1 Kɛ̀ Suɑɑ ɛì kou Bididɑɑ nyóó bɛ́i nkòo nùù dɔ̀: 2 Dɛ̀ yóó nkɑ̃́ɑ̃́kɛ́ dɛ, kɛ̀ di kṹntɛ́ tinɑ́ɑǹtì sɔ̃́ntíkɛ kpɛti? N nɑ́ɑ́nnɛ̀ kɛ yɛ̃́ di yɛ̃ mmù, kɛ ti nnɑ́ɑ́. 3 Bɑ nte kɛ̀ bɛ̀ ti wúó ntiyɛìntì? Dɛ̀ dòmmɛ kɛ̀ di ti wúó ntidìɛ̀ntì? 4 Fɔ̃́ nwèè kɔ̃nnɛ̀ kɛmiɛkɛ, fɔ̃́ɔ̃̀ kpɛ́í bo nte kɛ̀ bɛnìtìbɛ̀ɛ deè kutenkɑ̀ɑ̀? A kpɛ́í bo nte kɛ̀ yɛtɑ̃rɛ̀ɛ fũtɑɑ̀? 5 Oyɛiwe kó fɛmíìnfɛ̀ yóó kúmu, o dɛkɛ̀ kó muhɑ̃ɑ̃́ nyóó kúmu. 6 Kuhɑ̃ɑ̃wenniku í yóó nkpɑɑ́ o fii miɛkɛ, o míìnfɛ̀ yóó kúmu. 7 Kòo nkérí kɛ tú sĩ́mmú sĩ́mmú, ò toti kɛ bo dɔ̀ɔ̀ tì tiì yóó ò bɔ. 8 O nɑɑ̀cɛ̀i siì tɑ ticùɔ̀tì miɛkɛ, o nɑɑ̀cɛ̀i siì tɑ kuhɔ̃ũ kó dideè miɛkɛ. 9 Timɑ́tì tiì pĩ nho nɑcɛ̀nkénnì, ticùɔ̀tì kó yɛdekɛ̀ yɛɛ̀ ò pĩ. 10 Bɛ̀ ò bɔ nkuhɔ̃ũ nku, ticùɔ̀tì tiì dìí o cɛ. 11 Kukɔ̃m̀bɔ̀dorí kpɛti tiì nɛ́ kéríní tipíìtì timɔu, koò fɛ̃mmú fɛ̃nfɛ̃. 12 Wenwe wèè do kpeńnì kɛ̀ dikònnì ò cĩ̀rìkùnnɛ, mɛsémmɛ̀ mɛɛ̀ kɑ̀ri o tɑkɛ́. 13 Mumɔmmú muù cɑ̀ɑ́kɛ́ cɑ́ɑ́kɛ́ o kɔ̃̀ntì, mukṹṹ nkóo po weè di o tùòtì. 14 Koò dènnɛ o cĩ́ɛ̃̀tɛ̀ ò do tɑ̃́ tɛ̀ miɛkɛ, koò fũrí koò kɔ̀rinɛ̀ kukɔ̃m̀bɔ̀doróo kóo kpɑ̀ɑ̀tì borɛ̀. 15 O fii, bɛtɔbɛ̀ bɛɛ̀ yóó dì tɑ, bɛ̀ yóó dì cɔ́u mmuhɑ̃ɑ̃́ mmu. 16 O cĩ̀ɛ̃ nkpeímu dɛ miɛkɛ, kòo fɑ̃ɑ̃̀tì mɔ̀tírí o ĩ́nkɛ̀. 17 Òmɔù tɛ̃́nkɛ í denniní o kpɛ́í nkutenkù, o yètìrì tɛ̃́nkɛ í yu dihɛì. 18 Bɛ̀ ò tèntoo dibiìnnì miɛkɛ nkɛ, koò dènnɛ kutenkù. 19 O kó kuwuɔ mmiɛkɛ dɛbirɛ í bo, dɛyɑɑ̀birɛ í bo, o cĩ́ɛ̃̀tɛ̀ òmɔù í kpɑɑ́ fòù. 20 Tìì ò tùɔ̀kɛní tiì donnɛ́ diyiè yìɛ̀ní kɛ̀ɛ̀ bíɛ́kɛ̀ kɔbɛ kɔ̃m̀bùɔ̀tì, kɛ ɑ̃nnɛ́ kufɔ̃wɑɑ́ ndiyiè tɑɑ̀ kɛ̀ɛ̀ bíɛ́kɛ̀ kɔbɛ. 21 Oyɛiwe kpɛrɛ ɔ̃ mmɛ ndò, wèè í yɛ̃́ Kuyie nhò ɔ̃ɔ̃ tí ndentɛnɛ̀.
