APOCARÍCHIU 13

1Rü nüxü̃ chadau ga wüxi ga ṉg̱oxo ga taxü̃ ga taxtügu íñuãchixü̃ ga 7 eruxü̃ rü 10 chatacu̱xrexü̃. Rü wüxichigü ga naxchatacu̱xrewa rü nüxü̃́ nayexma ga norü nga̱xcueruü̃. Rü naẽrugügu naxümatü ga ñuxre ga naẽ́gagü ga Tupanamaã guxchigagüxü̃. 2Rü yema ṉg̱oxo ga nüxü̃ chadauxü̃, rü wüxi ga airüü̃ nixĩ. Rü naxme̱xgü rü chatü ga taxü̃me̱xẽgürüü̃ nixĩ. Rü naã̱x rü wüxi ga aia̱xrüü̃ nixĩ. Rü yema dragṍũ ga Chataná rü yema ṉg̱oxoxü̃ naporaxẽẽ na naxrüü̃ naporaxü̃ca̱x rü naxrüü̃ ãẽ̱xgacü yiĩxü̃ca̱x na ñoma ga naãnemaã inacuáxü̃ca̱x. 3Rü wüxi ga naẽruwa ga yema ṉg̱oxo, rü nüxü̃́ nayexma ga wüxi ga taxü̃ ga norü o̱xri ga namaã nayuxchaü̃xü̃. Natürü ga yema norü o̱xri rü nüxü̃́ nixẽ, rü naxca̱x nitaane. Rü guxü̃ma ga ñoma ga naãnecü̱̃ã̱x ga duü̃xü̃gü rü poraãcü yema ṉg̱oxomaã naḇaixãchie, rü nawe narüxĩ. 4Rü ga duü̃xü̃gü rü yema dragṍũ ga Chatanáxü̃ nicua̱xüü̃gü yerü yema ṉg̱oxoxü̃ naporaxẽẽ na ãẽ̱xgacü yiĩxü̃ca̱x. Rü yexgumarüü̃ ta yema ṉg̱oxoxü̃ nicua̱xüü̃gü, rü ñanagürügü: “¿Texé tangẽxma ya ñaã ṉg̱oxorüü̃ poraxe? ¿Rü texé tapora na namaã tügü taḏaixü̃?” ñanagürügü. 5Natürü ga Tupana rü tama yema ṉg̱oxona nanachu̱xu na nügü yacua̱xüü̃xü̃ca̱x rü ṯacü Tupanamaã yaxugüxü̃ca̱x rü ãẽ̱xgacü na yiĩxü̃ca̱x ga 42 ga tauemacü. 6Rü yemaãcü chixexü̃ naxü ga yema ṉg̱oxo. Rü poraãcü ṯacü Tupanamaã nixugü. Rü Tupanamaã naguxchiga, rü napatamaã rü ta naguxchiga, rü tümamaã naguxchiga ya guxãma ya yíxema daxũguxü̃ i naãnewa ngẽxmagüxe. 7Rü yema dragṍũ ga Chataná rü yema ṉg̱oxoxü̃ naporaxẽẽ na Tupanaãrü duü̃xü̃gümaã nügü naḏaixü̃ca̱x ñu̱xmatáta tüxü̃ nayexera. Rü ãẽ̱xgacüxü̃ nayaxĩxẽẽ na namaã inacuáxü̃ca̱x ga nagúxü̃raü̃xü̃ ga duü̃xü̃gü ga guxü̃ma ga nachiü̃ãnecü̱̃ã̱x ga nagúxü̃raü̃xü̃ ga nagawa idexagüxü̃. 8Rü tá ngẽma ṉg̱oxoxü̃ nicua̱xüü̃gü i guxü̃ma i duü̃xü̃gü i ñoma i naãnewa maxẽxü̃ i noxritama naãne ü̱xgu ngeégagüxü̃ nawa i norü popera ya yima pecaduarü ütanüca̱x yucü i nagu yawügüãxü̃ i ngẽma duü̃xü̃gü i marü Tupana nüxna naxãxü̃ i maxü̃ i taguma gúxü̃. 9Rü ngẽxguma texé ãxchixẽgu, rü name nixĩ i naga taxĩnü i ñaã tá pemaã nüxü̃ chixuxü̃. Rü ngẽxguma texé tümamaã naxuegugu na tüxü̃ yayauxgüxü̃, rü noxtacüma tá tiyaxu. Rü ngẽxguma texé tümamaã naxuegugu na tüxü̃ yama̱xgüxü̃, rü noxtacüma tá tüxü̃ nima̱xgü. Rü ngẽmaca̱x ya yíxema Tupanaãrü duü̃xü̃gü ixĩgüxe, rü woo ṯacü rü guxchaxü̃ tüxü̃ ngupetügu, rü tanaxwa̱xe na yaxna namaã taxĩnüẽxü̃ rü tayaxõgüamaxü̃. 