'O ROMA 1

1'Esa moi riaka dodoto niongaku-ngaku ma Kristusika, gee niomanoa-noa 'o Romaka! Ngoi 'o Paulus tolefo 'o surati ne'ena, tositago-tago nginika gee ma Jo'oungu ma Dutu winisiboso-bosono de wini'asokokau ma ngale niodadi 'awi 'umati. Ngoi ne'ena towile-leleani de towisingou-ngounu ma Kristus Yesus. Ngoi ma Jo'oungu ma Dutu woiirikokau de woigorakokau duga katositotara 'o Habari ma Owa ma Jo'oungu ma Dutuno. 2Ma Habari ma Owa ge'ena ma sirasi ma Jo'oungu ma Dutu wosijajiokau de wositotarokau ma ngekomo 'o nabii-nabii, de 'isilefokou 'o Buku 'Itebi-tebinoka. 3Ma Habari ma Owa ge'ena ma ngale ma Jo'oungu ma Dutu 'awi Ngowaka, ge'ena la ma Yesus Kristus to ngone nanga Jou. Gee womadadi 'o nyawa, 'una ge'ena 'awi 'asali ma Koana 'o Dautino. 4Ma nako 'awi singina de 'awi gokokie, 'una ge'ena 'iwai-waiti ma Jo'oungu ma Dutu 'awi Ngowaka. Ge'ena ma nyo-nyata 'awi kuasa kokiawa positero ma ngekomo wosongenukou de womomiki. 5Mita ma ngekomo 'una, ma Jo'oungu ma Dutu 'o co-catu woikula todadi 'o su-suloko. La takituda 'o nyawa kiano naga bato ma ngale yongaku de yosingounu ma Kristusika. 6'O sagala nyawa gee kiano naga bato ge'ena dau ma dodaka nginiou sona gedagee 'o Romaka nimanoa-noa, ngini mita ni'asokokau niodadi ma Yesus Kristus 'awi 'umati. 7Ma sababu ge'enau so ngoi tinidusurati nginika. Tanu ma Jo'oungu ma Dutu to ngone nanga Dea, de ma Jou Yesus Kristus nikula 'o co-catu de 'o sanangi. 8'Isira-sira ngoi to'amalaha 'iku-kudai ma Jo'oungu ma Dutuka ma ngekomo mimarimoi de ma Yesus Kristus. Ngoi to'amalaha sababu ngini, sababu 'o nyawa kiaka naga bato nigi'isenokau 'ato ngini niongaku ma sala ma Kristusika. 9Ma Jo'oungu ma Dutu wanako 'ato ngoi tolahidoa ma noimi kotinimongoruwa ngini. 'Unau ge'ena gee towile-leleani tosidemogaroku ge'ena la tosihabari 'o Habari ma Owa ma ngale to 'una 'awi Ngowaka. 10De ngoi toga'asoko tosidemogaroku ma Jo'oungu ma Dutuka, la tanu 'una 'o ngekomo wokula la koito'ingowa de taika nginika sababu 'o do'ingou tomau tinilega. 11Sababu ngoi toduaka ma sala pomakamake de de ngini la 'asa tinisibula 'o co-catu 'o Ngomasa 'Itebi-tebinino la nia ngo-ngaku 'isikuata. 12To ngoi 'ai dumutu ge'ena la sababu ngone poodumu pongakuokau ma Yesus Kristusika so ngone 'idadi pomasikakuata moi de moi. 13'Esa moi riaka dodoto! Tomau la ngini nianako, ma gudaiou tomau tinidoboa duga kaitaurika ka de ma gadangonoka. Ngoi tomau naga nginioka mita 'ai manarama de ma sowokoka, 'isoka 'o ngii 'iregu-reguoka gee ko 'o Yahudiwa ma nyawaka. 14Sababu to ngoi 'ai gina salingou takiriwo 'o sagala nyawa gee 'o 'atorangi de 'o 'adati yanako-nako de gee koyanako-nakowa, yomadoto-dotoko bolo ko'uwa. 15Ma sababu ne'enau so ngoi 'ifoloi toduaka tomau tinisitotara 'o Habari ma Owa ge'ena nginika mita gee 'o Romaka nimanoa-noa. 16Ngoi ma gou-goungu tongaku 'o Habari ma Owa de dua 'ai singina koi'oguwa, sababu ma ngekomo 'o Habari ma Owa ge'ena ma Jo'oungu ma Dutu womanarama de 'awi kuasa 'ikua-kuata ma ngale wosilaha 'o nyawa 'iodumu gee pongaku-ngaku ma Kristusika, 'ikurue 'o Yahudioka 'asa deika 'o nyawa 'iregu mita. 17Sababu de 'o Habari ma Owa ge'ena, ma Jo'oungu ma Dutu wosidumutu kokia ma ngekomo ngone 'idadi pomarimoioli de de 'una. Ma ngekomo ge'ena la pongaku ka ma gurueka sigado ma do-dogumika. Gee moteke 'isilefokau 'o Buku 'Itebi-tebinoka konee, " 'O nyawa gee yomarimoioli de ma Jo'oungu ma Dutu, 'ona ge'ena 'asa yo'ahu sababu manga ngo-ngaku!" 