IXTAMALAKACHAN JU JESÚS 21

1Chai acsni icʼalacmacaju ju quilhiʼalakʼavin laʼixmacni Jesús pus ictaju lacabarco. Va sok icʼau tus icchaʼau ju xalacatʼun Cos. Ni alakatam avilhchan jumpa icchaʼau ju xalacatʼun Rodas. Ictaxtu ju Rodas. Icchaʼau ju lakʼachakʼan Pátara. 2Ju anch iclhitaju alakatam barco chai ju yuchi ixʼamputun ju xalacatʼun Fenicia. Pus ictaju. Icʼauch. 3Acsni icchaʼauch vanin laxalacatʼun Chipre pus iclhitapasau laʼixlhicana. Icchaʼauch ju xalacatʼun Siria chai anch ju astacnalh ju barco ju lakʼachakʼan Tiro ni ixpʼuxniputuncan ju ixtacʼucʼat. Pus ju quijnan ictacutchauch ju anch. 4Chai ni icʼalhitaju ju vachuʼ ixtalhilacaʼanta Jesús amachakʼan anch pus icʼalactʼatolhchau lakatujun avilhchan. Pus ju Spiritu Santu ixʼalacmavasalanilh tuchi catapasayaʼ laʼisʼatsucunti ju Pablo acsni tavanan acʼanau ju lakʼachakʼan Jerusalén. Pus yuchi talhitapaininilh ni jantu caʼalh. 5Para acsni laktsalh ju lakatujun avilhchan ictaxtuch ju anch. Chai chux ju amachakʼan anch ju vachuʼ ixtalhilacaʼanta Jesús quintaquilaktsʼimacajun laʼixquilhtuʼ alama. Chux ju jokʼatni chai ixʼamachakaʼan chai ju isʼaskʼatʼan. Chai ju anch ictaʼaktsokotachauch chai ictʼachiviniuch ju Dios. 6Iclamacʼamiuch chai iclalakapujuch chai ictajuch ju lacabarco. Chai ju yuʼunch taʼanchokolh laʼixlakchakaʼan. 7Chai ictaxtuch ju Tiro chai icʼauch ju lakʼachakʼan Tolemaida. Tus anch xacpuʼanau ju barco. Ju anch icʼamacʼamichau ju quilhiʼalakʼavin laʼixmacni Jesús chai icʼatʼatolhchau ju yuʼunch tam avilhchan. 8Ni alakatam avilhchan jumpa ju Pablo chai ju quijnan ju xactʼaʼalhtanantauch ictaxtuch chai icmiuch ju lakʼachakʼan Cesarea. Chai icchaʼauch laʼixchakaʼ ju Pilipe ju ixnajun ixchivinti Dios. Vachuʼ ixlhipumatujunch ixjunita ju ixtaʼaʼaktaijunun laʼixtalhavat ju ixtalhilacaʼanta Jesús. Pus laʼixchakaʼ ju yuchi ictolhchauch. 9Ju yuchi ixʼalin pumatʼatʼi isʼatsiʼin. Va isʼakstucaʼan ixtajunita. Chai ju yuʼunch ixtanajun va tuchi chivinti ju ixʼamamachakxani ju Dios. 10Chai acsni lakalhu avilhchan icʼatʼatolhchau pus mincha laxaʼestado Judea pumatam lapanac ju Agabo ixjuncan. Ju Dios va tsa ixmamachakxani ju tuchi catapasayaʼ. 11Chai acsni quintalakminch ju quijnan pus chʼapanilh ju iscinturón ju Pablo. Chʼanchʼichokocalh laʼixchʼajaʼ isʼakstu chai makchʼichokocalh. Chai ajunich ju lapanacni: ―Chani ma najun ju Spiritu Santu. Ju quintʼaʼisraelitaninʼan amachakʼan Jerusalén ma chunch ju cataʼulhtuyaʼ ju amanavin junima cinturón chai ma catamakʼaxtakniyaʼ ju yuʼunch ju jantu israelitanin tajunita. 12Pus acsni ickʼasmatvich ju ani chivinti ju quijnan chai ju amachakʼan anch pus kʼasi icjuniuch ju Pablo ni jantuch caʼalh ju lakʼachakʼan Jerusalén. 13Para ju acsnich ju Pablo quintajunan: ―Tajuch ni va lackʼalhunatʼitch chai quilamaxcaniniyau ju quiʼalhunut. Ju quitʼin jantu tuʼuʼ iclhiulai mas tachʼin aquintanaviyanta ju lakʼachakʼan Jerusalén. U mas aquintamakniyanta va ixlacata ni iclhilaksita ju quiʼucxtinʼan Jesús. ―Chunch ju quintajunan. 14Chai ni jantu lai icmalacaʼiniu pus va sek ictayau. Va xacnonau: ―Chach navi ju quiʼucxtinʼan Dios tachi ju lacasqʼuinch ju yuchi. 