1 Ju Jesús tanuchokolh lacabarco chai anchokolh lhimakʼantacutni atantsʼin. Chai chinchokolh laʼixtʼun. 2 Chai lhichaʼanicalh pumatam lapanac ju va ixlacalhtuculunta. Pulhichaʼancalh ju lona. Chai ju Jesús acsni alaktsʼilh ni na ixtalhilaksi ju yuchi ju anuch lapanacni pus chani juni ju takʼankʼan: ―Jantu atʼalhan ji quintsʼalh. Ju miʼalactuʼunti macʼacxanicanta. 3 Para ju aliʼin ju ixtalhatalanininta ju ixlhamapʼaksinʼan ju istʼaʼisraelitanin takʼasmatlh ixchivinti ju Jesús chai tanaulh laʼixʼalhunutʼan ni ma na macxcai chivinti xanajun ju Jesús ni ma tachi Dios ixjumputun. 4 Para ju Jesús cʼatsa tuchi ixtapastʼacʼa chai chani ajuni: ―Tajuch ni va chunch ju pʼastʼacʼatʼit lamiʼalhunutʼan. 5 Ni va acjunilh ni macʼacxanicalh ju ixʼalactuʼunti pus jantu lai pʼucʼatsʼayatʼit ni vasalh alin ju quintachaput u jantu. Para ni acjunilh ni cakʼostavi chai caʼalhtanalh pus ju chunch lai apʼucʼatsʼayaʼitʼit ni alin ju quintachaput u jantu. 6 Pus ju chavai aclamasuniyau ni vasalh alin ju quintachaput ju ani lacamunutpaʼ ni lai icmacʼacxai ju alactuʼunti. Quitʼin ju quimalakachatachilh ju Dios ni lapanac actsucuyaʼ ju ani. Pus ju acsnich ju Jesús chani juni ju takʼankʼan: ―Akʼostʼaʼulh. Asactʼich ju mimputaman chai aʼinchich laminchakaʼ. 7 Pus ju acsnich ju anuʼ takʼankʼan ixjunita taya. Alh laʼixchakaʼ. 8 Chai ju lapanacni acsni talaktsʼilh na tatalhanalh chai talakʼayalh ju Dios ni xtaknilh ju chunch tachaput ju Jesús ni laich caʼaʼaktaijuyaʼ ju lapanacni. 9 Chai ju Jesús taxtulh ju anch chai acsni ixʼanta ju lacati pus laktsʼilh pumatam achʼiniʼ ju ixvi junta amapalanancan. Ju yuchi Mateo ixjuncan. Chai ju Jesús chani juni: ―Aqʼuinchʼakʼokʼach. Pus ju Mateo lana taya chai chʼakʼokʼalh. 10 Pus ju aktam ju Jesús ixtʼajun venaʼ laʼixchakaʼ ju Mateo. Chai na lhu tachaʼalh ju achʼinin chai vachuʼ ju aliʼin alactuʼunin. Chai kʼaixtam tatʼatavi ju Jesús lacamixa. Chaich ju ixʼamamakaʼui vachuʼ anch ixtavilanalh. 11 Para ju fariseonin acsni talaktsʼilh ni anch ixvi ju Jesús chanich tajuni ju ixʼalacmamakaʼui ju Jesús: ―Ju miʼamamakaʼunuʼan tajuch ni va kʼaixtam alactʼavajin ju achʼinin chai ju alactuʼunin. 12 Para ju Jesús acsni kʼasmatlh ju ixchivintiʼan chani alacjuni: ―Ju kʼox tatʼajun jantu tamaktasqʼuini ju acʼuchʼunuʼ. Va yuʼunch ju talactakʼankʼai ju tamaktasqʼuini ju acʼuchʼunuʼ. 13 Alanichitʼit tuchi ju nomputun ju chivinti ju tsʼokcanta laʼixchivinti Dios junta chani najun: “Ju quitʼin iclacasqʼuin ni aʼaktʼaiʼuyatʼit lacaʼamapaininti ju mintʼalapanacniʼan. Jantu va yuchi ni aquilalhikʼailaktsʼinau ju tuʼuʼ atapacxat”. Chunch ju najun laʼixchivinti Dios chai chun ju icnavi. Pus ju quitʼin jantiyuʼ iclhiminta ni acʼalactʼasanilh ju lapanacni ju tanajun ni na soknicʼa ju isʼatsucuntiʼan. Alai icminta alactʼasaniniʼ ju alactuʼunin ni catamacaulh ixʼalactuʼuntiʼan. 