IXTAMALAKACHAN JU JESÚS 13

1Sia yuʼunch amachakʼan Antioquía ju ixtalhilacaʼanta Jesús ixʼalin ju lapanacni ju ixtanajun ixchivinti Dios chai ju aliʼin amamakaʼunin ixtajunita. Yuʼunch ju Bernabé chai ju Simón ju ixjuncan Niger chai ju Lucio amachakaʼ Cirene chai ju Saulo chai ju Manaén ju ixtʼatakʼayanaʼ ju kʼai ucxtin Herodes ixjunita. 2Pus ju lakatam avilhchan acsni ixtatʼajun lakʼayanin ju kʼai ixʼucxtinʼan Dios chai ixtatascajai pus ju Spiritu Santu chani alacjuni: ―Amalakʼachʼatʼit ju Bernabé chai ju Saulo lacalhichʼalhcat ju tuchi icʼalhitʼasanitach. 3Pus ju acsnich tatascajalh aliʼ chai tatʼachivinichokolh ju Dios. Chai astan tamokslanilh ixmacaʼan laʼisʼaktsulhʼan chai amalakachalh lacalhichʼalhcat. 4Pus ju Spiritu Santu alacmalakachalh ju Bernabé chai ju Saulo ju lakʼachakʼan Seleucia. Chai ju anch tatajulh lacabarco. Taʼalh ju xalacatʼun Chipre. Ju Chipre va lacatʼicstʼi lacatʼun junita lacaʼalama. 5Pus acsni tachaʼalh ju xalacatʼun Chipre anch ju tatacutlh ju lakʼachakʼan Salamina. Chai tatsuculh nonin ixchivinti Dios laʼixlacpujitatʼan ju istʼaʼisraelitanin. Pus ju Xivan ixʼalactʼaʼanta ju Bernabé chai ju Saulo ni ixʼaʼaktaijui ju yuʼunch. 6Talacaputocʼakʼo ju lakʼachakʼan ju alin ixlhilacaputsʼun ju anuʼ lacatʼun tus tachaʼalh ju lakʼachakʼan Pafos. Ju anch talhitaju pumatam lapanac ju alhicujnuʼ ixjunita. Ju yuchi israelita ixjunita chai ixjuncan Barjesús. Pus ju yuchi va taʼaklhtamani lapanac ixjunita. Ixʼajuni ju lapanacni ni yuchach ixchivinti Dios ju ixnajun mas jantu. 7Pus ju yuchi ixlapanac ixjunita ju kʼai ucxtin Sergio Paulo. Pus ju anuʼ kʼai ucxtin na ixʼacʼatsananta. Chai ju yuchi alactʼasanilh ju Bernabé chaich ju Saulo. Va ixʼalackʼasmatniputun ju ixchivinti Dios. 8Pus ju anuʼ alhicujnuʼ ju vachuʼ Elimas ixjuncan alactʼalakʼailh ju Bernabé chaich ju Saulo. Va jantu ixlacasqʼuin ni calacaʼilh ixchivinti Dios ju kʼai ucxtin. 9Pus ju Saulo vachuʼ Pablo ixjuncan chai ju Spiritu Santu ixlhinonkʼojui laʼisʼatsucunti ju yuchi. Pus ju Pablo skotutulh ju anuʼ alhicujnuʼ. 10Chai chani juni: ―Tʼis tʼiʼaʼokxchʼokʼonankʼoʼuich ju uxintʼi. Chai navitʼi tachi chun ju macxcai. Istsʼalhʼat ju lhacaticuru. Ixtʼalaxcaiʼat tachi chun ju soknicʼa. Ja jantu amamactʼayaʼ ju ixnajunca ni jantu kʼox ni chʼakʼokʼacan ju kʼai ucxtin Jesús. 11Pus ju chavai ju kʼai quiʼucxtin Dios camamakʼalhkʼajniyan. Jantu lai atʼilaktsʼi ju atuncunuʼ tachi lakatʼui lakatʼutu avilhchan. Pus lana soko maklakatsʼislh chai jantu lai laktsʼilh tuʼuʼ. Chai alhtanatsuculh ixpuxcajuca tichi chavaich ju camakchʼapalhiʼalh laʼixmacaʼ. 12Pus ju acsnich ju kʼai ucxtin acsni laktsʼilh tuchi tapasalh lhilacaʼalh ju Jesús. Na lhamakʼaninilh acsni tajuni ju Bernabé chai ju Pablo ixlacata ju kʼai ixʼucxtinʼan Jesús. 13Pus ju astan ju Pablo chai ju ixtʼaʼalhtanin tataxtucha ju lakʼachakʼan Pafos. Tatajuchokolh lacabarco. Taʼalh ju lakʼachakʼan Perge laxatʼun Panfilia. Para ju Xivan alactʼalamacaulh. Ju yuchi anchokolh ju Jerusalén. 