Matyu 22

1Agod afon, Jesus tamolpein an ru faŋan lo irupidai a. 2“Anut san kagin panek man igo ya. Kiŋ ta iŋsinan nanun tamol ak o nug ŋanek san soubul yabi a. 3Iŋ imug mi tamol adi a iŋsan nug iwon san anaŋ diani wan nal dugon lo dupalu wo irupidai. Aria, anaŋ nal idu dugo iŋsinan urat tamol idiraig tamol an dil o diau a. Ago yak man iŋ dupalu wo dumoi a. 4Agod afon iŋ urat tamol sen ak idiraig diau wo dugo, igo irupidai, ‘Aŋ tamol a gubak mi ŋigiai an sad na aup, igo arupidai a. Aloŋ uyan, ŋai anaŋ ŋukubune la ya. Makau tubun ak agod makau nanud tinid bulbal ak dam mafu la ya, mel fidian mukubuneg dien da. Aŋ soubul en lo apalu wa.’ 5“Urat tamol diaug tamol an ru durupidai a, ak man ru an dumoi go kagin ta dupani na yan lo, dufurak go gidigidad diau a. Ta iŋsinan abi lo yau dugo, ta yaug iŋsinan bisnis urat igane se ya. 6Aenta dumasag kiŋ san urat tamol duburoug ru saian ak lo dububuŋanaig dufu dumat a. 7An niŋen o kiŋ tiŋaen tubun mi saian tag, iŋsinan yu tamol adi idiraig diaug, tamol a iŋanen urat tamol dufu dumat, amaiak dufu dumat dugo sad panu dam dumarig inani yau a. 8“An itout go kiŋ an iŋsan urat tamol ago irupidai, ‘Nug iwon ŋilaŋal san anaŋ kubunek go yen da. Ak man tamol a ŋai imug ŋigiai an, dupalu san iŋ ta idaisuda na ya. 9Ago yak niŋen o amasap dal gigin fidian lo atur a, tamol fidian eil dop, agiaip nug ŋilaŋal san anaŋ lo dupalu wo ago arupidai a.’ 10Iŋ ago ibol dugo, iŋanen urat tamol dumasag, dal gigin fidian atem dutur dugo, tamolpein uyadi agod saiadi ak dam dil dugo dutumanai se ya. Agog anaŋ tubun an lo dupalu ya. An lo man ab a ate soubul diani san an awan isa geig a. 11“Tamolpein dumasig dumado dugo kiŋ an yil o iladu ya. Iŋ iladug malan yau man, tamol ta nug ŋilaŋal san kulos ta igane na yan ile ya. 12Agog naon na isusag isumiani, ‘Turag, en dugog oŋ nug ŋanek san kulos ta gane na gug ente sadu yak i?’ Agog tamol an ru ta ibol san tia ya. 13“Ago tag kiŋ urat tamol adi siŋiren na dutur dan irupidaig ibol, ‘Aŋ ŋien banin afoup, aŋanep abili patun fo ilasa dop, abaŋ tidom tubun ak lo imado wa. Aben ante man tamolpein tinaŋ digane dop madai lo luod dugurmi wa.’ 14Man dugo, Anut iŋ bo tamolpein wei kasik igiai da, ak gug tamolpein kisaek kisaek mi diladu san kob ipidinai a.” 15Agog Farisi adi diaug, Jesus san ŋiŋeŋ lo dal dugo diabi san niŋen o dutumanig dukubiai se ya. 16Iŋ awad kisaek go, siganed megeloum aenkadi, Herod san tamol aenta dida didiraig, Jesus san na diau a. Tamol an Jesus durupeig dubol, “Girek maŋau, maŋ maloŋ ak oŋ ru rumok san tamol. Oŋ tamolpein Anut san dal an niŋen o itaot mi piteŋanai da. Oŋ tamol ta niŋen o urer san tia ya. Tia, oŋ ru kisaek an mi tamol fidian lo ubol yau da. Gidad yaŋad da yak, di yaŋad tia yak dam mi a. 17An niŋen o oŋ ka mel en niŋen o rupaiama wa. Dugo, Kaisa takis moni tupani wan uyan ak i? Tia, saian ak i? Oŋ dugo ilo isou dak i?” 18Ago yak man Jesus iŋsad ilo sou saian an iloŋ dugo igo irupidaig ibol, “Aŋ balem rararu a, ata wo ŋai bitinaek lo aginiag o agane dak i? 19Aŋ moni a lo takis adad o dan kisaek akubiai dop ŋile wa.” Ago tag iŋ moni ta disinig san na dupalug dupani a. 20Jesus ibol isumianai, “Mitilaen agod yaŋak e fufo digire yan enti san ak i?” 21Agog iŋ dubol, “Kaisa san.” An niŋen o irupidai, “Mel ta Kaisa san tap, Kaisa apani wa, agod mel ta Anut san tap, Anut apani