MAYƆS MA AŊSOM 20

1Kədarəŋ ka ma aŋyagba aŋe aŋ poŋ-e, Pɔlȧŋ ɔ som kətela aŋkarande, kɔ bȧkəs ŋa təbuth, ɔ lemnɛ ŋa, kɔ wur ri tə kəkɔ ro Masidoniya. 2Ma ɔ po kɔth kɔth ka ɛgbap ɛye-e, ɔwa ɔ po sɔŋ ŋa ɛmaŋ ɛgbathi-e, ɔ der ro Kris, ro ɔ yirȧ yof ɛsas. 3Ma ɔ pai tə kəbȧkȧ rə ȧbil tə kəkɔ ro Siriya-e, ɔ fir kəpa aŋYuda aŋ səth kɔ kɔ botəs tə kəkalanɛ ro Masidoniya. 4Ɔwa Sopita ɔwe ro Beriya, Aristarkɔs yi Sɛkɔndɔs ŋa ro Thɛsalonika, Kayɔs ɔwe ro Dabi, yi Timɔthi-əŋ, dɛ yi Tikikɔs yi Trofimɔs ŋa ro Asia sɔ aŋ paya kɔ. 5Kɛrɛ aŋe aŋ təmȧ su kədi, aŋ bɔ kar su ro Troas. 6Ɔwa saŋ sə wur ro Filipay rə abil kədarȧŋ ka amet ma kabo kəpaŋi ɛgbith, ɔwa ka mərey tamath sə bəp ŋa ro Troas, ro sə ba mərey tȧmthədɛrəŋ. 7Ka ȧŋrey ȧtɔtɔkɔ ŋa ȧŋyik, ma sə gbanɛ dɛr rɔkin tə kəsiməth kəbo-e, Pɔlȧŋ ɔ fɔfȧnɛ ŋa, kɔ botəs tə kəkɔnɛ ka ninaŋ, ɔ kȧl bȧsər fɔfȧnɛ ŋa haŋ kəren datɔŋ. 8Ɛmothȧ ɛgbȧthi ɛ yi ka ȧŋkonko rokɔm ro sə po gbanɛ. 9Ulaŋgba ulɔm ɔwe ba ȧŋes ŋa Yutikɔs ɔ yirȧ ka aŋwinda, ka mərey mə bȧk kɔ, ɔwa ma Pɔl ɔ bȧsər gbo kəfɔf-e, mȧrey mə thasər kɔ, kɔ ranthəmɛ, ɔ fumpɔ ro thɔf kəwur ka andɛk aŋa bekȧ ɛsas, ka a gbasi kɔ ufi. 10Ɔwa Pɔlȧŋ ɔ thor, ɔ fumpər kɔ, kɔ mampəlanɛ kɔ, ɔ pa, Te nu soli, aŋesəm ŋɔŋ aŋ yi ri ras. 11Ɔwa ma ɔ kȧl gbep-e, ɔ siməth kabo, ɔ di, ɔwa ɔ kȧl fɔfȧnɛ ŋa ɔwoni haŋ pə sɔk, kɔ kɔnɛ tɛn. 12Ɔwa aŋ kȧrȧ ɔlaŋgba ukəli, ka pə bɔnɛ ŋa ɔthasər. 13Kɛrɛ ma saŋ sə təmȧ kədi-e, sə bȧkȧ ro bil tə kəkɔ ro Asɔs, rə sə nanɛ Pɔl ɔ tə bȧkȧ; kotȧy-e ya ɔ botəs ti, kɔn kɔnɔnɛŋ ɔ nanɛ tə kətȧŋ ro gbaŋ. 14Ɔwa ma ɔ bəp su ro Asɔs-e, ɔ bȧkȧ, ka sə der ro Mitilinɛ. 15Ma sə wur ri-e, ka ȧŋrey alɔm sə bek ro Kiyɔs; ɔwa ka ȧŋrey aŋa tanda-e, ro Samɔs, ɔwa ka ȧŋrey aŋa kȧl tȧndȧ-e, sə bek ro Militɔs. 16Ȧtesoma-e Pɔlȧŋ ɔ po botəs ti tə kəthas ro Ɛfisɔs kȧmȧ ɔ te ba kəwon ro Asia; kotȧy-e ɔ timɔnɛ kȧmȧ bepi ɔ gbəli-e, ɔ bek ro Yerusalɛm ka ȧŋrey ŋa Pɛntikɔst. 17Ɔwa kəwur ro Militɔs-e, ɔ som ro Ɛfisɔs tə kətela aŋbȧki ŋa aŋchɔch. 