14Ju Pablo chai ju Bernabé tataxtuchokolh ju Perge. Tachaʼalh tus Antioquía laxalacatʼun Pisidia. Chai acsni chaʼalh ju avilhchan paʼastacni pus ju yuʼunch tatanucha laʼixpujitatʼan ju istʼaʼisraelitanin chai tatavi. 15Chai acsni laktsʼinkʼocalh ju ixlhamapʼaksin Dios chai ju ixchivinti ju makʼaniya lapanacni ju ixtanajun ixchivinti Dios pus ju xaʼucxtinin lacpujitat tamalakachalh chivinti junta chani tajuni ju Pablo chaich ju Bernabé: ―Quintʼalapanacni ni pʼacxantʼatʼit tuʼuʼ chivinti ju alhimapʼaksipʼutʼunatʼit ju lapanacni laich anaʼuntʼit ju chavai. 16Pus ju acsnich ju Pablo taya. Chʼixlh ixmacaʼ ni va sek catatavi ju lapanacni chai ajunich: ―Quintʼaʼisraelitanin chai tachi chun ju uxijnan ju vachuʼ tʼalhoniyatʼit ju Dios aquilakʼasmatniuch. 17Ju quiDiosʼan ju lakʼayayau ju quijnanʼan ju israelitanin juntau yuchach ju sacxtulh ju makʼaniya quilacpaʼitniʼan chai na alalhava tus na lhu tava acsni ixtavilananchacaʼ ju laxalacatʼun Egipto mas jantu anch laʼixtʼunʼan ixjunita. Chai astan yuchi ju amaxtulh ju anuch lacatʼun laʼixtachaput. 18Ju Dios va tastucnikʼo tachi chun ju ixtanavi ju makʼaniya quintʼaʼisraelitaninʼan acsni ixtaʼucxuntʼajun tʼupʼuxam cʼata junta va aseknicʼa ixjunita. 19Chai astan malaccʼacxa ju lapanacni amachakʼan lakatujun lacatʼun ju lhiCanaán. Chai ju ixlacatʼunʼan ju yuʼunch axtaknikʼo ju makʼaniya quilacpaʼitniʼan. 20Astan tachi lakatʼatʼi cientos a tʼupʼuxam cʼata ju Dios axtaknilh ju makʼaniya quilacpaʼitniʼan ju xalactʼicstʼi ixʼucxtinin ju talhinaulh ju sia yuʼunch. Chunch ju tailhiʼalh tus acsni ixtʼajun ju Samuel ju ixnajun ixchivinti Dios. 21Ju astan tasqʼuinlh ju kʼai ixʼucxtinʼan. Pus ju Dios axtaknilh ju Saul istsʼalh Cis. Ju yuchi ixtamaskʼatʼanti Benjamín ixjunita. Pus ju Saul tanulh laʼixpuʼucxtin tʼupʼuxam cʼata. 22Chai acsni tavanan makʼosucalh ju yuchi pus ju Dios axtaknilh ju David ju kʼai ixʼucxtinʼan. Chai isʼakstu ju Dios ju lhichivinilh ju David istsʼalh ju Isaí. Ma naulh ni ma chunch ixjunita ju ixʼatalacpastʼacʼat ju David tachi ju ixʼanuch ju Dios. Chai ju yuchi ma canavikʼoyach tachi chun ju calacasqʼuinach ju Dios. 23Pus ju Dios ixʼajunita ju makʼaniya quilacpaʼitniʼan ni aquintaxtakniyan ju aquintamakʼalhtaxtuyan ni jantu caʼanau ju lacajipi. Yuchach ju Jesús. Chai ju yuchi acsni tavanan quitsucuchilh ju ani pus makʼaniya ixʼapapanatnich David va. 24Para acsni tucaʼ ixtaiʼulata ixlhichʼalhcat ju Jesús pus ju Xivan ixʼajuni ju quintʼaʼisraelitaninʼan ni catamacaulh ju ixʼalactuʼuntiʼan chai cataʼakpaxlich. 25Chai acsni ixnavikʼoputun ju ixlhichʼalhcat ju Xivan ma chani alacjuni ju lapanacni: “Ju uxijnan nonatʼit ni quitʼinch ju quilapacxanau. Para jantu. Ju astan caminaʼ pumatam ju xakʼai chai ju quitʼin jantu tuʼuʼ quintapalhni. Jantu lai actichʼanxkʼotlh nin mas va yuchi ju samusni ju ixchʼanxtʼakʼan”. Ma chunch ju naulh ju Xivan. 26Pus ji quiʼalakʼavin ju vachuʼ ixʼapapanatnich Abraham untʼatʼit chai tachi chun ju uxijnan ju lakʼayayatʼit ju Dios pus quijnanʼan ju xtaknicantauch ju ani chivinti junta najun ta yu lai takʼalhtaxtucan ni jantu ancan ju lacajipi. 