wa.” 22Saen ru an duloŋ man durut saian geig a. Agog dibiseig diau a. 23Nal kisaek an lo Sadyusi aenta Jesus san na dupalu ya. Tamol nek an pris gurman adi sad warou, iŋ tamol dumat pe murnap fon kumaen dumasa da wan niŋen o ilodi ta rumok na da. Agog Jesus igo dubol dusumiani, 24“Girek maŋau, Moses gubak mi igo ibol a. ‘Tamol ta iŋ nanuk aman tiag imat tap, gidad tein imasap iwon ka iŋane dop, an lo tein imat la yak aben lo nanuk idiri ilasa wa.’ 25Aria, gubak mi man tein muroun nuŋod 7 maŋ lulaŋama lo dumado se ya. Matu ak pein iŋaneg imado nag imat, ak gug iŋ nanuk aman tia ya. Ago yak niŋen o tein bakan ak imasag matu imat an san pein iŋane ya. 26Tein bakan an dam tein san suos a iŋaneg, dumado yak man nanuk amad tiag tamol ak imat a. Tein muroun murna an dam nek ago mi, teidi sad suos an diŋane yak man, nanuk amad tia dumado nag, dumat a. 27Tein an fidian mi nanuk amad tia dumat gug pein an dam imat a. 28An niŋen o oŋ ubol rupaiama wa. Saen tamolpein dumat pasik an afon kumaen dumasa tap, tamol an fidian ilod lo man, pein an enti iwon ak i? Oŋ uloŋ ak iŋ fidian iwodi a.” 29Ak gug Jesus ru naon irupidaig igo ibol, “Aŋ afurfi saian a. Man ata wo? Anut san ru girek lo yen dan, agod Anut san dabai dam aŋ ta aloŋ uyan na ya. 30Saen tamol dumat pe dumasap kumaen panu na dutor dan, pein ta dusu na da, agod ante tamol ta pein ŋien ta dupani na da. Tia, iŋ kumaen panu san eŋel igo woŋ dumado da. 31Agod taida mi, tamol dumat ak fon kumaen dumasa da wan niŋen o kududom agure. Nag aŋ ru a Anut irupaiaŋ an ta asuti na yak i? Iŋ igo ibol, 32‘Ŋai man Abraham san Anut, ŋai dam Aisak san Anut, agod ŋai dam Jakob san Anut.’ Anut man iŋ tamol a mateŋ lo dumado dan sad Anut tia ya. Tia, iŋ man tamol kumaed dumado dak sadi a.” 33Saen tamolpein a Jesus dubuluwi dan iŋsan piteŋanek emaiak duloŋ man, iŋ durut dugo ru an niŋen o nug lo diŋiŋeŋ ila iso se ya. 34Saen Farisi, Jesus ru a ibol an lo Sadyusi awad yabituani an duloŋ man, naon na dutumani a. 35Tamol ta iŋ luluŋad lo itur an, iŋ kubiaeŋ san uloŋ tamol, amaiak ru a Jesus ibol an ipipi wo igo isumiani a. 36“Girek maŋau, kubiaeŋ dugomaiak iŋ malan te dugo, kubiaeŋ aenta iriŋanai geig ak i?” 37An niŋen o Jesus ago irupei, “Oŋ gidad Tubun en oŋane Anut niŋen o umat a, oŋ bube fidian lo, oŋ ŋutu fidian lo, agod oŋane ilo sou fidian lo ago gane wa. 38Kubiaeŋ en tubun a, agod iŋ malan te geig a. 39Kubiaeŋ turan en dam nek ago mi a. Nek oŋse niŋe wo umat dak ago mi, tamolpein aenta dam niŋedi wo umat a. 40Kubiaeŋ uraru en malan te yen da, Moses san kubiaeŋ fidian, agod profet sad awak aban an dam, kubiaeŋ uraru en paed na diyuk dien da.” 41Farisi adi dutumanig dumado dugo Jesus ibol go isumianai, 42“Aŋ Kristus niŋen o dugo ilom isou di? Iŋ enti nanun ak i?” Ago man iŋ durupei, “En man Dawid nanun.” 43Ago tag iŋ irupidai, “Aria, en dugo woŋ go, Kristus niŋen o, Dawid iŋsen mi Awan Urgun san dabai lo mi iŋiŋeŋ dugo tamol an yaŋan man, Tubun ak ibol ak i? Iŋ igo ibol, 44‘Tubun en ŋaisag Tubun ak igo irupei, “Oŋ ŋai tuog won ak ate masip yaup, murna gup ŋai oŋsa ager adi ŋidiraip, oŋ ŋie pae na dumado dop ŋie nam partuanai a.” ’ 45Amaiak niŋen o Dawid iŋsen mi iŋ Tubun ak ago ibol tap, en dugo woŋ pe iŋ Dawid nanun ak i?” 46Nal an log yau man, Jesus sumiaeŋ subuŋan taidam dusumiani wan niŋen o direr se ya.

will be added

X\