18Ɔwa maŋ po der ro rɔŋɔŋ-e, ɔ pa ro ŋaŋ, Naŋ nə tȧrȧ katəp ka ȧŋrey ȧtɔtɔkɔ aŋa i wɔŋ ro Asia, to matanɛ ma mi mə yi kətɔŋ ka nu alɔkɔ bɛ, 19ma i bȧtho ɔMarki yi ȧmerȧ athoranɛ, yi mantər məgbathi, yi ȧŋsɔmpanɛŋ aŋa ɛyaŋfa ya aŋYuda ɛ kȧrȧ mi; 20to i te tey tə kətɔri nu tȧy o tȧy ȧtȧ gbəli mar nu, kɛrɛ i thəksa nu gbafəth, ɔwa rə aseth o seth 21i seri ka aŋYuda yi aŋKrik kathupi ka Kuru, yi kȧlanɛ ka ɔMarki kȧsu Yisɔs Krayst. 22Ɔwa ka-ake, kəla, i kɔ ro Yerusalɛm yi ȧmerȧ asekəranɛ dɛ yi kəte tȧrȧ ȧtȧ ba kəbəp mi ri; 23pəthas gbo rə kəpet o pet ɔYina məsəm ɔ seri mi gbafəth kəpa tərəŋka yi ɛsɔmpanɛ ɛ kar mi. 24Kɛrɛ mȧtȧy ame mə yɔ hɛ i borȧnɛ, ɔwa i gbasi hɛ aŋesəm a mi mɔ rəka rəbaki mɔlɔ ta ȧtȧ mi, kaŋka gbo i gbəli gbanthi ȧŋbara a mi yi məbɔnɛ, dɛ yi mapanth ama ɔMarki Yisɔs ɔ sɔŋ mi, tə kəseri ȧkɛra kəfinɔ ka ȧŋboŋa ŋa Kuru. 25Ɔwa ka-ake, kəla, i tȧrȧ kəpa na bɛ-e, kətɔŋ ka aŋa i la kɔth kɔth tə kətaməs rȧbȧy ra Kuru-e, nə ba hɛ kənəŋk ader ra mi sɔ. 26Tiyȧŋ i seri nu thonɔŋ kəpa minɛ i yi ugbəraŋ ka mȧtir ma afəm bɛ. 27kotȧy-e i la hɛ tey kətɔri nu tȧteŋ ta Kuru Məsaba bɛ. 28Tiyȧŋ botnɛ nu, ɔwa kȧl tȧmtȧmnɛ ta akuthi bɛ ka aŋa ɔYina məsəm ɔ po bot nu aŋkəlɛnɛ-e, kȧmȧ nə wɔnthər aŋchɔch ŋa ɔMarki aŋa ɔ po wai ka mȧtir mɔŋ gbeŋ. 29I tȧrȧ kəpa kədarəŋ ka kakɔnɛ kȧmi təthɔlu təbaŋ aŋ tə wɔŋ kətɔŋ ka nu, aŋa mə te ba ȧney ta akuthi. 30Ɔwa afəm aruni aŋ tə yokanɛ kətɔŋ ka nu gbeŋ, ɔwa aŋ tə fɔf mȧtȧy məkənə kȧmȧ aŋ liŋanɛ aŋkarande. 31Tiyȧŋ bum nu, ɔwa kala nu ɛmerȧ kəpa gbɛs pali-əŋ, mɔlɔ ma təren təsas, i tey hɛ kəmaŋ wuni o wuni yi mantər. 32Ɔwa ka-ake i lȧnki nu ka Kuru yi ka ȧrim ra ȧŋboŋa ŋɔŋ, ara ba afɔsɔ tə kəbaksər nu, dɛ yi tə kəsɔŋ nu ani kətɔŋ ka ŋaŋ aŋa a po səməs. 33I la hɛ fela akala ȧferȧ, abɔŋɔ thalɔm ɛlopra ya wuni o wuni. 34Naŋ nə tȧrȧ kəpa mȧta ame mə po sɔthɔnɛ ara i yema, yi ta ŋaŋ sɔ aŋa yi yi minɛŋ. 35I po sɔŋ nu amɔl ka mȧtȧy bɛ, kȧmȧ mɔ mə nə yɔ məpanth mɔ minɛŋ-e, nə yi tə kəmar aŋa te ba afɔsɔ, yi tə kəkala ȧmerȧ ka ȧsim ta ɔMarki Yisɔsȧŋ ma ɔ pa, Kȧsɔŋ kə ba aruba pəthasi kasɔthɔ. 36Ɔwa ma ɔ po fɔf yaŋ-e, ɔ sɔ təwu, kɔ ramnɛ yi ŋaŋ bɛ. 37Ɔwa ŋaŋ bɛ aŋ bok kəbok kəbana, aŋ mampəlanɛ kɔ ro lim, kaŋ muməl kɔ. 38Pə tha nɔsinɛ ŋa bɛ ta ȧsim ȧte ɔ kanɛ ŋa kəpa aŋ ba hɛ kənəŋk ader rɔŋ sɔ. Kaŋ paya kɔ ro bil.

will be added

X\