun ka abeit. 8Ŋes akotor ikiliok ailipenen kotoma ŋiniibois, koriorito akanin nukalaunak komamei anyunyura karaida aŋolopa; 9kwape kwaŋin da aŋor kisirete anapito nuibusak, kaitasono ka acoit, mere kaicip itim, karaida kesabu, karaida ilulun, karaida igoen luketiai, 10dimarai kaswamisio nuejok, kwape ibusakinitor aŋor nuelimorete ebe eyoŋito Edeke. 11Kisisia aberu kaiyamakina kanonokikinit kere. 12Konye mam esiikinit aberu aisisianakin, karaida ayait ekiliokit, dimarai aiyamaara. 13Naarai kisiau Adam asubio, kosodi konyet Keba. 14Bobo da mam Adam kijodijoditoi, konye Keba ejodijoditoi, kojaikin aibucar. 15Konye itajario aberu kanuka auruun idwe, arai esalete kesi toma aiyuun, ka amin, ka alaunit nepepe kacoit.

will be added

X\