FILIPOS 1

1Ju quitʼin icPablo chai quintʼavi ju Timoteo. Ixlapanacni ju Jesucristo icjuntau. Chai iclamacʼamiyau ju uxijnan ju lhinonatʼit lacatalhavat chai ju aʼaktʼaiʼununatʼit lacatalhavat ju talhilacaʼanta ju Cristo. Vachuʼ iclamacʼamiyau tachi chun ju aliʼin uxijnan ju vachuʼ lhilacʼapʼinatʼit ju Cristo Jesús ju vilhchitʼit ju lakʼachakʼan Filipos. 2Ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 3Pus va ta pakchux ju iclapastʼacʼau ju uxijnan icxtakni lakʼailaktsʼiuch ju quiDios ju milacataʼan. 4Chai va ta pakchux ju icsqʼuini ju Dios ju milacataʼan slivasalh na ickʼachan. 5Icxtakni lakʼailaktsʼiuch ju Dios ju milacataʼan ni na lhu aʼaktaijunti xaquilaxtakniyau ni laich xacpumakpitsi ju chivinti ixlacata ju Cristo tus acsni lacʼaʼichitʼit tus chavai. 6Yuchi ju Dios ju taiʼulata ju kʼox lhichʼalhcat ju tanaviniyan ni laich palai alhilacʼapʼinaʼitʼit ju Jesús chai lana iccʼatsai ni yuchi ju catailhiʼanaʼ tus acsni cachinaʼ ju avilhchan acsni caminchokoyaʼ ju Jesucristo. 7Chai lhijunch ni chunchach acpastaclh ju milacataʼan ni laʼixlhichux quiʼalhunut iclamapainiyau. Vachuʼ lhijunch ni aclamapainiu ni va kʼaixtam quintanaviniyan lamapainin ju Dios chai vachuʼ ni quilaʼaktaijuyau acsni ictʼalhnucanta ju chavai. Vachuʼ quilaʼaktaijuch acsni xaclhiʼancanta lacapuʼucxtin chai icʼamavasalanilh ju lapanacni ni stavasalanti ju ixchivinti Dios. 8Pus ju Dios kʼox cʼatsai ni vasalh iclamapainiyau minchuxʼan ju uxijnan. Chun iclamapainiyau tachi ju tamapainiyan ju Jesucristo. 9Ju tucan icsqʼuini ju Dios ju milacataʼan yuchi ni amapʼaininintʼit. Para vachuʼ icsqʼuini ni palai lhu caʼalilh ju mintacʼatsanʼan chai ju miʼamachakxantiʼan. 10Ju chunch aktsʼiya laich asacxtʼuyaʼitʼit ju kʼox. Chai ju chunch salaka aʼunaʼitʼit lamiʼatsucuntiʼan chai jantu amakʼalhkʼosuyaʼitʼit xamatiʼ tus acsni caminchokoyaʼ ju Cristo. 11Ju chunch ju Jesucristo cataʼaktaijuyan ni lai sok atsʼucʼuyaʼitʼit. Chai ni chunch junita ju miʼatsucuntiʼan pus calakʼayacanaʼ ju Dios chai catanonach ju lapanacni ni slivasalh xakʼai ju yuchi. 12Iclacasqʼuinch ji quiʼalakʼavin ni acʼatsʼatʼit ni na lhu takʼasmatlh ju chivinti ixlacata ju Cristo va ixlacaʼatalh ni ictʼalhnucanta ju chavai. 13Pus tachi chun ju ixtaropajni ju ucxtin chai ju aliʼin lapanacni ju ani tavilanalh si tacʼatsakʼojui ni va ixlacaʼatalh ni iclhilacaʼanta ju Cristo yuchi iclhitʼalhnucanta. 14Chai ju chavai na lacatsʼunin ju quiʼalakʼavin ju titatalhanancaʼ. Ju chavai na lhu alin ju palai jokʼat tacʼatsan chai tanajun ixchivinti Dios chai jantu tatalhanan. Chunch talai va ixlacaʼatalh ni talaktsʼin ni quilhistʼacʼa ju Cristo chai yuchi palai talhilhilaksi ju yuchi. 15Vasalh alin lapanacni ju tanajun ju chivinti ixlacata ju Cristo va ixlacaʼatalh ni talhacchaʼani ju tuchi lai xacnavi chai va quintaxcaji. Para ju aliʼin na kʼox ju ixʼatalacpastʼacʼatʼan acsni tanajun ju chivinti ixlacata ju Cristo. 