1 Bɛdèmbɛ̀ kóo kótì dìèmmɛ̀ Kodee bí kó fɛyɛ̀nfɛ̀ bɛ̀ dìè nfɛ̀ kɛ biennɛ̀ kubómbonku. 2 N Yiɛ̀ nKuyie Mpɑkɛdɑɑ n dɔ́mu ɑ cĩ́ɛ̃̀tɛ̀ mɛdiɛ̀. 3 N yɑ́ɑ́mmu ɑ cĩ́ɛ̃̀tɛ̀ dɑ̀nkù mutɑrimù kɛ̀ dɛ̀ nh ɔɔtí, m búɔ́ fɔ̃́ nwe kɛ̀ diwɛ̀ì m bo kɛ̀ ǹ yiú. 4 Inɔribí cekù tiyĩ́ɛ̃̀ntì ɑ cĩ́ɛ̃̀tɛ̀ ntɛ, sikpɑ̃̀ncɛ́ndéi dɔunko siyiè nkɛ pɛ̃ṹ si bí ɑ wũɔ̃tɔ̀rɛ̀ borɛ̀ ndɛ. Fɔ̃́ nti Yiɛ̀ nKuyie Mpɑkɛdɑɑ, Kuyie nfɔ̃́ɔ̃̀ tu nkóo kpɑ̀ɑ̀tì. 5 Bɛ̀ɛ̀ bo ɑ cĩ́ɛ̃̀tɛ̀ dɛ̀ bɛ̀ nɑɑtimu kɛ̀ bɛ̀ dɑ sɑ̃ntí sɑ̃́ɑ̃̀. 6 Dɛ̀ nnɑɑti bɛ̀ɛ̀ ĩkú Kuyie nyĩ́nkɛ̀, icɛ imɔu tũ̀ntɛmu bɛ kpɛ́í 7 Kɛ̀ bɛ̀ pɛ̃nkɛ́ tɛdɔntɛ̀ kpetɛ̀ ĩ́nkɛ̀, mɛniɛ mbuotɛ́, kɛ̀ fɛĩ́nkɛ̀mbóntɑɑfɛ̀ɛ ni kɛ́bónkùnnɛ kɛtenkɛ̀. 8 Kɛ̀ bɛ̀ nkérí kɛ̀ bɛ wɛ̃rímú yɛ́útí, kɛ̀ bɛ̀ɛ tuɔkɛnɛ̀ Siyɔ̃ɔ̃ Kuyie mborɛ̀. 9 Ti Yiɛ̀ nKuyie Mpɑkɛdɑɑ kéntɛ́ m bɑ́ɑmmìi, fɔ̃́ nKuyie nSɑkɔbu do tũ nkù n keènɛ̀. 10 Áú Kuyie! Fɔ̃́ɔ̃̀ tu ti kó kudɔpìkù, wéntɛ́ní kɛ́yɑ̀ ɑ tɑ̃ɑ̃tɛ́ wè kɛ cɑ̃̀ńnɛ́. 11 Kɛ̀ n yĩ ɑ cĩ́ɛ̃̀tɛ̀ miɛkɛ diyiè dìmɑ́ɑ̀, dɛ̀ pɛ̃ɛ̃tɛ́mu m bo yĩ́mɛ̀ yɛwe tɛkɔupíítɛ̀ (1000) kupíkù tɛkù. Kɛ̀ n còḿmú fɔ̃́ Kuyie nkùù n te ɑ cĩ́ɛ̃̀tɛ̀ bòrì, dɛ̀ wenninɛ̀mu m bo mbomɛ̀ bɛyɛibɛ cĩ́ɛ̃̀tɛ̀. 12 Ti Yiɛ̀ nKuyie ntu ti kó kuwenniku nku, ti kó kudɔpìkù, Kuyie mpɑ̃ɑ̃mu mɛsɑ̀ɑ̀ nnɛ̀ tikpetì, kù ɔ̃ɔ̃ í mmɔ̀ntɛ diwɛ̀ì bɛ̀ɛ̀ borimɛ wenni. 13 Dɛ̀ nnɑɑti wèè dɑ duɔ́ nho mɑ́ɑ̀, fɔ̃́ nti Yiɛ̀ nKuyie Mpɑkɛdɑɑ.
