1 CORINTO 1

1Ju quitʼin icPablo. Pus ju Dios naulh ni ixtamalakachan acva ju Jesucristo. Chai yuchi ju quilhitʼasanilh laʼixlhichʼalhcat. Pus ju quitʼin chai pumatam ju quilhilakʼau ju Sóstenes juncan iclaʼatsʼoknuniyau ju ani alhiqui. 2Va iclamacʼamiyau ju uxijnan ju vilhchitʼit ju lakʼachakʼan Corinto ju lhilacʼapʼinatʼit ju Cristo. Pus ju Cristo Jesús taxacanitan ju miʼalhunutʼan acsni lhilacʼapʼitʼit ju yuchi. Chai Dios ju tasacxtun ni ixlapanacni aʼunaʼitʼit. Vachuʼ icʼamacʼamiyau tachi chun ju talhilacaʼantach ju Jesucristo mas vanta anchach catatolhcha. Ju Jesucristo vachuʼ kʼai ixʼucxtinʼan junita ju yuʼunch tachi ju quijnanʼan. 3Ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 4Va tachi icjuni lakʼailaktsʼiuch ju quimpaiʼan Dios ju milacataʼan ni xatanaviniyan lamapainin acsni tavanan lhilacʼapʼitʼit ju Jesucristo. 5Chai ni lhilacʼapʼinatʼit ju Cristo pus Dios taxtaknitan ju miʼatsucuntiʼan ju palai kʼox. Ju chavai na lai mavasalayatʼit ju ixchivinti Dios. Chai na lai machʼakxayatʼit. 6Chai ni tam xajun ju miʼatsucuntiʼan pus putasui ni stavasalanti ju chivinti ju icnonau ixlacata ju Jesús. 7Chai ni xatanaviniyan lamapainin ju Dios pus jantu tuʼuʼ tamakʼancʼacxniyan tachi chun ju lhakʼailaktsʼin ju xtʼakʼa ju Dios. Chai pʼacxantʼayatʼitcaʼ ju quiʼucxtinʼan Jesucristo tus acsni caminaʼ. 8Pus Dios ju cataxtakniyan vachuʼ ju mintachaputʼan ni laich alhilacʼapʼinkʼalhiyaʼitʼit ju Cristo tus laʼixʼaclanti ju miʼatsucuntiʼan. Ju chunch jantuch lai aʼulanicʼanaʼitʼit ju mintalakʼalhinʼan acsni tavanan caminchokoyaʼ ju Jesucristo. 9Ju Dios muctaxtui ju ixchivinti. Chai yuchach ju tatʼasanitan ni kʼox ixʼamigojnich aʼunaʼitʼit ju Jesucristo. Ju yuchi istsʼalh Dios junita chai vachuʼ quiʼucxtinʼan junita. 10Pus iclatapaininiyau ji quiʼalakʼavin ni vachuʼ lhilacʼapʼinatʼit ju quiʼucxtinʼan Jesucristo. Pus tachi minchuxʼan va lakatamch aʼuntʼit. Jantu quilhmactʼui quilhmactʼutu aʼuntʼit. Va chʼanxtam aʼuntʼit ju lamintacʼatsanʼan. Chai va lakatamch taxtokni ju alhilaksitʼit. 11Iclapujunau chunch ji quiʼalakʼavin ni quintajunilh ju tavilanancha laʼixchakaʼ ju Cloé ni va laclakʼaʼitʼit ju uxijnan. 12Ju aliʼin lamilhiʼuxijnan ma tanajun ni quintachʼakʼokʼai ju quitʼin. Chai ju aliʼin ma tanajun ni yuchi ju Apolos ju tachʼakʼokʼai. Chai ju aliʼin ma tanajun ni ma yuchi ju Pitaluʼ ju tachʼakʼokʼai. Chai ju aliʼin ma tanajun ni yuchi ju Cristo ju tachʼakʼokʼai. 13Para ja na va pumalhu alin ju Cristo. Ja quitʼin ju xacmaquilhtacanta ju lacacurus ixlacata ju mintalakʼalhinʼan. Ja laquintapakaʼut ju lhimakpʼaxacʼantʼatʼit. 14Icxtakni lakʼailaktsʼiuch ju Dios ni jantu xamatiʼ ju uxijnan ju icmakpaxata. Va yuchi ju juncan Crispo chai ju juncan Gayo. 15Ju chunch jantu lai xamatiʼ canonaʼ ni makpʼaxacʼantʼatʼit laquintapakaʼut. 16Chai vachuʼ icʼamakpaxata ju yuʼunch ju ixtatanumanalh laʼixchakaʼ ju Estéfanas. Para jantu icpastʼacʼa ni caʼalilh apumatam ju acmakpaxa. 17Jantiyuʼ ju quilhimalakachatachilh ju Cristo ni va acʼamakpaxanalh. Ju yuchi quimalakachatachilh ni acmasu ju chivinti junta najun ta yu laich takʼalhtaxtucan. Para ma jantu acnaulh laca tuʼuʼ cʼusi chivinti tachi ju tachivinin ju atalaninin. Ma va vas acnaulh ni nilh ju Cristo ju quilacataʼan. Ju chunch cacʼatsacanach ni na tachapun ju ani chivinti chai va yuchi ju lai amakʼalhtaxtunun. 18Pus ju quijnan icʼajuniu ju lapanacni ni quinichilh ju Cristo ju quilacataʼan. Para ju lapanacni ju aktsʼiya catatsʼankʼakʼalhiyaʼ ni jantu talhilacaʼamputun ju Cristo pus tanajun ni va lhilakachapuʼ ju anuʼ chivinti. Para ju quijnanʼan ju takʼalhtaxtutauch cʼatsayau ni va yuchach ju chivinti ju tachapun ni va yuchi ju lai aquintamakʼalhtaxtuyan. 