16Ju aliʼin tanajun ju chivinti ixlacata ju Cristo para va ixlacaʼatalh ni va palaich acʼamakʼaninilh tanajun lacapulachʼin ni va yuʼunchach ju palai lhu caʼachʼakʼokʼacalh. Chai aquintamacoyaulh ju quitʼin. Para lana jantu kʼox tachi ju tapastʼacʼa ju yuʼunch. 17Para ju aliʼin lapanacni tanajun ju chivinti va ixlacaʼatalh ni quintamapaini. Tacʼatsai ni icxtaknicalh ju lhichʼalhcat ni acʼamavasalaniyaʼ ju lapanacni ni stavasalanti ju chivinti ixlacata ju Cristo. 18Ju quitʼin ickʼachan mas jantu kʼox talai ju aliʼin. Iclhikʼachan ni aktsʼiya tanajun ju chivinti ixlacata ju Cristo. Chai va tachi ackʼachanach. 19Pus iccʼatsai ni kʼox acxajanta ni sqʼuiniyatʼit ju Dios ju quilacata chai ni quiʼaktaijui ju Spiritu Santu. 20Slivasalh iclacasqʼuin ni jantu tuʼuʼ acnaviyaʼ ju lai aclhimaxananaʼ astan. Pus tachi ju aktsʼiya xacnajun ju chivinti ixlacata ju Cristo chai jantu xactalhanan pus vana va chun aclayaʼ ju chavai. Chai ju chunch calakʼayacalh ju Cristo ixlacata quiʼatsucunti mas acniyaʼ u actitsuculhcaʼ lacatsʼunin. 21Pus ni ictʼajuncaʼ pantsʼiquis pus va lakatam taxtokni ju icnaviputun. Va icnaviniputun ju ixkʼachat ju Cristo. Para ni acniyaʼ pus palai kʼox cajunaʼ ju quilacata. 22Para ni actitsucuyaʼ alacatsʼunin pus laich icʼamalacaʼini ju aliʼin ixlacata ju Cristo. Pus ju chunch jantu iccʼatsai tamalhch ju acsacxtuyaʼ. U acniputunach u jantu. 23Pus na lhu alin ju quiʼatalacpastʼacʼat. Na icniputun ni laich actʼatolanta ju Cristo. Ju chunch palai kʼox cava ju quilacata. 24Para palai tasqʼuini ni actitsuculhcaʼ alacatsʼunin ni laich aclaʼaktaijuyau ju uxijnan. 25Chai ni iccʼatsai ni quilamaktasqʼuiniyaucaʼ pus iccʼatsai ni actsucuyacaʼ alacatsʼunin ni laich aclaʼaktaijuyau ni laich palai alhilacʼapʼinaʼitʼit ju Cristo chai palai alhikʼachʼanaʼitʼit. 26Chai acsni tavanan calalaktsʼinchokoyau pus laich alhilakʼayayaʼitʼit ju Cristo Jesús ni quimaxtulh lacapulachʼin. 27Para aktsʼiya atsʼucʼutʼit tachi ju lhijunch ni lhilacʼapʼinatʼit ju Cristo. Ju chunch mas aclaʼantachau laktsʼinin u jantu para ackʼasmatlich ju milacataʼan ni va tachi lhilacʼapʼinatʼit ju Cristo chai va lakatam untʼatʼit. Vachuʼ ackʼasmatlich ni laʼaktʼaiʼuyatʼit ni jantu tuʼuʼ catamacʼapʼaniyan ni jantu alhilacʼapʼitʼit ju chivinti ixlacata ju Cristo. 28Jantu alakʼaʼitʼit ni catamakʼantalhanayan ju taxcayan. Chai ni taxcayan pus pumachakxacan ni catatsʼankʼakʼalhiyach ju yuʼunch. Chai ju uxijnan ni laich achʼixaʼitʼit tuchi tapumamakʼalhkʼajniyan pus apʼucʼatsʼayaʼitʼit ni yuchi ju Dios ju taʼaktaijuyan chai aktsʼiya catamakʼalhtaxtuyan. 29Pus ju Dios jantu va yuʼ xatalhisacxtuyan ni laich xalhilacʼapʼinaʼitʼit ju Cristo. Para vachuʼ talhisacxtuyan ni laich amakʼalhkʼajnanaʼitʼit ixlacata yuchi. 30Pus ju uxijnan chai ju quitʼin vaklhtam chun mamakʼalhkʼajnicanau ixlacata yuchi. Pus ju uxijnan quilalaktsʼiuch acsni xacmamakʼalhkʼajnican. Chai ju chavai kʼasmatʼatʼit ni vana va chun ju icmamakʼalhkʼajnican.

will be added

X\