MATEO 25

1Ju Jesús tailhiʼalh ju ixchivinti chai naulh: ―Junta lhinajun ju Dios chunch ju tapasai tachi ju tapasalh laʼisʼatsucuntiʼan ixpumacauʼan atsiʼin. Ju yuʼunch tachʼapalh ju ixmaclhcuʼan chai taʼalh pakxtoknin ju tsʼalh ju catamakʼaxtʼokʼaʼ ni vachuʼ va ixtamakʼamputun. 2Pus ixpumaquisʼan ju yuʼunch na ixtanavi cuenta tuchi ixtanavi. Chai ju ixpumaquisʼan jantu. 3Pus ju yuʼunch ju jantu ixtanavi cuenta ju tuchi ixtanavi pus tamujulh ju ixmaclhcuʼan para jantu talhiʼalh aliʼ ju xapumaclhcu. 4Para ju na ixtanavi cuenta tuchi ixtanavi pus talhiʼalh ixmaclhcuʼan para vachuʼ talhiʼalh aliʼ ixpumaclhcuʼan laʼixlumetiʼan. 5Pus ni jantu sai ixchinacha ju tsʼalh ju catamakʼaxtʼokʼaʼ pus na ixtalaclhtataputun ixchuxʼan ixpumacauʼan chai talaclhtatatavilh. 6Para acsni chaʼalh paitat tsʼis takʼasmatnilh ixchivinti ju pumatam ju pʼas naulh: “Mintach ju tsʼalh ju catamakʼaxtʼokʼaʼ. Aʼinchitʼit pakxtoknin”. 7Pus ju acsnich tachi chun ju anuʼ atsiʼin tataya. Tatsuculh lakʼoxinin ju ixmaclhcuʼan. 8Chai ju yuʼunch ju jantu ixtanavi cuenta tuchi ixtanavi chani tajuni ju yuʼunch ju ixtalhiminta ju ixpumaclhcuʼan: “Aquilamachʼixtakniucaʼ lacatsʼunin ju mimpumaclhcuʼan. Ju quimaclhcu quincʼan ni va mixputun”. 9Para ju yuʼunch ju ixtanavi cuenta tuchi ixtanavi taʼakʼalhtayanalh. Tajunich: “Jantu. Ca jantu catilhiva ju quilhichuxʼan. Alai inchitʼit tamonin junta stʼacan. Atʼamaʼutʼit vachuʼ ju miʼanuʼan ju uxijnan”. 10Para acsni ixtaʼanta tamonin ju ixpumaclhcuʼan ju anuʼ ixpumaquisʼan atsiʼin pus lana chincha ju tsʼalh ju catamakʼaxtʼokʼaʼ. Pus ju ixpumaquisʼan ju na ixtalakasivilanalh vachuʼ maktanulh junta xatanui ju tsʼalh ju calhimacʼatanicanaʼ ni catamakʼaxtʼokʼaʼ. Chai lana malacchaucalh. 11Astan tachinchalh vachuʼ ju aliʼin atsiʼin. Chai tajuni: “Quiʼamigo aquilamalhtekʼaniuch”. 12Para ju anuʼ tsʼalh akʼalhtayanalh. Alacjuni: “Slivasalh ju iclajunau. Jantu iclamispayau ju uxijnan”. 13Pus acsni nonkʼolh ju Jesús ju ani chivinti astan alacjuni ju anch ixtavilanalh: ―Vachuʼ chunch alatʼit tachi ju talalh ju anuch atsiʼin ju ixtalakasivilanalh. Vachuʼ alakʼasitsʼucʼutʼit ni jantu cʼatsʼayatʼit tuchi avilhchan u tuchi hora ju acminchokoyaʼ. Quitʼin ju quimalakachatachilh Dios ni lapanac actsucuyaʼ ju ani. 14Alakʼasitsʼucʼutʼit ni chunch ju tapasai junta lhinajun ju Dios tachi ju tapasalh laʼisʼatsucuntiʼan ixlapanacni pumatam makʼaliʼ. Pus ju anuʼ lapanac ixʼamputun makat. Chai acsni jantucaʼ an pus atʼasanilh ju ixlapanacni chai amachʼixtaknilh tachi chun ju ixʼalinta. 15Pus ju pumatam xtaknilh lakaquis milh. Ju apumatam lakatʼui milh. Chai ju apumatam tam milh. Xtaknilh pumatamin tachi ju laich catapuchʼalhcatnalh. Chai astan ju yuchi alh makat. 16Pus ju anuʼ xalapanac ju ixmachʼixtaknita lakaquis milh alh puchʼalhcatnaʼ chai lhajachokolh alakaquis milh. 17Vachuʼ chunch lalh ju ixmachʼixtaknita lakatʼui milh. Ju yuchi puchʼalhcatnalh ju lakatʼui chai lhajachokolh alakatʼui milh. 18Para ju anuʼ xalapanac ju machʼixtaknicalh va tam milh lhiʼalh ju tumin chai quimacnulh ju lacatʼun ni jantu catsʼankʼalh. 