Rom 14

1Aria, saen talpein ta san ilo rumok dabai tia yan aŋsam tumanek lo ipalu tap, aŋ ilo uyan lo mi aŋane. Ak man aŋ iŋsinan ilo sou an niŋen iŋ da nug apei wo agane man amoi a. 2Ŋai ago ŋabol dan fun igo ya. Ilo rumok adi aenta mel an uyan dubol da, ago dugo aenta mel an saian dubol da. Talpein ta iŋ ilon lo anaŋ nuaeŋ mudan nuaeŋ an mel uyan ak ago ibol da. Ago dugo talpein san ilo rumok dabai tia yan, iŋ Juda sad kubiaeŋ ilon isou dan lo mudan yani san lo muruan ifuni da. Fun an niŋen iŋ pinapaŋ mi yani wak ago ilon isou da. 3Talpein a mel mudan yani dan iŋ talpein mel mudan ta yani na dan niŋen o ta imisilani na wa. Nek ago mi talpein a mel mudan ta yani na dan iŋ talpein mel mudan yani dan ta ile saian na wa. Man dugo, Anut talpein an iŋane la ya. 4Oŋ enti, go oŋ talpein sen ak san urat pinein wabi idu wo gane di? Iŋsen mi iŋanen tubun ak naon na itur boi, tia, yau idu boi. Gug en rumok geig a, iŋ man itur mok a. Man dugo, iŋanen tamol tubun ak lo itur san dabai idaisida ya. 5Aria, talpein ta iŋ nal aenta gun mok ak ago ilon isou da, ago yan lo iŋ Juda sad nal gun an sad kubiaeŋ iganuri san kagin ipani da. Gug talpein sen ak iŋ nal an fidian naon kisaek ak ago ilon isou da. Tamol an iŋsed anen anen atem kagin ago digane dan dibitinaep dile wa. 6Talpein ta iŋ nal gun an san kubiaeŋ iganuri dan, iŋ Tubun ak yaŋan yabisa wo ago igane da. Nek ago mi talpein a mudan fidian ka yani wo ibol dan, iŋ dam Tubun ak yaŋan yabisa wo ago igane da. Man dugo, iŋ mudan a yani dan niŋen o Anut ilo uyan ru irupei da. Ago dugo talpein a mudan imoi dan, iŋ dam Tubun ak yaŋan yabisa wo ilon isou da. Agod iŋ dam Anut ilo uyan ru irupei da. 7Talpein ta iŋsen kisaek imado san tia ya. Agod iŋsen kisaek imat san tia ya. 8Tia, id kumaen tumado tap, Anut o kumaen tumado wa. Agod id tamat tap, Anut o dam tamat a. Amaiak niŋen o, id kumaen tumado boi, tia tamat boi, id Anut san mi a. 9Fun nek amaiak niŋen Kristus imat go fon kumaen imasa da ya. Iŋ ago igane yan lo iŋ tamolpein dumat ak, agod tamolpein kumaen dumado dak dam sad Tubun ak imado da. 10Oŋ ata wo oŋane tei bitinaek lo gane dak i? Agod fon, oŋ ata wo oŋane tei misilani dak i? Aloŋ uyan, id fidian Anut anen bitinaek san kalik naon na tatur a. 11Man dugo, ru igo yen da, “Ŋai kumaeg ŋumado dan rumok tap, ŋaisag ru en nuŋon ilasa wa. Tubun en igo ibol da. Tamolpein fidian ŋai naog na ditakoksi wa. Agod tamolpein an fidian Anut naon na iŋaned muruan dubol ilasa wa.” 12An lo id anek anek mel dugo tigane na yan fidian Anut naon na walal te tidiri ilasa wa. 13An niŋen id fon nug ta tibitinae na wa. Tia, id igo ilod isou wa, tuparsisi san mel ta teid san dal te ta tigane na wa, agod suwanok dam teid san dal te ta tigane na wa. 14Rumok ak, Anut malan lo anaŋ mudan an fidian ikok mok a. An ŋai ŋaloŋ uyan a, agod ŋai Jesus Kristus lo ŋumado da, an lo iŋ ŋai ateg isueg ŋaisag ilo sou an itaot a. Ak man talpein anaŋ ta boi, mudan ta boi iŋ yani san an ta ikok na yak ago ilon isou tap, aria iŋ niŋen o mi mel an ta mok ikok na ya. 15Oŋ oŋane tei mel ta wani dan niŋen o ilon muruan tap, an niŋen o oŋ ilo panek san dal uri san tia ya. Mel a ta wani na wan umoi tap, an uyanan a. Kabelan tamol a iŋ niŋen o Kristus imat an, oŋ mel dugo wani dan lo, oŋ tamol an daoŋ pani banau. 16Oŋ mel uyan ak ta wo ilo lo rumok a, gug tamolpein aenta mel an niŋen o ru saiak dubol tap, an lo oŋ ilo sou saian ak gane ilasa man umoi a. 17Man dugo, saen Anut iŋsen mi idsad Tubun ak imado man, tani taluk san niŋen o mi tia ya. Tia, id Urgun lo kagin itaot, ilo maror, uyasusai amad da tator a. Kagin nek an mi malan te ya. 18Fun an niŋen tamol enti kagin naok an lo Kristus san urat igane dan Anut ilo uyan ipani a. Agod tamolpein sad leil lo tamol an uyanan a. 19Amaiak niŋen o, id maror san kagin tigane ilasap, agod id nug dabai tupanip, kagin an mi turip tator a. 20Oŋ anaŋ niŋen o mi, Anut san urat an, ilo rumok adi ilod lo yan ta pitiŋini na wa. Rumok, melmel fidian tani san a Anut malan lo yan ikok mok a, id an ka tani wa. Ak gug oŋ mel ta wani dop lo tamol sen ak aupasek lo yau idu tap, oŋ au upas da. 21Ago yak niŋen o, oŋ mudan wani ak lo boi, tia, you sakar uluk ak lo boi, tia, mel dugo gane dak lo boi, kabelan oŋane tei aupasek lo ganep yau idu banau. Tia, oŋ kagin ago ta gane na tap, kagin naok an mi uyanan a. 22Oŋ melmel dugon ilo lo rumok an mi oŋ Anut da luluŋam lo yen da. Talpein ta san ilo rumok an man oŋsa mel tia ya. Saen talpein iŋanen kagin naok uyanan a ilo lo rumok an bitinaek lo igane dop, mel ta saian ak ta ile na tap, iŋ ilon uyanan mok a. 23Ago gug, talpein ilon uraru dugo yani tap, Anut san bitinaek lo yau idu wa. Man dugo, iŋanen kagin an ilo rumok lo ilasa man tia ya. Mel ta iŋanen ilo rumok an lo ta ilasa na dan, nek an mi aupasek mok a.

will be added

X\