14 Ju acsnich ju ixʼamamakaʼui ju Xivan talakmilh ju Jesús chai tasacmi: ―Ju quijnan chai ju fariseonin na paklhu ju ictascajayau. Para ju mintamamakaʼun jantu tatascajai. Tajuch. 15 Ju acsnich ju Jesús chani ajuni: ―Ja laich cataʼamakʼaninilh ju tamakʼanta junta alin ju tamakʼaxtʼokʼat acsni makvilhcaʼ ju anuʼ tsʼalh ju catamakʼaxtʼokʼaʼ. Pus vana va chunch ju quintamamakaʼun. Jantu tatascajai ni icʼalactʼavilhcaʼ. Para cachinaʼ avilhchan acsni acmakʼosucanaʼ ju ani lacamunutpaʼ. Chai acsnich ju catatascajayaʼ ni na aquintalhamakʼanininach. 16 Jantu xamatiʼ lai lhalakyavanan ju pumpuʼ ju jantu amakpanti chai lai va chunch camucʼalh ju lacakʼatʼili pumpuʼ. Ni chunch calacalh pus va palai makat cakʼexlh acsni talakatumi ju sastʼi pumpuʼ. 17 Chai nin yuchi ni lai acpumuju ju sastʼi vino lacakʼatʼili axtʼakʼan ni na kʼalhpʼasnicaʼ. Ni chunch ju canavicalh pus va cakʼexlh ju axtʼakʼan chai ju vino capuʼankʼolh. Chai ju axtʼakʼan catsʼankʼalh. Alai pumucan ju sastʼi vino lacasastʼi axtʼakʼan. Ju chunch laich pumakʼacan ju vino ju axtʼakʼan. Chunch ju ajuni ju lapanacni ju Jesús. Va ixʼamamachakxaniputun ni jantu lai catilhiyaulh ju makʼaniya ixlhamapʼaksin ju Moisés ju sastʼi ixlhamapʼaksin ju yuchi. 18 Acsni ixtʼajun ajuniniʼ ju lapanacni ju ani chivinti pus lakchilh pumatam xakʼai sia yuʼunch ju ixtachʼalhcatnan laʼixpujitatʼan ju israelitanin. Chai ju yuchi taʼaktsokotanilh ju Jesús chai juni: ―Ju quintsiʼ va pantsʼiquiscaʼ xani. Para caʼauch chai amokslanitʼachiʼ ju mimacaʼ laʼixlacatuna chai catsucuchokoyaʼ. 19 Pus ju Jesús lacataya chai tʼaʼalh. Vachuʼ tatʼaʼalh ju ixʼamamakaʼui. 20 Chai acsni ixtaʼanta ju lacati pus chincha pumatam chakoʼulh laʼixlhipulacan ju Jesús. Chai ju yuchi va tachi ixʼalinta ixtakʼankʼat. Lakacautʼui cʼata ixpacxanta ju anuʼ takʼankʼat. Pus ju yuchi lakchaʼanilh ju ixquilhtuʼ ixpumpuʼ ju Jesús. 21 Chunch ju lalh ni ixnajun laʼixʼalhunut ni mas va yuchi ni calakchaʼanilh lacatsʼunin ju ixpumpuʼ ju Jesús pus palai cajunaʼ. 22 Chai ju Jesús talakaspʼitlh. Laktsʼilh chai juni: ―Quintsiʼ jantu atʼalhan. Ni xaquilhilaksi pus yuchi palai xalhiʼun. Pus ju anuʼ chakoʼulh palai va ju anuʼ pantsʼiquis. 23 Pus ju Jesús acsni chaʼalh laʼixchakaʼ ju anuʼ xakʼai pus alaktsʼilh ju asanin chai ju lapanacni ni na ixtalackʼalhun. 24 Chai ajuni: ―Apʼinchitʼit ju uxijnan. Ju atsiʼ jantu nita. Va lhtatai. ―Chunch ju ajuni. Para ju lapanacni va talhitsʼiʼilh. 