19Chai acsni na makʼanch va pus minchokolh ju ixʼucxtinʼan ju anuʼ xalapanacni. Chai ju yuchi tsuculh alactʼaputʼekʼeniʼ. 20Pus ju anuʼ ju ixmachʼixtaknicanta lakaquis milh lakmilh ju ixʼucxtin. Vachuʼ lhiminilh ju alakaquis milh ju ixlhajatach. Chai juni: “Quiʼucxtin ju uxintʼi qʼuimachʼixtʼaknitʼa lakaquis milh. Pus ju chavai acxtakniyan ju alakaquis milh ju icpulhajalh”. 21Chai ju ixʼucxtin juni: “Na kʼox xanavi. Ju uxintʼi na kʼox lapanac unitʼa chai na lai lhilaksicʼan. Laich xalhistʼacʼa lacatsʼunin. Pus ju chavai palai lhu acxtakniyan ju alhistʼacʼaʼ. Atʼanutʼich junta icvi ni laich kʼaixtam cakʼachanau”. 22Chai astan chinchalh ju ixmachʼixtaknicanta ju lakatʼui milh. Chai ju yuchi junilh ju ixʼucxtin: “Ju uxintʼi lakatʼui milh xaqʼuimachʼixtʼaknitʼa. Pus ju chavai iclhiminitan vachuʼ alakatʼui milh ju iclhajata”. 23Chai ju ixʼucxtin juni: “Na kʼox xanavi. Ju uxintʼi na kʼox lapanac unitʼa chai na lai lhilaksicʼan. Laich xalhistʼacʼa lacatsʼunin. Pus ju chavai palai lhu acxtakniyan ju alhistʼacʼaʼ. Atʼanutʼich junta icvi ni laich kʼaixtam cakʼachanau”. 24Chai vachuʼ chinchalh ju ixmachʼixtaknicanta ju tam milh. Chai ju yuchi junilh ju ixʼucxtin: “Xaccʼatsai ni na pʼas ju miʼalhunut ju uxintʼi. Pus alaktsʼich. Yuʼunch ju milapanacni ju tachʼalhcatnan ni laich na lhu cajunaʼ ju micebada. Chai yuʼunch ju talacsununiyan ju micebada ni laich lhu amakʼaixtʼokʼaʼ ju uxintʼi mas jantuch tuʼuʼ talhajai ju yuʼunch. 25Pus yuchi na xaclhitalhoniyan chai jantu xacpuchʼalhcatnamputun ju mintumin. Pus icʼalh. Icmacnulh ju mintumin lacatʼun. Anich iclhiminichokotan ju miʼanuch”. 26Pus ju acsnich ju ixʼucxtin chani juni: “Ju uxintʼi na alactʼuʼunun chai na malheknin. Naʼunch ni cʼatsʼaich ni aliʼin ju tachʼalhcatnan ni laich lhu caʼalilh ju quicebada. Chai aliʼin ju quintalacsununi ju quicebada ni laich lhu acmakʼaixtʼokʼaʼ. Chai jantu tuʼuʼ icʼaxtakni ju yuʼunch. 27Pus ni vasalh chunch qʼuilaktsʼin pus palai kʼox ixva ni ixtʼaknin ju quintumin ju lai tapuchʼalhcatnan tumin. Ju chunch acsni xacmilh xacʼamaklhtayananchokolh ju quintumin chai chux ju isʼaskʼatʼa”. 28Pus ju acsnich ju yuchi ajunilh ju aliʼin ju ixtayanancha: “Atʼaiʼinitʼit ju tam milh. Chai axtʼaknitʼit ju pacxanta lakacau milh. 29Chunch ju alatʼit ni palai lhu caxtaknicanaʼ ju pacxanta tuʼuʼ. Chai ju chunch palai lhu caʼalinaʼ ju ixʼalinta. Para ju matiʼ tuʼuʼ pus cataiʼinicanaʼ ju tuchi najun ni pacxanta. 30Chai ju ani lapanac ju jantu tuʼuʼ ixtapalhni junita amacʼapʼitʼit lacaʼatatsʼisni lhimakspaʼ. Ju anch na lackʼalhuncan chai na malatankʼatsican ju istatsalatʼan ni na tamakʼalhkʼajnan”. 31Ju Jesús tailhiʼalh ju ixchivinti chai naulh: ―Ju quitʼin quimalakachatachilh ju Dios ni lapanac actsucuyaʼ ju ani. Chai acsni acminchokoyaʼ laquintachaput acʼalactʼaminaʼ tachi chun ju quiʼanquilhnin chai ju acsnich acʼamaklhtayananaʼ ju quimpuʼucxtin chai slivasalh xakʼai acjunaʼ. 