2 TIMOTIUS 2

1Timotius, matero ka 'ai ngowaka ma dutu! Tanu ngona 'idadi nokuata de ma Kristus Yesus wi simara'ai gee wonakulakau ngoneno, sababu ngone pomarimoi de de 'una. 2'O do-dotoko gee ma sira no'isenokau tosidotoko 'o nyawa yoku-kudai manga bionoka, salingou nakisito-togumu 'o nyawa-nyawaka gee 'idadi nakingaku de yobarija yosidotoko 'o nyawa 'ireguka. 3Matero ka 'o solodado ma owa wimoi wosabari 'o sangisara wamoku, koge'enali mita gee ma Kristus Yesus wonileleani ge'ena, salingou notongosono 'o sangisara namoku. 4'O solodado wimoi nako wokudotiosi, ge'ena dua kowakalesanguawasi 'o manarama 'iregu. Sababu womau la 'awi kapita wi singina 'isanangi. 5Kogee wimoi woowa-owara yomakarebese ma ngale 'o parasengi wononu, ge'ena salingou wodomoteke to 'ena ma 'atorangi 'iodumu. 6Wopai-pairi wimoi gee womanarama wosiga-gangela, ge'ena yadaene salingou 'una 'isira wa'ese ma hasili. 7Natibangi nosidi-diai 'okia naga gee tosidemokau, sababu ma Jou 'asa woniriwo la 'idadi nasahe 'iodumu ge'ena. 8Nosi-singina naneda: 'O Habari ma Owa gee tositota-totara ge'ena la ma Yesus Kristus gee 'awi 'asali 'o Dautino, 'unau ge'ena ngaro wosongenokau ma kawomomiokali. 9Sababu 'o Habari ma Owau ge'ena tositotara, so ngoi tosangisara sigado 'ipusuku 'isoka woti-tingkai wimoi. Ma ma Jo'oungu ma Dutu 'awi demo koidadiwa yapusuku. 10Ma sababu ge'enau so ngoi totongosono tamoku 'iodumu ge'ena ma ngale 'o nyawa-nyawa gee ma Jo'oungu ma Dutu wakiirikokau, la yakiriwo yakisilaha ma ngekomo ma Kristus Yesus de yo'ahu de de 'una 'o ngii 'isure-sureka ge'ena kaisi'ado-'adonika. 11Posironga 'itiaioka 'o demo ne'ena, "Nako ngone pomasidosongenokau de de 'una, ngone 'asa powango mita de de 'una. 12Nako ngone potongosono pamoku 'o sangisara 'itu-tubuso, ge'ena ngone 'asa popareta de de 'una. Nako ngone pongose 'ato kopowinakowa, ge'ena 'una mita 'asa wongose 'ato kowonanakowa. 13Ngaro ngone kopowisingounuwa, ma 'una kowonamadawa, sababu 'una koidadiwa wadiai gee koimakadaenuwa de to 'una 'awi gokoie." 14Salingou nakisingano-nganono 'o nyawa-nyawaka ma ngale 'iodumu ne'ena. Ma Jo'oungu ma Dutu wi bionoka, nakidongoseka la 'uwa yomakaributu 'o demo-demo ma ngale. Sababu ge'ena ma faedaa koi'iwa, so duga ka 'o nyawa yosigise-gisene gee manga singina 'iruahe. 15Tanu ngona nomariwo nosigou-goungu la ma Jo'oungu ma Dutu woningaku ngona ge'ena gee 'idadi nomanarama ma ngale 'una. Nomariwo la 'uwa nimaeke ma ngale to ngona ni manarama, la 'ena nosidotoko yadae-daene 'o do-dotoko gee 'iti-tiai ma Jo'oungu ma Dutuno. 16Nomasikurutu 'o sagala jarita gee ma faedaa koi'iwa-'iwa, de gee wisiti-tingoono ma Jo'oungu ma Dutu. 'O jarita koge'ena-'ena duga ka 'o nyawa manga dingkai yodofoloi. 17To 'ona manga do-dotoko 'itagi 'isoka 'o panyake 'o geresi. 'Onaka naga ge'ena 'o Himeneus de 'o Filetus mita. 18'Ona yosimodiokau 'o do-dotoko 'iti-tiai, de yaruahe 'o nyawa munuka manga ngo-ngaku. 'Ona yongose 'ato yosonge-songenokau yomomikoli ge'ena 'idadiokau. 19Ma ma ba-bangini ma guata gee ma Jo'oungu ma Dutu wodiaiku, koya'akunuwa yatorou. Ge'ena ma dekuoka 'isilefoka konee, "Ma Jou wakinako to 'una 'awi nyawa. De 'o nyawa gee yongose 'ato 'ona yo'ahu de ma Jou, 'ona salingou yomaogoro yodiai 'o dorou." 20'O woa 'iamo-amoko ma dodaka, naga ma kia sonaa 'i'ini-'inioka. Naga munuka 'o saaka bolo 'o guraci yadiaiku, de naga mita 'o gota bolo 'o tonaka 'isai-saiti yadiaiku. Naga munuka yapake gee ma 'orasi 'o nyawa yola-laagomo yoboa, de munukali ge'ena ka ma woa ma dutu yapake 'o wange 'isinoi-noimi. 21'O nyawa yomasikurutu 'o sagala dorouoka, 'ona ge'ena 'isoka 'o sude 'itero-tero so yakipake 'o manarama 'isure-sureka. 'Ona 'isoka 'o sude 'itebi-tebini gee yatingaikau ma ngale manga tuangi ma sirete wapake. So 'ona ge'ena ma Jo'oungu ma Dutu wakisito-togumokau yakipake naga 'o sagala manaramoka gee ma Jo'oungu ma Dutu wodua-duaka. 22Nomasikurutu 'o nyawa ma goo-goo manga du-duaika. Nomariwo ma ngale no'ahu moteke ma Jo'oungu ma Dutu wi mau, nosingounu 'awi do-dotoko de nakidora 'o nyawa-nyawaka, de 'ani singina 'iriidi. No'ahu koge'ena de 'o nyawa gee yomasigaso-gasoko ma Jouka de manga singina 'itebi-tebini. 23'Uwa nomado-domoteke 'o nyawa yohaga-haga yomakakaba-baili, 'ona ge'ena kokiawa yanako. Ngona nanako, 'iodumu ge'ena duga kaimadadi 'o gangamo. 24'O nyawa gee yomanarama ma ngale ma Jo'oungu ma Dutu wileleani koyadaenuwa yotabangamo. 'Ona salingou manga singina 'itero 'o nyawa 'iodumika. 'Ona salingou yodadi 'o guru yaowa-owa de manga sabari 'iamoko. 25'Ona salingou de manga singina 'ima-ma'ai yakidotoko 'o nyawa gee yomalawa-lawani sababu poilia ma Jo'oungu ma Dutu wakikula 'o 'orasi ma ngale yomaogoro 'o sowono yodiai de yasahe 'o do-dotoko 'iti-tiai. 26De ma ngekomo ge'ena, 'ona 'idadi yomanakoli de yosupu 'o Tokata ma Koana ma paretaka gee yakitagokino de yakipakisaa yamoteke to 'ena ma mau.

will be added

X\