15Chai acsni tapasalh ju anuʼ avilhchan pus iclacatayauch ixʼanca ju lakʼachakʼan Jerusalén. Chai icʼauch. 16Chai quintatʼaʼan vachuʼ ju aliʼin ju vachuʼ ixtalhilacaʼanta Jesús amachakʼan Cesarea. Pus ju yuʼunch ixtanajun ni anch actolauch laʼixchakaʼ pumatam lapanac ju Mnasón ixjuncan acsni acchaʼanau ju Jerusalén. Ju yuchi ixmintacha ju xalacatʼun Chipre. Chai ju yuchi makʼanch ixlhilacaʼanta Jesús. 17Chai acsni icchaʼauch ju lakʼachakʼan Jerusalén pus ju quilhiʼalakʼavinʼan laʼixmacni Jesús va lhikʼach quintaʼamaklhtayanantanch. 18Chai ni alakatam avilhchan jumpa pus ju Pablo quintatʼaʼanch laʼixchakaʼ ju Jacobo. Chai chux ju yuʼunch ju ixtalhinajun laʼixpujitatʼan vachuʼ ixtatakʼaixtokta ju anch. 19Pus ju Pablo alacmacʼami chai astan ajunkʼo tuchi ixʼanavinita ju Dios ju yuʼunch ju jantu israelitanin tajunita acsni tavanan ixʼajuni ixchivinti Dios ju Pablo. 20Pus ju yuʼunch acsni takʼasmatnilh ixchivinti ju Pablo talakʼayalh ju Dios. Para astan tajuni: ―Kʼoxich ji quilakʼau. Para ju uxintʼi laktsʼintʼa ni na lhu lana ju quintʼaʼisraelitaninʼan ju talhilacaʼanta Jesús ju chavai. Para ju yuʼunch tanajuntacaʼ ni aktsʼiya tasqʼuini ni canaviyau tachi ju ixnajun ju Moisés laʼixlhamapʼaksin. 21Pus ju yuʼunch va taquikʼalhakʼasmatninch ju uxintʼi ni ma va alacmalaninin ju quintʼaʼisraelitaninʼan ju tamakvilanalh junta tatʼajun ju yuʼunch ju jantu israelitanin. Chai ma alhamalanininch ni jantuch vana catanavi tachi ju ixnajun ju Moisés. Chai ma va aʼunich ni ma jantu catiʼachʼucʼucalh ju istsʼalanʼan nin yuchi ni ma lai catanavi tachi ju aktsʼiya lanitau ju quijnanʼan ju israelitanin juntau. 22Pus tas calayau. Ju anuch quintʼaʼisraelitaninʼan ju talhilacaʼanta Jesús catatakʼaixtʼokʼaʼ acsni catakʼasmatʼaʼ ni tʼantʼach ju uxintʼi. 23Pus aclajunau tuchʼi anaviyaʼ. Alin pumatʼatʼi lapanacni ju sia lhiquijnanchʼan ju tatʼatakʼoxita ju chivinti ju Dios. 24Pus alactʼapʼitʼich ju yuʼunch. Chai chunch vachuʼ alatʼi tachi ju catalayaʼ ju yuʼunch ni aktam salaka cajunaʼ ixʼalhunutʼan laʼixmacni Dios. Chai amapʼalaʼ ju uxintʼi ixtapalh ju tuʼuʼ ju catamakniniyaʼ ju Dios. Chai ju chunch laich caʼasitcanach. Pus ju chunch catamachakxayach ixchuxʼan ni jantu slivasalh tuchi takʼasmatʼach ju milacata. Chai catalaktsʼinan ni vachuʼ muctʼaxtʼui laʼixlhamapʼaksin Moisés ju uxintʼi. 25Pus ju quijnan icʼatsʼoknunitauch ju yuʼunch ju tamaklacaʼanita ju Jesús ju jantu israelitanin tajunita. Icʼajuniuch ni jantu tasqʼuini ni catanavi tachi ju ixnajun ju Moisés. Va yuchi ni jantu cataʼulh ju taxtokni ju lhikʼailaktsʼincanta ju tuʼuʼ ju laktsʼincanta tachi ju dios. Nin yuchi ni cataʼulh ju acʼalhni. Nin yuchi ni cataʼulh ju va pixtuchʼimaknicanta. Nin yuchi ni va catatʼatsuculh ju jantu ixpapaʼan u ixʼamachakaʼan. 26Pus ju acsnich ju Pablo alactʼaʼalh ju anuch pumatʼatʼi lapanacni chai ni alakatam avilhchan jumpa alactʼanavi tachi ju talai ju israelitanin ni salaka cava ju ixʼalhunutʼan laʼixmacni Dios. Chai astan ju Pablo tanu lacakʼai ixpujitatʼan ju istʼaʼisraelitanin. Va alh ajuniniʼ ju palijni tavanan calaktsayaʼ ju avilhchan acsni lai catalhiminaʼ ju atapacxat ju catamakniniyaʼ ju Dios. 27Pus talhcalh lakatujun avilhchan. Chai acsni ixchaʼamputunch ju ixlhilakatujun avilhchan pus ju aliʼin israelitanin amachakʼan Asia talaktsʼilh ju Pablo lacakʼai ixpujitatʼan ju istʼaʼisraelitanin. Pus lana tamaktalhkʼamalh chux ju lapanacni chai tachʼapalh ju Pablo. 