Hibru 3

1An niŋen o aŋ ŋaineg teig taog gun ak, aŋ maŋ da Anut san wagiŋ an lo itumanad go tumado dan, aŋ Jesus niŋen o mi ilom isou a. Iŋ aposel agod iŋ pris malan te yak an niŋen o tabol ilasa da. 2Iŋ Talpein a ipiliani an awan iri pani a, nek ibol Moses Anut awan kagin ipanig Anut san ab ilon lo urat igane igo ya. 3Nek ibol tamol ab yabi an yaŋan tubun dugo ab mok sen man yaŋan tusan ak ago ya. 4Rumok, ab fidian kisaek kisaek atem tamol diabi da, ak man Anut sen iŋ mel fidian idirai an iriŋanai a. 5Moses iŋ Anut anen ab san tamolpein fidian luluŋad lo urat pinein igo Anut awan iri panig urat igane ya. Nek mel amaiak saen murnap ilasa dan te dop ru a iŋ niŋen dubol an Moses dam gubak mi niŋen o ibol ilasa ya. 6Ak man Kristus iŋ Anut Nanun mok imado ya, an lo iŋ Anut san ab lo tamolpein kagin ipidinai a. Id dabai amad da Anut anen ru tabol dan, id ilo uyan amad da mel a Anut ipanad ak niŋen o ilod yen dan tabi sakar tap, id Anut san ab mok a. 7Amaiak niŋen o nek ibol Awan Urgun gubak mi ibol ago, “Nek gamu en, aŋ iŋsan awan aloŋ tap, 8aŋanem bubem aganep sakar ilasa amoi. Nek ibol wagam aŋ tubum bagem bitinaek san saen lo tan kawan ak ate Anut patud dupani ago mi, aŋ kagin an ta agane na wa. 9Saen an lo iŋ ŋai tuog lo bitinaek an diganeg dukubianag se ya. Anaŋar 40 ŋaisag urat dabai fidian ŋigane an dile bo man ŋai patud dupanag se ya. 10Fun amaiak niŋen ŋai iŋ niŋedi wo tiŋaeg saian go ago ŋabol, ‘Iŋsad bubed lo iŋ pempem dal senamo diau da, agod iŋ ŋaisag dal dugo woŋ ŋau dan ta duloŋ na ya.’ 11Ŋaisag tiŋae saiak lo geg sakar ak ŋigane yan, ago ŋabol, ‘Rumok lak na, iŋ ŋaisag yaes bilabal lo ta mok diladu na wa.’” 12An niŋen ŋai teig taog, kagin agane wa. Kabelan aŋ luluŋam lo ta iŋ buben ilo sou saian aman dap, ilon lo rumok tiap, Anut kumaen pempem san an patun ipani banau. 13Tia, nal fidian aŋ tan suek ru nug arupei, nal “gamu” dubol dan lo aŋ ago agane wa. Kabelan aupasek san kagin irawaŋ dop aŋ luluŋam lo ta bubem afutani banau. 14Ilo rumok malan malan an id fun tiganeg an tabi sakar pe yaup wadan na idu tap, an lo id Kristus da sisem tutumani wa. 15Id taloŋ ak ru e Anut Dawid ipani yen yen geig da, an ago ibol, “Nek gamu en, aŋ iŋsan awan aloŋ tap, aŋanem bubem aganep sakar ilasa amoi. Nek ibol wagam aŋ tubum bagem bitinaek san saen lo tan kawan ak ate Anut patud dupani ago mi, aŋ kagin an ta agane na wa.” 16En sauta wagam Anut awan duloŋ gug awa parsisalek digane i? An tamolpein wagam Moses iŋal go Igipta tan dibiseig diau ama ya. 17En sauta anaŋar 40 iŋ Anut tiŋae saiak dupani se i? An tamolpein a aupasek diganeg dumat go sad susanud tan kawan ak ate dudu ama ya. 18Agod en sauta niŋedi wo Anut rumok lak na yaes bilabal lo diladu san tia ago ibol irupidai i? An tamolpein a iŋ awan duparsisali ama ya. 19An niŋen o id tile taloŋ ak iŋ diladu san tia ya, man dugo, iŋ ilod lo ta rumok na ya.

will be added

X\