'O IBRANI 4

1Sababu ge'ena salingou nimasitiari la 'uwa sigado naga nginioka moi koyamakewa 'o sanangi, ngaro ma Jo'oungu ma Dutu kawonakulasi 'o 'orasi pomarimoi de de 'una ma. 2Sababu 'o habari ma owa ma ngale 'o sanangi pamake de pomarimoi de de 'una ge'ena 'inasitotarokau 'isoka ma sira nanga edete de nanga dotumika. Ma 'o habari ge'ena ma faedaa koi'iwa 'onaka, sababu gee yo'isenoka de koyongakuwa. 3Ma ngone gee pongaku-ngaku 'asa pomaomasa de pamake 'o sanangi gee ma Jo'oungu ma Dutu wosijaji-jajiokau. Ge'ena 'isoka gee kokia naga ma Jo'oungu ma Dutu wongosekau, "Ngoi 'ito'otasa de tosasi tongose 'ato, ' 'Ona 'asa koyamakewa 'o sanangi de koyomarimoiwa de de ngoi.' " Ma Jo'oungu ma Dutu koge'ena wongose, ngaro wadua-duangou 'o laha ge'ena la 'o sanangi de 'o rimoi de de 'una ka ma 'orasi 'o dunia ne'ena wosidadiosi. 4Sababu ma ngale 'o wange ma tumudiingi, naga 'o Buku 'Itebi-tebinoka 'isilefoku konee, " 'O wange ma tumudiingoka ge'ena, ma Jo'oungu ma Dutu kowomanaramuwa so kawomaomasa." 5De naga 'isilefoku mita koneda, " 'Ona 'asa koyamakewa 'o sanangi de koyo'ahuwa de de ngoi." 6So 'iwaitokau 'ato naga 'o nyawa 'iregu-regu mita 'asa yamake 'o sanangi, ma 'o nyawa gee ma di-disiraka yo'ise-'isene 'o Habari ma Owa ma ngale pomarimoi de ma Jo'oungu ma Dutu, 'ona koyamakewa sababu 'ona koyongakuwa. 7Sababu ma Jo'oungu ma Dutu wositantuuokau 'o 'orasi 'ireguoli ge'ena la "Ne'ena ma Wange". Ma taunu 'iratu-ratusu deika ma Jo'oungu ma Dutu wobicarali ma ngale ge'ena, ma ngekomo ma Koana 'o Dautu, 'isoka gee kangano 'ingosekau ma bo-bula moioka konee, "Nako ne'ena ma wange nio'isene ma Jo'oungu ma Dutu wi 'ilingi, 'uwa nia singina nia'opini." 8Ma sira 'o Yosua kowakisiwosamuwa nanga edete de nanga dotumu 'o Kanaanika ma ngale yamake 'o sanangi gee ma Jo'oungu ma Dutu wosijajiokau, ge'enau so ma Jo'oungu ma Dutu wobicarali ma ngale 'o 'orasi 'iregu ge'ena. 9So ka de ma 'enasi 'o 'orasi ma ngale ma Jo'oungu ma Dutu wi 'umati pamake 'o sanangi de pomarimoi de de 'una, 'isoka 'una womaomasa 'o wange ma tumudiinguku gee. 10Sababu 'o nyawa gee 'o sanangi yamakekau de yomarimoiokau de ma Jo'oungu ma Dutu 'isoka gee 'una wakisijajiokau, 'asa yomaomasa mita 'o manarama 'iodumoka, 'isoka ma Jo'oungu ma Dutuoli. 11Sababu ge'ena, nou ngone pomariwo posigou-goungu ma ngale pamake 'o sanangi gee ma Jo'oungu ma Dutu wosijaji-jajiokau ge'ena. 'Uwa sigado ngoneka naga moioni koyamakewa 'o sanangi ge'ena 'isoka ma sira nanga edete de nanga dotumu, ngano koyongakuwa ma Jo'oungu ma Dutuka. 12Ma Jo'oungu ma Dutu 'awi demo ge'ena kaisi'ado-'adonika de posironga de ma kuasaka, 'ena 'ifoloi 'idoto de 'o wase gee ma doto ma biono de ma dudunu. 'O demo ge'ena yodongosama sigado nanga singina de nanga di-dibangika; sigado nanga boboo de nanga kobongo ma nyia-nyiarika, de ya'akunu yalega ma diai 'o nyawa ma di-dibangi de ma du-duaka. 13Ma Jo'oungu ma Dutu 'awi bionoka, 'o do-dadi ka moi ma koidadiwa 'imasidutuluku, 'una kawoditoika 'iodumu ge'ena matero ka 'awi bionoka 'ipelengade. De ngone salingou pomadomoku to 'una 'awi bionoka 'okia naga gee padi-diaiokau. 14Ge'enau so ngone salingou tatapu pomasiga-gao nanga ngo-ngakuoka 'isoka kokia naga gee ngone posidumutokau. Sababu to ngone nanga 'Imam ma Amoko gee 'ifoloi wodaduie, gee wowosangokau sigado ma Jo'oungu ma Dutu wi ngiika 'o sorogaaka. 'Unau ge'ena 'o Yesus ma Jo'oungu ma Dutu wi Ngowaka. 15To ngone nanga 'Imam ma Amoko gu'una, 'una mita wamao 'okia naga gee ngone kopomadagakunuwa. 'Una mita witailokau 'o sagala moi-moioka 'isoka ngoneli, duga 'una kowosowonuwa! 16Sababu ge'ena, nou ngone pomo-moroini potaari ma Jo'oungu ma Dutuka gee wonapareta de 'awi singina ma 'ofi. Ma Jo'oungu ma Dutu 'asa wonasibosono de wonasibarakati la ngone pamake 'o ro-riwo gee ma 'orasi ngone poparaluu.

will be added

X\