28Pʼas ixtalaclatʼasani ju istʼaʼisraelitanin. Ixtanajun: ―Quintʼaʼisraelitanin aquilaʼaktaijuch. Ju ani ya lapanac yuchi ju amasuni ju lapanacni ixlhilacaputsʼun ju lacamunutpaʼ. Na macxcai quintalhichivinan ju quijnanʼan ju israelitanin juntau chai macxcai lhichivinin ju ixlhamapʼaksin ju Moisés chai ju ani kʼai quimpujitatʼan. Chai ixlhitijtʼui ju yuchi va kʼaya amanulh ju yuʼunch ju jantu israelitanin lacpujitat chai va lakʼalhilh ju ani kʼai ixpujitat Dios. 29Va talhinaulh chunch ni ixtalaktsʼinta ju Trófimo amachakaʼ Efeso ni ixtʼaʼalhtanan ju Pablo chai ju yuchi jantu israelita ixjunita. Chai va ixtanajun ni ca ixtʼatanun ju Pablo ju lacpujitat mas jantu. 30Pus tachi chun ju amachakʼan anch lana tatalhkʼamalh. Taʼatsʼalaminkʼo chai tachʼapalh ju Pablo. Tamaxtulh makspaʼ lacakʼai pujitat. Chai lana tamalacchaulh ju xamalhtich. 31Ju yuʼunch ixtamakniputun ju Pablo para quimacʼatsanicalh ju comandante ni chux ju lapanacni amachakʼan anch na ixtalaktalhkʼamantach. 32Pus ju anuʼ comandante lana kʼailhimilh ju xacapitán chaich ju ixtaropajni. Taʼatsʼalalakmilh ju lapanacni. Chai ixtalhavat lapanacni acsni talaktsʼilh ju comandante chaich ju ixtaropajni pus tamamacta ixkʼainekmaca ju Pablo. 33Pus ju comandante lakʼalh ju Pablo. Lhinaulh ixchʼapaca chai ixmakchʼica lacakʼantʼui cadena. Chai astan asacmilh ju lapanacni tichi chavaich ju Pablo chai tis talakʼalhinch ju xanavi. 34Para ju lapanacni na ixtalactʼasai chai ju aliʼin tumpa talakʼalhin ixtanajun chai ju aliʼin atumpa. Pus ju comandante jantu lai ixmachakxai ju stavasalanti. Pus alai va lhinaulh ixlhiʼanca lacacuartel. 35Para acsni tachaʼalh junta talactsa talactsa junita lacacuartel pus lana tachʼixlhiʼalh ju taropajni va ixlacaʼatalh ni na kʼox ixtatalhkʼamanta ju lapanacni. 36Pus ju ixtalhavat lapanacni ju ixtachʼakʼokʼata va pʼas ixtachivinin. Ixtanajun: ―Amaknitʼitch. 37Chai acsni ixtamanuputunachalh ju Pablo lacacuartel pus ju yuchi xakʼala ju comandante lacalhigriego. Junich: ―Lamapainin ictʼachivimputunan lacatsʼunin. Chai ju yuchi juni: ―Laiʼas chʼivinin ju lhigriego. 38Ja jantaʼas uxintʼi ju anuʼ lapanac amachakaʼ Egipto ju ixtʼalasaputun ju ucxtin. Chai jantucaʼ makʼan amakʼaixtoklh lakatʼatʼi milh lapanacni amaknininch chai alhiʼalh makat junta matiʼ xamatiʼ tʼajun. Ja jantaʼas uxintʼi. 39Pus ju Pablo junich: ―Ju quitʼin jantiyuʼ ju anuʼ lapanac. Ju quitʼin icʼisraelita. Icʼamachakaʼ Tarso. Lakatam kʼai lakʼachakʼan laxalacatʼun Cilicia. Va ictapaininiyan ni alacʼasqʼuich ni actʼachivinilh ju ixtalhavat lapanacni. 40Pus ju anuʼ comandante lacasqʼuinilh. Chai ju Pablo taya junta talactsa junita lacacuartel. Chʼixnilh ju ixmacaʼ ju ixtalhavat lapanacni ni sekch catataya. Chai acsni sekch tataya pus ju Pablo tsuculh axakʼalanaʼ lacalhihebreo. Chani ajuni:

will be added

X\