Revelesen 15

1Aria, ŋai kulob naon senamo geig ak kumaen panu lo ilasa dugo ŋile ya. Mel an man tubun a, an niŋen o ŋumasa saian go an lo dam ŋarut saian geig da. Ŋai eŋel seven dutur dugo banid lo muruan seven a murnap tamolpein daoŋ dupidinai san duburou dan ŋeil a. Agod saen kulob saiak saiak en itout dop, sen ta ilasa san tia ya, man dugo, muruan seven emaiak lo Anut san ilo mumarek itout pasik a. 2Ŋai mel ta nek ibol beig tubun ak galas oŋ, yai lo dukubuli ak ŋile woŋ da. Tamolpein a yu digane itout an, gubak mi mel kasik ak, iŋanen mitilaen agod yaŋan san sutek dam dibiai dudu yan dam ŋeil a. Tamolpein amaiak iŋ beig galas oŋ an giraŋen na dutur dugo, iŋ melmel gita igo woŋ Anut ipidinai an duburou se ya. 3Tamolpein an Anut san urat tamol Moses, agod Sipsip Nanun da sad bar diabi se ya. Bar an man igo ya. “O Tubun en, oŋ Anut, dabai fidian ama da ya. Urat fidian oŋ gane man tubun a. Maŋ mile dugo, iloma weiwei da. O Anut, oŋ tamol warou fidian sad kiŋ, oŋane kulob fidian itaot di rumok geig a. 4O Tubun en, enti oŋ yaŋa niŋen o ta irer na wak i? Enti oŋ yaŋa yabisa wo imoi ak i? Man dugo, oŋ mi gun a. Tamolpein tan titin fidian lo dumado dan dupalup oŋ ubou ama dile wa. Ata wo, oŋane kulob naok naok itaot mok an, gamu kuai tem walal isig, tamolpein fidian dile da.” 5Mel an itout go, kumaen panu lo kontrak san ab sel dalawan dupasig yen dan ŋile ya. Ilon lo galuŋ a yaŋan aben gun di gun geig ak dubol dan ŋile ya. 6Ago dugo eŋel seven e muruan seven daoŋ panek san duburou dan galuŋ an dibiseig kuai te dilasa ya. Iŋ kulos milkouk irafuleg ikokan geig ak dupulau a, agod let gol titired fo diganeg ilubani a. 7Aria, mel iwoiwo a kumaed dumado dan, luluŋad lo kisaek iŋ gol daeg seven eŋel an ipidinai a. Anut e kumaen pempem imado yau den, iŋsan ilo mumarek an daeg a seven an lo inawai a. 8Ago dugo tempel san galuŋ gun di gun geig ante man, Anut san girager di dabai tubun ak yakas igane ilasa dugo yakas an aben an lo awan isa ya. Talpein ta iŋ galuŋ gun an lo iladu san tia ya. Tia, iŋ eŋel seven an malad digane dop muruan seven an san urat digane itout gup a.

will be added

X\