11Rü yemawena nüxü̃ chadau ga wüxi ga to ga ṉg̱oxo ga taxrechatacu̱xrexü̃ ga waixü̃müãnewa íxũxũxü̃. Rü yema naxchatacu̱xre rü ñoma carneruchatacu̱xrerüü̃ nixĩ. Natürü ga naga rü wüxi ga dragṍũ ga taxüchixü̃garüü̃ nixĩ ga na natagaxü̃. 12Rü yexguma yema nüxĩraü̃xü̃ ga ṉg̱oxope̱xewa nayexmagu, rü naxrüü̃tama napora. Rü ñoma ga naãnemaã inacua̱x, rü nanamu ga ñoma ga naãnewa maxẽxü̃ ga duü̃xü̃gü na yema nüxĩraü̃xü̃ ga ṉg̱oxo ga ixẽãrü o̱xriáxü̃xü̃ na yacua̱xüü̃güxü̃ca̱x. 13Rü yema ṉg̱oxo nanaxü ga taxü̃ ga cua̱xruü̃gü ga duü̃xü̃gü tama nüxü̃ cuáxü̃ na naxügüãxü̃. Rü daxũwa nanayixẽẽ ga üxü, rü ñoma ga naãnegu nayi nape̱xewa ga duü̃xü̃gü. 14Natürü ga Tupana rü tama yema ṉg̱oxona nanachu̱xu na ñoma ga naãnewa maxẽxü̃ ga duü̃xü̃güxü̃ nawomüxẽẽxü̃ namaã ga yema cua̱xruü̃gü ga yema nüxĩraü̃xü̃ ga ṉg̱oxope̱xewa naxüxü̃. Rü yemaãcü ga yema ṉg̱oxo rü duü̃xü̃güxü̃ namu na naxügüãxü̃ca̱x ga naxchicüna̱xã ga yema nüxĩraü̃xü̃ ga ṉg̱oxo ga taramaã chexexü̃ rü poraãcü rüxóxü̃ rü tama yuxü̃. 15Rü Tupana rü tama yema to ga ṉg̱oxona nanachu̱xu na namaxẽẽãxü̃ca̱x ga yema nüxĩraü̃xü̃ ga ṉg̱oxochicüna̱xã. Rü yemaãcü ga yema ṉg̱oxo rü nanamaxẽẽ ga yema naxchicüna̱xã na yadexaxü̃ca̱x rü na nadaiãxü̃ca̱x ga guxü̃ma ga yema duü̃xü̃gü ga tama nüxü̃ icua̱xüü̃güxü̃. 16Rü yexgumarüü̃ ta guxü̃ma ga duü̃xü̃güxü̃ namu na norü tügüneme̱xẽwa rü e̱xna nacatüwa nüxü̃́ na nayexmaxü̃ca̱x ga wüxi ga cua̱xruü̃ ga yema ṉg̱oxoéga ixĩxü̃. Rü yemaãcü nanamu ga guxü̃ma ga duü̃xü̃gü rü woo buxü̃ rü e̱xna yaxü̃, rü woo duü̃xü̃gü i muãrü dĩẽruã̱xgüxü̃ rü e̱xna ngearü dĩẽrũã̱xgüxü̃, rü woo duü̃xü̃gü i ngearü coriã̱xgüxü̃ rü e̱xna duü̃xü̃gü i ixããrü coriã̱xgüxü̃. 17Rü taxucürüwa texé tümaãrü ṯacüca̱x tataxe rü e̱xna tümaãrü ṯacümaã tataxe ga yexguma tümaãrü tügüneme̱xẽwa rü e̱xna tümacatüwa tüxü̃́ natau̱xgu ga yema ṉg̱oxoéga rü e̱xna yema ṉg̱oxoégaarü cua̱xruü̃ ga númeru. 18Rü ñaã orexü̃ na icuáxü̃ca̱x, rü tanaxwa̱xe na tüxü̃́ nangẽxmaxü̃ i tórü cua̱x. Rü yíxema tüxü̃́ nangẽxmaxẽ i tümaãrü cua̱x, rü name nixĩ i tanangugü i ngẽma númeru i ngẽma ṉg̱oxoéga ixĩxü̃. Erü ngẽma númeru rü wüxi i yatüégachire̱x nixĩ. Rü ngẽma númeru rü 666 nixĩ.

will be added

X\