27Pus ju ixtatʼonachalhch ju Jerusalén chaich ju xalackʼajinch jantu istamispaich ju Jesús tichi chavaich ixjunita. Sin catamachakxa ju ixchivintiʼan ju makʼaniya lapanacni ju ixtanajun ixchivinti Dios mas takʼasmatlh acsni ixlaktsʼincan chux avilhchan paʼastacni. Para acsni tavanan tasqʼuinlh ixʼaninti ju Jesús pus isʼakstuʼan tamuctaxtulh tachi ixtanajun ju anuʼ makʼaniya lapanacni. 28Mas jantu tuʼuʼ talhitajunilh ixtalakʼalhin ju tuchi lai catalhimakni para ju lapanacni tasqʼuinilh ju Pilato ni camaknicalh ju Jesús. 29Chai acsni tamaknilh pus ju chunch uctaxtukʼo tachi chun ju taxtokni ju ixʼalhitsʼokcanta ju Jesús ju makʼanchich. Pus ju acsnich tapʼuxlh ju lacacurus chai taquimacnu. 30Para ju Dios malokʼonichokolh laʼixʼaninti. 31Chai na lakalhu avilhchan ju Jesús atalacasunilh ju yuʼunch ju kʼaixtam ixʼalactʼataxtuta ju laxaʼestado Galilea chai ixʼalactʼaminta ju Jerusalén. Chai ju chavai yuʼunch ju tajuni ju lapanacni ixlacata ju Jesús. 32Chai ju quijnan vachuʼ iclajunau ni muctaxtuta ju Dios ju tuchi ixʼajunita ju makʼaniya quilacpaʼitniʼan. 33Pus ju quijnanʼan isʼaskʼatʼan quilacpaʼitniʼan juntau chai laktsʼiuch ni muctaxtulh ixchivinti Dios acsni malokʼonichokolh ju Jesús laʼixʼaninti. Ju makʼanchich ju Dios ixlhichivinin ju Jesús. Chai junta tsʼokcanta lacasalmos capitaluʼ lakatʼui ma chani juni: “Quintsʼalhʼat ju uxintʼi chai ju chavai icʼamasunita ju lapanacni ni vasalh quintsʼalhʼat”. Ma juni. 34Vachuʼ ju makʼanchich ju Dios ixnajunta ni camalokʼonichokoyaʼ ju Jesús laʼixʼaninti chai jantu tavanan catinichokolh. Chunch ju ixnomputun junta ma chani juni ju Jesús ju lacaʼatsʼoknut: “Acxtaknikʼoyan ju uxintʼi tachi chun ju kʼox. Acmuctaxtuyaʼ tachi ju xacjunita ju David”. Ma juni. 35Vachuʼ chunch ju nomputun lacaʼalakatam atsʼoknut lacasalmos junta va jun isʼakstu ju Jesús ju chivinin. Ma chanich ju juni ju ixpai: “Ju uxintʼi jantu alacʼasqʼuinaʼ ni capuchʼilh ju quilacatuna ju quitʼin ni mintsʼalh icjunita chai qʼuimalakʼachʼatʼachiʼ ju ani”. Ma juni. 36Pus ju David chʼalhcatnanilh ju lapanacni tachi ju junilh ju Dios. Chai astan nilh chai macnucalh tachi ju ixʼalacmacnucanta ju ixlacpaiʼan chai puchʼilh ju ixlacatuna. 37Para ju ixlacatuna ju Jesús jantu puchʼilh ni malokʼonichokolh ju Dios. 38Pus ji quiʼalakʼavin tasqʼuini ni acʼatsʼatʼit ni va ixlacata ju Jesús lai macʼacxanican ju quintalakʼalhinʼan. Yuchi ju iclajumputunau ju uxijnan. 39Pus tachi chun ju talhilacaʼan ju yuchi macʼacxanican ju ixtalakʼalhinʼan. Para ju talhilacaʼan ju ixlhamapʼaksin ju Moisés jantu tavanan catimacʼacxanicalh ju ixtalakʼalhinʼan. 40Pus alaktsʼintʼit ju uxijnan. Tun chun atʼapʼasatʼit tachi ju ixtanajuntach ju makʼaniya lapanacni ju ixtanajun ixchivinti Dios. Ju yuʼunch chani tanaulh: 41Ju Dios ma naulh ni ma canaviyaʼ lakatam lhamakʼan acsni tʼonatʼit. Chai ju uxijnan ma jantu lana alacʼaʼiyaʼitʼit mas xamatiʼ catajunin. Pus ma alaktsʼintʼit ju uxijnan ju jantu tuʼuʼ alhiulananatʼit. Ma alhamakʼanintʼit chai anitʼit. Ju Pablo ajuni ju lapanacni ni ma chunch ju naulh ju Dios ju makʼanchich. 