25 Para ju Jesús acsni alacxcoxtukʼo ju lapanacni pus tanulh chai macchʼapalh ju anuʼ atsiʼ chai ju yuchi lana kʼostavi. 26 Pus lana laccʼatsakʼocalh tachi ixlhilacaputsʼun ju lacatʼun ju vanin vi ju anuʼ lakʼachakʼan. 27 Chai acsni taxtuchokolh ju Jesús ju anch pus tachʼakʼokʼalh ixtʼiyunʼan alakʼachʼixnin. Pʼas ixtachivinin. Ixtalactʼasai. Va tsa tsa ixtajuni ju Jesús: ―Aquilaʼaktaijuch ji istsʼalh ju kʼai ucxtin David. 28 Pus acsni chinchalh ju Jesús laʼixchakaʼ pus vachuʼ tachaʼalh ju alakʼachʼixnin. Chai ju Jesús chani ajuni: ―Ja lacʼaʼiyatʼit ni laich aclamalacʼavaniu ju uxijnan. Chai ju yuʼunch takʼalhtayanalh. Tajuni: ―Iclacaʼiyau ji ucxtin. 29 Pus ju acsnich ju Jesús achʼapanilh ixlakchulhʼan ju anuʼ alakʼachʼixnin chai ajuni: ―Ni xaquilalhilaksiyau ju quitʼin pus chunchach ju aclanaviniyau. 30 Chai lana taʼalacʼavanalh. Para ju Jesús slivasalh alhimapʼaksi. Chai ajuni: ―Alaktsʼintʼit. Tun xamatiʼ aʼunitʼit tuchʼi xatʼapʼasayatʼit. 31 Para ju yuʼunch acsni tataxtuchalh lana talacquilhuntsuculh tachi ixlhilacaputsʼun ju anuʼ lacatʼun tuchi ixtapasata laʼisʼatsucuntiʼan. 32 Chai acsni tataxtulh ju yuʼunch pus lana lhichaʼanipalacalh pumatam lapanac ju va nunuʼ ixjunita ni ixtanun ju lhacaticuru laʼixlacatuna. 33 Para acsni xcoxtulh ju Jesús ju lhacaticuru pus ju anuʼ nunuʼ chivinilh. Chai ju lapanacni slivasalh na talhamakʼaninilh. Ixtanajun: ―Jantu tavanan laktsʼincanta tuʼuʼ ju chunch ju ani laquilacatʼunʼan. 34 Para ju fariseonin chani ixtanajun: ―Ju ani ya lapanac xcoxtui ju lhacaticuru laʼixlacatunaʼan ju lapanacni laʼixtachaput ju xakʼai lhacaticuru. 35 Pus ju Jesús talacaputocʼalh tachi chun ju kʼai lakʼachakʼanixni chai tachi chun ju lactʼicstʼi lakʼachakʼanixni. Ixʼamalanininch laʼixlacpujitatʼan ju yuʼunch. Ixʼajuni ju lapanacni ni lhinomputun ju Dios laʼisʼatsucuntiʼan. Vachuʼ palai anavi ju lapanacni mas va tuchi takʼankʼat ju ixtapacxanta. 36 Para acsni alaktsʼilh ju lapanacni slivasalh na amapaini ni jantu xamatiʼ ixʼamasuni ju soknicʼa ti. Chunch ixtajunita tachi ju tuʼuʼ borregojni ju va matiʼ ixʼalhistacnaʼan. 37 Pus ju acsnich ju Jesús chani ajuni ju ixʼamamakaʼui: ―Slivasalh na lhu ju xatocʼat ju achʼananti chai na cʼatata para na lacatsʼunin ju chʼalhcatnin. 38 Pus yuchi alhitʼapʼaininitʼit ju xaʼucxtin ju lhichʼalhcat ni camacamilh aliʼ ju chʼalhcatnin laʼixlhichʼalhcat. Ju Jesús chunch ajuni ju ixʼamamakaʼui ni va ixʼamamachakxaniputun ni na lhu alin ju lapanacni ju laich caʼamalacaʼinicalh ixchivinti Dios para na lacatsʼunin ju taʼamalaninimputun.