19Chunch iclapujunau ni jantu lhitapalai ni va kʼaya aclhilaksi ju va ixʼatalaninti ju va lapanac ni chani ma najun ju Dios junta tsʼokcanta ju ixchivinti: Ju yuchi ma calakʼalhiniyaʼ ju ixchivintiʼan ju lapanacni ju tanajun ni na atalaninin tajunita. Chai ma jantu tuʼuʼ ixtapalhni canaviniyaʼ ixʼatalacpastʼacʼatʼan ju yuʼunch. Chunch ma najun junta tsʼokcanta ju ixchivinti. 20Pus ju chavai tas anchach ju alin ju lapanacni ju laich tanajun ni na taʼacʼatsananta. Tas anchach ju alin ju laich tanajun ni na tamispaich ju ixlhamapʼaksin ju Moisés. Tas anchach ju alin ju laich tanajun ni tacʼatsai tamalhch ju stavasalanti chai tamalhch ju jantu. Pus matiʼ ju lapanacni ju vasalh chunch tajunita ni Dios ju malacasuta ni jantu lhitapalai ju xaʼatalaninti ju va lhilapanac. 21Ju Dios cʼatsai tuchi ju navi. Chai ju yuchi jantu lacasqʼuilh ni va laʼixʼatalanintiʼan isʼakstuʼan lai catalhilacaʼalh ju yuchi ju lapanacni. Alai na kʼox xalhiulai ju Dios ni catatakʼalhtaxtulh tachi chun ju takʼasmatʼa ju ixchivinti chai talhilacaʼanta ju Cristo. Ju yuʼunch talacaʼich ju anuʼ chivinti mas tanajun ju aliʼin ni va lakachapu chivinti. 22Ju quintʼaʼisraelitanin tanajun ni va lakachapu chivinti ju chunch. Chai chunch tapunajun ni na pʼas tasqʼuini ju Dios ju tuʼuʼ ju laich catalaktsʼilh chai catapucʼatsa ju stavasalanti. Chai vana va chun nonatʼit ju uxijnan ju jantu israelitanin untʼatʼit. Chai ju uxijnan pʼunonatʼit chunch ni jantu lai lacʼaʼiyatʼit tuʼuʼ ju jantu lai machʼakxayatʼit. 23Para ju quijnan icʼajunau ju lapanacni ni ixmaquilhtacanta ju Cristo ixlacataʼan. Pus ju quintʼaʼisraelitanin tanajun ni lana jantu kʼox ju ani chivinti. Chai ju uxijnan ju jantu israelitanin untʼatʼit va lhitsʼiʼinatʼit. 24Para tachi chun ju asacxtuta ju Dios u quintʼaʼisraelitanin u jantu si tamachakxakʼojui ni yuchach ju Cristo ju pacxanta ixtachaput ju Dios chai ixtacʼatsan. 25Pus ju tasui tachi ju va ixlakachaput Dios yuchi ju palai kʼox atalaninti. Palai jantu ju va xaʼatalaninti lhilapanac. Chai junta tasui tachi ju va jantu tachapun ju Dios anchach ju palai alin ixtachaput. Jantu chun tachi ju ixtachaput ju va lhilapanac. 26Pus alaktsʼintʼitch ji quiʼalakʼavin. Tachi chun ju uxijnan ju tasacxtutan ju Dios na lacatsʼunin ju lamilhiʼuxijnan ju lai catanaulh ju lapanacni ni atalaninin untʼatʼit. Na lacatsʼunin ju lamilhiʼuxijnan ju lai cajunicalh ni xalackʼajin untʼatʼit laʼixʼucxlacapuʼan ju mintʼalapanacni. Na lacatsʼunin ju lamilhiʼuxijnan ju laich calhimispacalh ni jantu va xamatiʼ ju mimpaiʼan. 27Alai yuʼunch ju asacxtulh ju Dios ju alhimispacan tachi ju va tonto lapanacni. Yuchi alhisacxtulh ju yuʼunch ni va apumamaxani ju xaʼatalaninin ju ani lacamunutpaʼ. Chai yuʼunch ju asacxtulh ju Dios ju jantu tuʼuʼ ixtapalhniʼan ixʼalhiulacan laʼixmacniʼan ju ixtʼalapanacni. Chunch ju lalh ni camamaxanilh ju na xalackʼajin tajunita. 28Chai ju Dios asacxtulh ju yuʼunch ju jantu xalackʼajin ju ani lacamunutpaʼ chai ju jantu tuʼuʼ alhiulacanta chai ju lana jantu ixʼalaktsʼimputuncan. Chai alhisacxtulh ju yuʼunch ni caputasuyaʼ ni jantu lhitapalai ni na kʼai accʼatsa. 29Chai ju chunch jantu lai xamatiʼ kʼai cacʼatsa laʼixmacni Dios. 30Isʼakstu ju Dios xatanaviyan ni va lakatam tʼaʼuntʼatʼit ju Cristo Jesús. Chai ni va xaquintamasuniputunan ju kʼai ixtacʼatsan ju Dios pus yuchi lhimalakachatachilh ju Jesús ju ani. Ju chunch lai salaka jun ju quiʼatsucuntiʼan laʼixmacni yuchi chai lai aquintachakʼaniyan ju quiʼalhunutʼan chai lai quintamalakxtuyan laʼixʼacʼalhni. 31Chunch ju navilh ju Dios ni caʼuctaxtulh tachi ju najun junta tsʼokcanta junta chani najun: “Ni xamatiʼ lhitakʼayaputun tuʼuʼ pus ma alai chach lakʼaya ju Dios”.

will be added

X\