'O ROMA 5

1Ne'ena ngone pomarimoiokali de ma Jo'oungu ma Dutu, ngano ngone pongaku 'o Yesusika. De sababu ge'ena ngone po'ahu 'isa-sanangi de ma Jo'oungu ma Dutu ma ngekomo ma Yesus Kristus. 2Ma sababu ngone powingaku 'o Yesus, so 'una wonasi'akunu ngone panako ma Jo'oungu ma Dutu 'awi dora. De 'o dora ge'enau ma sigoronaka, ngone po'ahu ma 'orasi ne'ena. Sababu ge'ena ngone pomorene ma ngale ngone pongano-nganonou 'asa pamake 'o sanangi ma Jo'oungu ma Dutuno! 3De kage'enawa duga, ma ngone mita pomorene 'o sangisara ma dodaka, sababu ngone panako 'o sangisara ge'ena 'idadi 'o nyawa manga singina yosikuata, 4de 'o singina ma guata ge'ena 'asa 'idadi 'o nyawa yotongosono 'o bo-bajaka. Ne'enau yosibaoro 'o singina nganono. 5'O singina nganono koge'ena dua 'asa nanga singina koya'oguwa, sababu ngone panakokau ma Jo'oungu ma Dutu wonadora ma sala ma ngekomo 'o Ngomasa 'Itebi-tebini gee wonakulakau ngoneno. 6Sababu ma 'orasi ngone kopomado-do'oawa pomasimada 'o sowonoka, ma Kristus wosongene ma ngale wonasilaha ngone posowo-sowono, moteke ma 'orasi gee ma Jo'oungu ma Dutu wositatapuokau. 7'Isusa ma sala 'o nyawa yomau yosongene ma ngale yakiriwo 'o nyawa gee kayoloa-loau ma. Poilia de ma 'ena mita 'o nyawa yomoroini yosongene ma ngale yakiriwo 'o nyawa yoloa-loa. 8Ma ma Jo'oungu ma Dutu 'awi dora wosidumutu ngoneno gee ma 'orasi ma Kristus wosongene ma ngale wonasilaha ngone, ma 'orasi ngone kaposowonosi. 9Ne'ena ngone pomarimoiokali de ma Jo'oungu ma Dutu ma ngekomo ma Kristus wosongene. Ge'enau so ma raiokau ngone mita koinadaenuwa ma Jo'oungu ma Dutu 'awi gorosau. 10Ma sira ngone pomalawani ma Jo'oungu ma Dutuka, ma 'una wonadiai ngone pomarimoiokali de de 'una ma ngekomo 'awi Ngowaka wosongene. 'Ifoloiosi gee to ngone nanga rimoi de ma Jo'oungu ma Dutu 'isurekau, ma raiokau ngone 'asa 'inasilaha ma ngekomo ma Kristus wo'ahu ngoneka. 11De 'ifoloi de ge'ena, ngone podomorene mita ma ngale ma Jo'oungu ma Dutu 'awi singina ma sure ma ngekomo nanga Jou Yesus Kristus. Sababu de ma Kristus, ngone pamaokau nanga rimoi gee 'i'ofi-'ofi de ma Jo'oungu ma Dutu. 12'O sowono 'ikurue de ma 'ena 'o duniaka sababu wimoi wodiai ge'ena la 'o Adam. De 'o sowonou ge'ena so ma duanguku wosongene. Ge'enaka de ngone 'o nyawa poodumu 'o sowono podiai, so ma duanguku ngone mita posongene. 13'O besesongo ma Jo'oungu ma Dutuno gee 'o Musa wositota-totara koi'iwasi 'ena 'o nyawa 'o duniaka yosowonokau. Ma 'o nyawa yosowo-sowono go'ona ma Jo'oungu ma Dutu kowakihakimuwa sababu 'o besesongo koi'iwasi so koi'iwa yaparene. 14Duga ma 'orasi 'o Adam sigado 'o Musa, 'o nyawa 'iodumu salingou yosongene. De ngaro 'o nyawa gee yodiai 'o sowono koimaterowa de 'o Adam wodi-diai, 'o nyawa go'ona mita yosongene. 'O Adam 'awi di-diai ge'ena 'imadadi 'o 'ade-'ade ma ngale 'isikadelega de wimoi gee dua 'asa woboa ge'ena la ma Kristus. 15Duga yamididi manga manarama ma sowoko ge'ena koimaterowa. Womatengo wosowono ge'ena la 'o Adam ma duanguku 'o nyawa gudai yosongene. Ma ma Jo'oungu ma Dutu 'awi co-catu ma faedaa 'ifoloi 'iamoko, ma ngale wosiparasengi 'o laha 'o nyawa manga gudaika ma ngekomo ma Yesus Kristus 'awi singina ma 'ofi. 16Ma Jo'oungu ma Dutu 'awi co-catu ma sowoko 'ifoloi 'iamoko positero 'o nyawa womatengo 'awi sowono ma sowoko. Sababu gee 'o nyawa womatengo wodiaioka 'o sowono, ma duanguku 'o gorosau. Ma ma Jo'oungu ma Dutu 'awi singina ma sure ma ngale wosipidili 'o nyawa manga gudai ma so-sowono ma duanguku 'o rimoi de de 'una. 17Sababu 'o nyawa wimoi wosowono, so ma duanguku 'o nyawa manga gudai mita 'o sowono yakiparetano so yosongene ma ngekomo 'o nyawa womatengo gu'una. 'Ifoloiosi 'iamoko ma sowoko 'o nyawa wimoioli 'awi di-diai, ge'ena la ma Yesus Kristus. Ma ngekomo 'una, ma Jo'oungu ma Dutu 'awi co-catu posironga ma amoko wokula 'o nyawa gudaika, de ma bo-bangu koi'iwa ma Jo'oungu ma Dutu wodiai yomarimoioli de de 'una. 'Ona 'asa yapareta 'o sowono de 'o songene ma ngekomo ma Kristus. 18So 'isoka kokia naga womatengo wodiai 'o sowono ma duanguku 'o nyawa 'iodumu yahukumu, koge'enali mita womatengo 'awi manarama gee moteke ma Jo'oungu ma Dutu 'awi mau, ma duanguku 'o nyawa 'iodumu 'idadi yomarimoioli de ma Jo'oungu ma Dutu, de yakikula 'o 'ahu. 19De 'isoka kokia naga 'o nyawa gudai yodadi 'o nyawa 'isowo-sowono sababu womatengo kowosingounuwa, koge'enali mita 'o nyawa gudai 'idadi yomarimoioli de ma Jo'oungu ma Dutu sababu 'o nyawa womatengo wosingounu ma Jo'oungu ma Dutuka. 20'O besesongo gee 'o Musa wositota-totara ge'ena ma Jo'oungu ma Dutu ma sirete wokula. Ma dumutu la 'o nyawa yasahe 'ato kaikudai monga yaparene ma besesongo ge'ena. Ma gee 'o nyawa koyodofoloi yodiai 'o sowono, de ma Jo'oungu ma Dutu 'awi co-catu mita kaifoloi monga 'iamoko. 21Ngone 'o songene 'inaparetano sababu ngone podiai 'o sowono. Ma ne'ena ma Jo'oungu ma Dutu 'awi co-catu 'inaparetano sababu pomarimoiokali de de 'una ma ngekomo ma Yesus Kristus to ngone nanga Jou. Ge'enau so ngone pamake 'o 'ahu 'ika-kakali.

will be added

X\