32Chai catakʼaixtʼokʼach laquiʼucxlacapuʼ tachi chun ju amachakʼan ixlhilacaputsʼun ju ani lacatʼun. Chai ju quitʼin acʼalhvakpitsiyaʼ ju yuʼunch tachi ju navi tam alhistacnaʼ acsni alhvakpitsi ju ixborregojni chai ju ixchivojni. 33Pus ju lapanacni ju soknicʼa alaktsʼin ju Dios catatayayaʼ laquilhicana. Chai ju lapanacni ju alactuʼunun catatayayaʼ laquilhimacx. 34Chai ju acsnich ni kʼai ucxtin acjunaʼ pus acʼalacjunaʼ ju yuʼunch ju tayanalh laquilhicana: “Atʼatʼit ju uxijnan ju taxtaknitan ju kʼox miʼatsucuntiʼan ju quimpai. Atʼanutʼit ju lactʼiyan junta lhinajun ju yuchi ni anch ju talakʼoxinitan tus acsni tavanan navicantacha ju lacamunutpaʼ. 35Pus iclajunau ni apʼinaʼitʼit ju anch ni quilaxtakniu ju quivaiti acsni na xacchavanita. Chai quilaxtakniu ju ickʼotlh acsni na xacquicxixta. Chai quilaxtakniu junta ictavi acsni makat xacmintacha. 36Chai acsni matiʼ ixjunita ju quimpumpuʼ pus quilaxtakniu. Chai acsni na xactakʼankʼai pus quilaquilaktsʼiu. Chai acsni xactʼalhnucanta quilaquilaktsʼiu”. 37Pus ju acsnich ju yuʼunch ju alaktsʼincan ni soknicʼa isʼatsucuntiʼan catajunach: “Para ji quiʼucxtin tas vananch ju iclalaktsʼiu ni va ixchʼavanitʼa chai iclaxtakniu ju mivaiti. U ni ixqʼuicxixtʼa chai iclaxtakniu ju xakʼotʼa. 38Tas vananch ju makat ixtʼantʼachiʼ chai iclaxtakniu junta xatolai. U va matiʼ ixjunita ju mimpumpuʼ chai iclaxtakniu. 39Tas vananch ju icquilalaktsʼiu acsni va ixtʼakʼankʼai u ixtʼalhnucʼantʼa”. 40Pus ju acsnich ju quitʼin ju kʼai ucxtin acjunaʼ chani acʼalacjunach: “Slivasalh ju iclajunau. Ni chunch ju xanaviniyatʼit ju tam quilhilakʼau mas yuchi ju noncan ni jantu tuʼuʼ ixtapalhni pus va jun quitʼinch ju chunch xaquilanaviyau”. 41Chai ju acsnich ni kʼai ucxtin acjunaʼ pus acʼalacjunaʼ ju yuʼunch ju tayanalh laquilhimacx: “Akʼostʼit laquimacni ju uxijnan ju ulanicʼantʼatʼit ju mintalakʼalhinʼan. Aʼinchitʼit ju lacajipi ju jantu tavanan mix. Anch junta lakʼoxinicanta ju lhacaticuru chai ju ixʼanquilhnin. 42Pus ju quitʼin acsni na xacchavanita jantu xaquilaxtakniyau ju quivaiti. Chai acsni na xacquicxixta jantu xaquilaxtakniyau ju ackʼotlh. 43Chai acsni na makat ju xacminacha jantu xaquilaxtakniyau junta lai actavi. Chai acsni matiʼ ixjunita ju quimpumpuʼ jantu xaquilaxtakniyau. Chai acsni na xactakʼankʼai chai acsni xactʼalhnucanta jantu xaquilaquilaktsʼinau”. 44Pus ju acsnich ju yuʼunch chani aquintajunaʼ: “Ucxtin tas vananch iclalaktsʼiu ni na ixchʼavanitʼa u ixqʼuicxixtʼa u makat ixtʼantʼachiʼ u matiʼ ixjunita ju mimpumpuʼ u va ixtʼakʼankʼai u ixtʼalhnucʼantʼa chai jantu tuʼuʼ xaclanaviniyau”. 45Chai ju quitʼin ju kʼai ucxtin acjunaʼ pus chani acʼajunaʼ: “Slivasalh ju iclajunau. Ni jantu xanaviniyatʼit tuʼuʼ lamapainin ju ani ju quintalhilaksi ni va ixnonatʼit ni jantu tuʼuʼ ixtapalhniʼan ju yuʼunch pus tachi ju va jun quitʼin ju jantu tuʼuʼ xaquilanaviniyau”. 46Pus ju acsnich ju yuʼunch cataʼanach lacamakʼalhkʼajnat ju jonkʼalhita. Para ju alaktsʼincan ni soknicʼa ju isʼatsucuntiʼan cataʼanaʼ junta alin ju atsucunti ju jonkʼalhita.

will be added

X\