18Daku 'o sorogaaku ma Jo'oungu ma Dutu wosidumutu 'awi do'otasa sababu 'o nyawa ma so-sowono de ma dingkai gee yaitomo 'iti-tiai ma ngale ma Jo'oungu ma Dutu. 19'Okia naga gee 'o nyawa 'idadi yanako ma ngale ma Jo'oungu ma Dutu, ge'ena 'iwaitokau 'o singinaka, sababu ma Jo'oungu ma Dutu ma sirete wosidumutokau ge'ena 'o nyawaka. 20Ka ma 'orasi ma Jo'oungu ma Dutu 'o dunia de ma kia sonaa moi-moi wosidadi, to 'una 'awi jako gee kopamake-makewa, ge'ena la 'awi gokoie de wi gogeruku de 'awi guata gee ma batingi koi'iwa ge'ena 'o nyawa yasahekau ma ngekomo wosidadiokau 'okia sonaa moi-moi. So 'o nyawa ka moi ma koidadiwa yongose 'ato 'ona koyosowonuwa sababu kowinakowa ma Jo'oungu ma Dutu. 21De ngaro winako ma Jo'oungu ma Dutu, ma kowihoromatiwa de mita koyo'amalahawa 'unaka, 'ipulutu so yatibangi gee koyadae-daenikawa, 'ona yohaga-haga so koyomasinakowau matero ka 'o darusoka. 22'Ona yongose 'ato yobarija 'ena momongo yohaga-haga. 23'Ona kowisubawa ma Jo'oungu ma Dutu woka-kakali de woku-kumati ma 'ena yasuba 'okia naga gee koika-kakalikawa, ge'ena la 'o pilogoti gee ka 'ona ma sirete yadiaiku 'isoka 'o nyawa, 'o namoro, 'o haewani ma dou ngai soatoka, de 'o haewani gee 'imatoba-tobaka. 24Ge'enau so ma Jo'oungu ma Dutu kawakisidipidilika yamoteke to 'ona manga singina ma du-duaka ma ngale yodiai gee posironga 'itorouoka sigado 'ona yomakadiai 'okia sonaa 'imedi-mediri moi de moika. 25Ma Jo'oungu ma Dutu woti-tiai gu'una, 'ona yositagali de 'o ngeluku. 'Ona yasuba de yahoromati 'okia naga gee ma Jo'oungu ma Dutu wosidadi-dadiku, so kowisubawa gee wosidadi-dadi. 'Ena momongo gee wosidadi-dadi gu'una salingou powisiarene kaisi'ado-'adonika! 'Amin. Koge'enau. 26Sababu 'o nyawa yodiai koge'ena, so ma Jo'oungu ma Dutu wakisimadaka 'ona yamoteke to 'ona manga nyafisuu gee yakisimae-maeke. To 'ona manga nge-ngeweka koyoduakuawau yomakapake de 'o nauru so yoduaka kayomasinge-ngewekau. 27'O nauru mita koge'enali, 'ona koitiainowau yakipake 'o nge-ngeweka so manga nyafisuu kayomasinau-naurikau. 'O nau-nauru yodiai 'okia sonaa gee poda-damaeke ma ngale yomakapake ka 'o nauru de 'o nauru. So 'ona yamake ma boiro moteke to 'ona manga manarama 'ito-torou ge'ena. 28Sababu 'o nyawa yamaoku koiparaluuwa ma Jo'oungu ma Dutu winako, so ma rai ma Jo'oungu ma Dutu kawakisidabika manga di-dibangi koitiaiwau, sigado 'ona yodiai 'okia sonaa gee 'ona koyadaenuwa yadiai. 29To 'ona manga singinaka ya'omanguku ka 'o sagala dorouou, 'okia sonaa koiti-tiaiwa, 'o duari, 'o singina ma dorou, 'o daleana, manga singinaka yomau ka 'o do'omau, 'o kadu'uduku, yosihaga de manga singinaka yomadonoaku. 'Ona yoduaka 'o nyawa 'iregu yakisijarita, 30yoduaka 'o nyawa manga ronga ma dorou yodiai, yoma'edenge de yobicara kadakuino, yopakisani, widu'uduku ma Jo'oungu ma Dutu de yoduaka yokaelu-eluku. 'Ona yobarija yosikadike ma ngekomo ma du'uru ma ngale 'o dorou yodiai. 'Ona koyosingounuwa 'o balusika. 31'Ona koyakitibanguwa 'o nyawa 'iregu, manga jaji koyatotomuwa, manga dora koi'iwa de koyakikalesanguwa 'o nyawaka. 32'Ona yanakokau 'ato moteke ma Jo'oungu ma Dutu 'awi besesongo, 'o nyawa gee yadi-diai koge'ena, yadaene yakihukumu yakiso-songene. Ngaro koge'ena, ma 'ona kayadiai koge'ena, de kayosimotekoli 'o nyawa 'iregu yadiai koge'ena.

will be added

X\