42Chai acsni tataxtucha ju lacpujitat pus ju yuʼunch ju jantu israelitanin ixtajunita pʼas tasqʼuinlh lamapainin ni laich catakʼasmatlh ju anuʼ chivinti alakatam avilhchan paʼastacni. 43Chai acsni taʼakpitsilh ju ixtaquilata ju lacpujitat pus na lhu ju israelitanin tachʼakʼokʼalh ju Pablo chaich ju Bernabé. Vachuʼ tamakʼalh ju aliʼin ju ixtalakʼayai ju Dios chai ixtalacaʼi tachi ju israelitanin mas jantu israelitanin ixtajunita. Pus ju Pablo chaich ju Bernabé ajunich ju yuʼunch ni ixlhichux ixʼalhunutʼan catachʼakʼokʼalh ju Dios. 44Acsni paʼastacni xajunchokoi tatakʼaixtokkʼo tachi chun ju lapanacni. Ixtakʼasmatniputun ixchivinti Dios. 45Para ju israelitanin ju jantu talacaʼilh na talhacchaʼanilh ju Pablo acsni talaktsʼilh ixtalhavat lapanacni ju ixtakʼasmatniputun ixchivinti. Chai ixtanajunch ni jantu slivasalh tuchi ixnajunch ju Pablo chai ixtajunich macxcai chivinti. 46Pus ju acsnich ju Pablo chaich ju Bernabé lana jantu tatalhanalh. Alacjuni: ―Aktsʼiya istasqʼuini ni pʼulhnan aʼuncʼanaʼitʼit ju ixchivinti Dios ju uxijnan ju quintʼaʼisraelitanin untʼatʼit. Para ni jantu lacʼaʼipʼutʼunatʼit chai nonatʼit ni jantu lacʼasqʼuinatʼit ju miʼatsucuntiʼan ju jonkʼalhita lactʼiyan pus ju chavai acʼajunau ixchivinti Dios ju yuʼunch ju jantu israelitanin tajunita. 47Chunch ju aclayau ni chunch ju quintamapʼaksitan ju kʼai quiʼucxtin quincʼan Dios. Ju yuchi ma chani quintajunan: Ju quitʼin icʼulatan uxintʼi tachi ju maclhcu ni laich alacmamachʼakxanitʼi ju lapanacni ju jantu israelitanin tajunita ixchivinti Dios. Chai laich aʼunaʼ ju lapanacni ju tatʼajun ixlhilacaputsʼun ju lacamunutpaʼ ta yu laich cataputakʼalhtaxtulh ni jantu cataʼalh ju lacajipi. Pus ju Pablo ajuni ju lapanacni ni ma chunch ju juni ju Dios. 48Pus ju yuʼunch ju jantu israelitanin ixtajunita acsni takʼasmatlh ju ixchivinti Pablo na talhikʼachalh. Ixtanajun ni na kʼox ju chivinti ixlacata ju kʼai ucxtin Jesús. Chai talacaʼi tachi chun ju isacxtuta ju Dios ni laich caʼalilh ju isʼatsucuntiʼan ju lactiyan. 49Chai ni na lhu ju talacaʼilh pus ju chivinti ixlacata ju kʼai ucxtin Jesús ixmakpitsikʼocanta ixlhilacaputsʼun ju xalacatʼun anch. 50Para ju israelitanin ju jantu talacaʼilh ixchivinti Dios taʼamaktalhkʼamanalh ju aliʼin chakolun ju na ixtalakʼayai ju Dios chai ju na lackʼoxin lapanacni ixtajunita. Vachuʼ tamaktalhkʼamalh ju xalackʼajin ju anuch lakʼachakʼan. Pus axcaicalh ju Pablo chai ju Bernabé chai alacxcauxtucalh ju anuch lacatʼun. 51Pus ju acsnich ju Pablo chaich ju Bernabé alacchʼancʼalhapʼuxlh ju pokxni laʼixchʼajaʼan. Chai ni chunch ju xatanavi pus va ixʼajumputun ju lapanacni ni isʼakstuʼan catacʼucʼayaʼ ixtalakʼalhinʼan. Jantu ixcuentaʼan ju Pablo chai ju Bernabé. Chai astan ju yuʼunch taʼalh ju lakʼachakʼan Iconio. 52Para ju amachakʼan Antioquía ju ixtalhilacaʼanta ju Jesús na ixtalackʼachan chai ju Spiritu Santu ixlhinonkʼojui laʼisʼatsucuntiʼan.

will be added

X\